Mmuena malu mabi utudi tulongela kudiye mmuntu udi Yezu uyukila nende mu foto eu. Muntu mubi eu udi unyingalala bua malu ende mabi. Udi ulomba Yezu ne: “Umvulukaku pawikala mu Bukalenge buebe.” Nunku anu muudi umona mu foto eu, Yezu udi uyukila ne muenji wa malu mabi eu. Udiku mumanye tshidi Yezu umuambila anyi?— * Yezu udi umulaya wamba ne: “Bulelela, ndi nkuambila lelu ne: Newikale nanyi mu Mparadizu.”

Udi wela meji ne: Mparadizu neikale bishi?— Bua tuetu kujadika ne: tudi bapete diandamuna dimpe, tuanji kuakula bua Mparadizu uvua Nzambi muenzele Adama ne Eva, mulume ne mukaji ba kumpala. Mparadizu muine uvua kuepi? Uvua mu diulu anyi pa buloba?—

Wewe muambe ne: uvua pa buloba udi muambe bulelela. Nunku patudi tuela meji muikala muntu mubi eu “mu Mparadizu,” tudi ne bua kuela meji ne: neikale pa buloba ebu bukudimuna mparadizu. Mparadizu eu neikale mushindu kayi?— Tuanji kukonkonona.

Yehowa Nzambi mumane kufuka bantu ba kumpala Adama ne Eva, Bible udi wamba ne: wakabateka mu mparadizu pa buloba apa. Bavua babikila mparadizu eu ne: ‘budimi bua Edene.’ Udiku mua kufuanyikija muvua ‘budimi bua Edene’ ebu buimpe butambe anyi?— Bushuwa, Edene uvua muaba muimpe mutambe wa kusomba kupita miaba yonso idiku matuku etu aa!

Udi wela meji kayi? Yezu neikale pa buloba apa ne muntu mubi uvua munyingalale bua mibi yende anyi?— Tòo, Yezu neikale mu diulu bu Mukalenge bua kukokesha Mparadizu wikala pa buloba. Nunku Yezu neikale ne muntu mubi eu mu mushindu wa ne: neamujule ku lufu ne neamone muikale Yezu umutabalela  mu Mparadizu pa buloba. Kadi bua tshinyi Yezu nealekele muntu uvua muenji wa malu mabi bua kusomba mu Mparadizu?— Tuanji tuakulayi bua bualu ebu.

Mbulelela bua kuamba ne: muntu mubi eu uvua muenze malu mabi matambe. Kadi ke muvua kabidi bantu ba bungi bavua ne muoyo pa buloba apa benze. Kadi ba bungi ba kudibu, mbenze malu mabi bualu kabavua babalongeshe malu a Yehowa ne tshivuaye musue bua benze to.

Bantu ba mushindu eu popamue ne muenji wa malu mabi uvua Yezu muyukile nende ku mutshi nebababishe ku lufu bua kuikala ne muoyo mu Mparadizu pa buloba apa. Nebabalongeshe tshidi disua dia Nzambi. Pashishe badi mua kuleja ne: mbanange Yehowa.

Udiku mumanye muikalabu mua kuleja ni mbanange Yehowa anyi?— Mpadibu benza tshidi Nzambi ubalomba. Nebikale bimpe bitambe bua kusomba matuku onso mu Mparadizu ne kuikala ne bantu badi banange Yehowa ne bantu nabu!