Kaka Onego Opuonj Nyithindo e Wi Nyasaye—Yore Mage Matiyo Maber Moloyo?

“To wechegi machikoi tinende, ginibedi kuom chunyi: nipuonjgi nyithindi gi kinda, niwachgi kibedo e odi, kendo kiwuotho e yo, kidhiyo nindo, kendo kia malo.”—RAPAR MAR CHIK 6:6, 7.

JONYUOL seche moko nyalo winjo ka ting’ mar tiego nyithindgi ohewogi. Kata kamano, sama gimanyo kony, paro mopogore opogore ma giyudo e wi wachno medo mana bagogi. Wede kaachiel gi osiepe jorikni chiwo pachgi. Kendo buge, gasede, koda Intanet siko chiwo puonj momedore kendo seche moko puonjgo tuomore.

To komachielo, Muma chiwo ne jonyuol ok mana puonj migeno kende e wi gima onego gipuonj nyithindgi to bende weche matiyo kuom kaka ginyalo puonjogi. Mana kaka ndiko mag Muma mochiw malo kae nyiso, dwarore ni jonyuol omany yo ma ginyalo wuoyogo gi nyithindgi pile pile e wi Nyasaye. Piny kaendi ochan yore ang’wen mogol e Muma mosekonyo jonyuol gana gi gana e puonjo nyithindgi e wi Nyasaye.

1. Yud puonj kuom chwech. Jaote Paulo nondiko niya: “Nyaka a chuech piny gik ma ok ne mag Nyasaye, kaka tekone mochwere, gi kite, mineno kuom gik ma en nochueyo, nenore ratiro, mondo kik giwuondore ni gikiya.” (Jo Rumi 1:20) Jonyuol nyalo timo mang’eny e konyo nyithindgi neno ni Nyasaye en ng’at masie kuom nyisogi gik ma Nyasaye nochweyo kae to gikonygi fwenyo kido mag Nyasaye ma nenore e chwechnego.

Yesu notiyo gi yorni e puonjo jopuonjrene. Kuom ranyisi, nowacho niya: “Nonuru winy me polo, kaka ok gichuo kata keyo, kata keno e dere; to Wuonu me polo e ma miyogi chiemo. To un, ok uloyogi ahinya koso?” (Mathayo 6:26) Kae Yesu nonyiso kido mag Jehova mag hera kod ng’wono. Kata kamano, notimo moloyo mano. Nokonyo jopuonjrene neno kaka Nyasaye nonyiso nyithinde kidogo.

Ruoth Suleman mariek nonyiso rieko ma Nyasaye nomiyo ochunglo kendo notiyo gi chwech matindogi mondo ojiwgo puonj moro maduong’. “In jasamwoyo, dhi ka ma ochunge dakie; ket chunyi gi paro timgi, ibedi mariek: kata gionge gi jang’ad buchegi, kata ng’a makwayogi, kata jaloch, to gikano chiembgi ka piny ochako chiek, gisolo gi ma gichamo keyo kosewuok.” (Ngeche  6:6-8) Mano doko yo mong’ith mar puonjo kaka wanyalo yango gik mwadwaro chopo e ngimawa kae to wati gi teko ma Nyasaye omiyowa e chopogi!

Jonyuol nyalo luwo ranyisi mar Yesu kod Suleman mar puonjo maber ka gitimo gik maluwogi: (1) Penjo nyithindgi le koda yiende mamorogi. (2) Puonjore mang’eny kuom le koda yiendego. (3) Yudo puonj ma chwechgo chiwo e wi Nyasaye.

2. Bed gi paro mowinjore kuom joma ipuonjo kaka Yesu nobedogo. Kuom ji duto mosedak e piny, Yesu ema ne nigi weche ma ne dwarore ahinya ne dhano. Kata kamano, notiyo gi kinde mang’eny e penjo ji penjo. Ne odewo ahinya kaka joma ne opuonjo paro kendo neno gik moko. (Mathayo 17:24, 25; Mariko 8:27-29) E yo ma kamano bende, jonyuol nigi weche mang’eny mabeyo ma ginyalo puonjo nyithindgi. Kata kamano, mondo gipuonj maber, dwarore ni giluw ranyisi mar Yesu kendo gijiw nyithindgi onyis e yo mathuolo kaka giwinjo e chunygi.

To nade ka nyithindo nyiso kido moro marach kata gidhi mos e puonjore wach moro maduong’? Non ane kaka Yesu ne opuonjo jootene. Nitie kinde ma ne gigwandore ahinya kendo ne ok gipuonjre mapiyo ber mar bedo joma bolore. Kata kamano, Yesu nohore mos kendo nowuoyo nyading’eny kuom ber mar bolruok. (Mariko 9:33, 34; Luka 9:46-48; 22:24, 25) Jonyuol maluwo ranyisi mar Yesu biro rieyo nyithindgi ka gihore mos, to ka dwarore, gibiro nwoyo puonjno nyaka nyithindo ng’e ber mar mako puonjno. *

3. Puonj kuom keto ranyisi maber. Jonyuol timo maber ka giluwo puonj ma jaote Paulo nochiwo ne Jokristo ma ne ni Rumi. Nondikonegi kama: “In mipuonjo ng’a machielo, dak ipuonjri iwuon? In miyalo ni kik ng’ato okwel, ikwelo koso?”—Jo Rumi 2:21.

Puonjno owinjore nikech gima ywayo nyithindo moloyo en gima jonyuol timo to ok gima giwacho. Kuom adier, jonyuol matimo kaka gipuonjo jobedo gi nyithindo maluwo gima jonyuol puonjogi.

4. Chak ka nyathi pod tin. Timotheo ma ne tiyo kaka jamisonari kaachiel gi jaote Paulo ne nigi nying maber ahinya e alwora ma ne odakie. (Tich Joote 16:1, 2) Achiel kuom gimomiyo nobedo gi nying maber ne en ni ‘nyaka oa e nyathi nong’eyo Ndiko Maler.’ Min Timotheo kaachiel gi dane ne ok osomone asoma Ndiko to ne gikonye bende ng’eyo kor adiera ma ne nitie ei wechego.—2 Timotheo 1:5; 3:14, 15.

Kama Inyalo Yudoe Kony

Joneno mag Jehova goyo buge mang’eny mondo okony jonyuol puonjo nyithindgi adiera e wi Nyasaye. Moko ogo mondo okony nyithindo matindo. Buge mamoko to nyalo konyo jonyuol koda nyithindgi ma rowere osik ka giwuoyo e yo mathuolo e kindgi. *

En adier ni mondo jonyuol opuonj nyithindgi e wi Nyasaye, dwarore ni gikwong ging’e dwoko mag moko kuom penjo matek ma nyithindgi nyalo penjogi. Kuom ranyisi, inyalo dwoko nade penjo machalo kaka maluwogi: Ang’o momiyo Nyasaye oweyo chandruok mondo obedie? Ang’o momiyo Nyasaye nochweyo piny? Jo motho ni kanye? Joneno mag Jehova diher konyi ng’eyo dwoko mag penjogo koda mag penjo mamoko mondo omi in kaachiel gi joodi usud machiegni gi Nyasaye.—Jakobo 4:8.

[Weche moler piny]