NUSHALE BATABALE!
Buloba budi mu njiwu: Ntshinyi tshidi Bible wamba?
“Tudi mu lubilu batangile ku njiwu ya dinyanguka dia malu a mivu. Tshilejilu, mâyi neapasalale mu bimenga binene. Nekuikale bikondo bia miunya mipite bukole. Mvula ya bipupu mibiamibiala neyiloke. Mâyi neapangike miaba ya bungi. Mishindu ya mitshi ne ya nyama muliyo mujima neyijimine. Bionso ebi ki mmianu anyi malu manekesha to, mbintu bidi bamanyi ba malu batujadikila bikala mua kufumina ku malu adi matunga enza mpindieu mu mianda ya nzembu.”—Muyuki muela mu dia 4/4/2022 kudi António Guterres (mulombodi wa Bulongolodi bua matunga masanga anyi ONU) wa bualu bua luapolo lua dinyanguka dia malu a mivu lua kasumbu ka bamanyi ba mbulamatadi midisange.
“Bamanyi ba malu badi batudimuija ne: mu katupa kîpi emu, dinyanguka dia mivu nedinyange miaba idi bisuku ne mitshi milama bimpe ya mbulamatadi [mu Etats-Unis] pabuipi ne 423 yonso, nangananga idi mifuane kunyanguka ne miunya mibi idi yenda anu ikola. Mulongolongo wa njiwu idibu bamba udi umvuika anu bu wa bipupu bitutu tubala mu Bible, ya midilu ne dipasalala dia mâyi, dienguluka dia mabue a mashika, diuwula dia misulu, ne bikondo bia miunya mipite bukole.”—“Dipasalala dia mâyi dikuate buôwa dia ku Yellowstone ntshimanyinu tshia njiwu itshilualua,” The New York Times, dia 15/6/2022.
Lutatu lua dinyanguka dia buloba elu ludi mua kujika anyi? Bikalalu mua kujika, nnganyi walujikija? Tumonabi menemene tshidi Bible utuambila.
Mbualu bukavua bumana kumanyisha
Bible udi wamba ne: Nzambi neabutule “badi banyangakaja buloba.” (Buakabuluibua 11:18) Mvese eu udi utulongesha malu asatu aa:
1. Bienzedi bia bantu nebinyange buloba bikole.
2. Dinyanga dia buloba edi nedishikile.
3. Nzambi ke wajikija lutatu lua dinyanguka dia buloba elu, ki mbantu to.
Buloba ebu kabuakubutuka nansha
Bible udi wamba ne: “Buloba budi bushalaku kashidi.” (Muambi 1:4) Bantu nebikale anu basombapu.
“Bantu bakane nebapiane buloba, nebasombapu bua kashidi.”—Misambu 37:29.
Buloba buonso bujima nebupingane anu muabu muakabufukabu.
“Tshipela ne buloba bume nebisanke bikole, ne mpata wa tshipela neikale ne disanka ne neele bilongo bu bilongo bia safran.”—Yeshaya 35:1.
Mona bikuabu:
TSHIBUMBA TSHIA NSENTEDI
Muntu neanyange buloba kakuyi mushindu wa kubulongolola anyi?
Bible kavua muakule anu bua mudi bantu banyanga lelu muaba udibu, kadi uvua muakule kabidi bua tshikala mua kufikila badi babunyanga.
MANDAMUNA A NKONKO YA MALU A MU BIBLE
Ntshinyi tshidi Bible wamba bua bipupu?
Ndinyoka dia kudi Nzambi anyi? Nzambi utu wambuluisha bantu badi bipupu bikuata anyi?
MALONGESHA A MU BIBLE A NSHINDAMENU
Bua tshinyi Nzambi uvua mufuke buloba?
Buloba mbuwule ne bintu bilenga bia bungi. Mbabuteke mu ntanta wa bule bukumbane ne dîba, busendamija ndambu mudibi bikengela ne budi bunyunguluka mu lubilu lukumbane. Bua tshinyi Nzambi uvua mudienzeje bikole nunku bua kufuka buloba?
TSHIBUMBA TSHIA NSENTEDI
Bukalenge bua Nzambi nebuenze malu kayi?
Yezu uvua mumanye ne: anu Bukalenge bua Nzambi ke mbulamatadi umuepele udi mua kujikija malu mabi adi pa buloba. Mmalu kayi akadi bukalenge abu buenze bua kukolesha dieyemena dietu?
MALU ETU
Buela mu bisangilu
Keba bua kumanya muaba utudi tudisangishila ne mushindu ututu tutendelela. Muntu yonso udi mua kubuelamu ne kabena basangamu makuta to.
