NNGANYI utu kayi muanji kutuilangana ne ntatu ne mujinge bua muntu mukuabu amuambuluishe? Patudi tutuilangana ne ntatu kampanda, tutu pamuapa tukeba mulunda udi uditeka pa muaba wetu ne ukadi mutuilangane pende ne ntatu ya buena yetu. Mulunda muimpe ngewu udi uditeka pa muaba webe ne ukadi pende mutuilangane ne ntatu ya buena yebe.

Bamue badi mua kumvua pabu bia momumue padibu bajinga kusambila. Kadi pamutu pa kusambila Nzambi udi mupite bansantu kule ne kule, bobu badi bamona ne: mbimpe kusambila bansantu. Badi bela meji ne: bu muvua bansantu batuilangane pabu ne ntatu ne makenga bitu bifikila bantu bonso, badi mua kubumvuila bimpe. Tshilejilu, bantu badi bajimije tshintu tshiabu tshia mushinga batu basue kulomba Antoine wa Padoue udibu bangata bu munsantu ne mfumu wa bintu bijimine anyi bidibu bibe. Bobu basue kusambila bua nyama udi usama, badi mua kulomba munsantu wabu François wa Assisi anyi Jude Thadée padibu bashikile.

Kadi mmunyi mutudi mua kujadika bikala Bible udi wanyisha bua kusambila bansantu? Bu mudi masambila etu mikale malu atudi tuambila Nzambi, mbimpe tumanye ne: utuku uteleja masambila etu anyi? Katuenaku kabidi mua kudiebeja ne: Mmunyi mutu Nzambi udiumvua patudi tusambila bansantu?

Tshilele tshia kusambila bansantu ntshifumine ku dilongesha dia bena Katolike dia kulomba bansantu bua kuakuila bantu kudi Nzambi. Mukanda kampanda wa bena Katolike (New Catholic Encyclopedia) udi wamba ne: “Nzambi udi ubuikidila muntu udi musue kumulomba luse anu bobu bamulombele kudi munsantu kampanda udi Nzambi wanyisha bua kuenza bualu ebu.” Nunku, muntu udi usambila bansantu udi ne ditekemena dia ne: Nzambi neamuanyishe ku diambuluisha dia bansantu bualu badi ne muaba wa pa buawu ku mêsu kua Nzambi.

Bible utuku ulongesha nunku anyi? Bamue bantu badi bamba ne: mupostolo Paulo wakashiya dilongesha dia kusambila bansantu mu mikanda yende. Tshilejilu, mu mukanda uvuaye mutumine bena Kristo ba mu Lomo, wakafunda ne: “Mpindieu bana betu, ndi nnulomba ku butuangaji bua Mukalenge wetu Yezu Kristo ne bua dinanga dia nyuma bua nudifile nanyi bikole mu masambila kudi Nzambi bua bualu buanyi.” (Lomo 15:30) Mu mvese eu, Paulo uvuaku ulomba bena Kristo nende bua bamulombele kudi Nzambi anyi? Tòo. Bu biobi nanku, bavua mua kuikala balombe Paulo mupostolo wa Kristo bua kubalombela kudi Nzambi. Paulo uvua musue kuleja ne: ki mbibi bua kulomba muena Kristo netu bua asambile Nzambi bua bualu buetu. Kadi mbishilangane ne kusambila muntu kampanda utudi tuela meji ne: udi mu diulu bua afikishe milombu yetu kudi Nzambi. Bua tshinyi?

Mu Evanjeliyo wa Yone, Yezu udi wamba ne: “Meme ndi njila ne bulelela ne muoyo. Muntu kena mua kulua kudi Tatu kayi mupitshile kundi.”  (Yone 14:6) Udi wamba kabidi ne: “Tatu neanupeshe tshionsu tshinuamulomba mu dina dianyi.” (Yone 15:16, MMV) Yezu kavua muambe ne: tudi ne bua kutuma masambila etu kudiye bua yeye atulombele kudi Nzambi to. Bua Nzambi kumvua masambila etu, tudi ne bua kumulomba anu yeye nkayende mu dîna dia Yezu, kadi ki nku butuangaji bua muntu mukuabu to.

Pavua bayidi ba Yezu bamulombe bua kubalongeshaye mua kusambila, Yezu wakabambila ne: “Misangu yonso inudi nusambila nuambe ne: ‘Tatu, dîna diebe ditumbe.’” (Luka 11:2) Bushuwa, “misangu yonso” anyi dîba dionso ditudi tusambila, katuena ne bua kusambila Yezu anyi muntu mukuabu, kadi tudi ne bua kusambila anu Nzambi yeye nkayende. Malongesha malelela a Yezu aa kaenaku atufikisha ku diamba ne: tudi ne bua kusambila Nzambi ku butuangaji bua Yezu Kristo, kadi ki nku butuangaji bua bantu bakuabu anyi bua bantu badibu bangata bu bansantu anyi?

Bu mudi disambila ne mushinga wa bungi mu ntendelelu wetu, kutendelela muntu mukuabu pakumbusha Nzambi kakuena kupetangana ne tshidi Bible ulongesha to. (Yone 4:23, 24; Buakabuluibua 19:9, 10) Ke bualu kayi tudi ne bua kusambila anu Nzambi nkayende.

Mu Muyuki wende wa pa Mukuna, Yezu wakafila tshilejilu tshia muana kampanda ulomba tatuende tshiakudia. Tatu udiku mua kupesha muana dibue pamutu pa diampa anyi? Anyi udiku mua kupesha muana nyoka pamutu pa kumupesha mushipa anyi? (Matayi 7:9, 10) Kabiena mua kufikila tatu wa dinanga bua kuenzaye bualu bua mushindu eu!

Tuanji kuangata tshilejilu tshia momumue etshi bua muledi kampanda. Fuanyikija ne: muanebe mmusue kukulomba tshintu. Utu wenza muebe muonso bua kuikala nende mu malanda mimpe, ne bitu bipepele bua muntu yonso kukukuatshilaye bualu. Kadi bu mudi muana ne buôwa bua patupu bua mudiye kayi mumanye tshiudi mua kuenza, udi ulomba muntu mukuabu bua amulombele tshidiye natshi dijinga kuudi. Neudiumvue bishi? Kadi neudiumvue bishi yeye muikale ne tshilele tshia kuyukila nebe anu ku butuangaji bua muntu mukuabu ne bimueneka ne: ke muikalaye wenza misangu yonso? Neusanke ne bualu ebu anyi? Nansha kakese! Baledi badi ne dinanga mbasue bua bana babu bayukile nabu buludiludi, ne mbasue bua badilejele nkayabu majinga abu.

Mu tshilejilu tshiende tshia muana ulomba tshiakudia, Yezu wakapatuila bantu dilongesha edi: “Nunku, binuikala nuenu bantu babi bamanye mua kupesha bana benu bintu bimpe, mmunyi muapanga Tatu wenu udi mu diulu kutamba kupesha bantu badi bamulomba bintu bimpe?” (Matayi 7:11) Kakuyi mpata, muledi utu ne dijinga dikole dia kupesha muanende bintu bimpe. Tatu wetu wa mu diulu udi ne dijinga dikole dia kuteleja masambila etu ne kuandamuna.

Nzambi mmusue bua tuyukile nende buludiludi mu disambila tuetu nkayetu nansha tuetu ne kanyinganyinga bua bilema bitudi benze. Ki mmupeshe bantu bakuabu bukenji bua kuteleja masambila etu to. Bible udi utulomba wamba ne: “Teka bujitu buebe pa mbidi pa Yehowa, ne yeye neakukoleshe.” (Musambu 55:22) Tudi ne bua kuikala ne muenenu muimpe Yehowa Nzambi, pamutu pa kueyemena butuangaji bua bansantu anyi bua muntu kayi yonso.

Tatu wetu wa mu diulu udi utabalela yonso wa kutudi. Mmusue kutuambuluisha mu ntatu yetu ne udi utulomba bua kusemena pabuipi nende. (Yakobo 4:8) Disankapu kayi ditudi nadi dia kuikala ne mushindu wa kusemena pabuipi ne Nzambi wetu ne Tatu wetu, ‘Muteleji wa milombu!’​—Musambu 65:2.