Eni, kakuli Mulimu ubata kuli batu bakopane hamoho kuli bamulapele. Bibele ibulela kuli: “Luisezane pilu kuli lususuezane kuba ni lilato ni misebezi yeminde, lusike lwakeshebisa kukopana hamoho.”—Maheberu 10:24, 25.

 Jesu naabonisize kuli balateleli bahae nebaka onga-ongiwa hamoho kuba sikwata silisiñwi, hanaa babulelezi kuli: “Batu kaufela bakaziba kuli mu balutiwa baka ka taba ye—haiba mulatana mwahalaa mina.” (Joani 13:35) Mi nzila yende hahulu yene bakabonisa ka yona balutiwa ba Kreste lilato, ki kukopana ni Bakreste babañwi. Nebaka onga-ongiwa mwa liputeho, mi kamita nebaka kopananga hamoho kuli balapele Mulimu. (1 Makorinte 16:19) Bakreste bao kaufela nebakaba kopano ya mizwale ba mwa lifasi kaufela.—1 Pitrosi 2:17.

Kunani lika zeñwi zatokwa kueza mutu kwandaa kuba feela mwa bulapeli bobuñwi

 Ki niti kuli Bibele ibulela kuli batu baswanela kukopana hamoho kulapela Mulimu, kono haibonisi kuli mutu wakona kutabisa Mulimu ka kuba feela mwa bulapeli bobuñwi. Kuli bulapeli butabise Mulimu, buswanela kutusa mutu kupila ka nzila yemutabisa. Ka mutala, Bibele ibulela kuli: “Bulapeli bobukenile ni bobusa nyazahali fapilaa Mulimu Ndataa luna ki bo: ki kubabalela lindiala ni limbelwa mwa manyando abona, ni kusaikenya mwa linzila zemasila za lifasi le.”—Jakobo 1:27.