LESON 16
Ki Zezi Ti Fer Kan Li Ti lor Later?
Kan boukou dimounn mazinn Zezi, zot pans enn ti-baba, enn profet ki ena sazes, ouswa zot pans fason ki li’nn mor. Me eski nou kapav aprann plis lor li kan nou examinn seki li ti fer lor later? Dan sa leson-la, nou pou get sertin parmi bann kitsoz inportan ki Zezi ti fer ek kouma sa kapav ed ou.
1. Ki travay ti pli inportan pou Zezi?
Travay ki ti pli inportan pou Zezi, se “anons Bonn Nouvel Rwayom Bondie.” (Lir Lik 4:43.) Li ti anonse ki Bondie ti pou etabli enn Rwayom, setadir enn gouvernman, ki ti pou regle tou problem bann dimounn. a Pandan trwa-z-an edmi, Zezi ti travay bien dir pou anons bann dimounn sa mesaz bien ankourazan la.—Matie 9:35.
2. Kifer Zezi ti fer bann mirak?
Labib koz lor bann “mirak, mervey ek sign” ki Bondie ti fer par mwayin Zezi. (Zistwar Bann Apot 2:22) Bondie ti donn Zezi pouvwar pou kalme enn gran tanpet, pou nouri bann milye dimounn, pou geri bann malad, ek mem pou relev bann mor. (Matie 8:23-27; 14:15-21; Mark 6:56; Lik 7:11-17) Bann mirak ki Zezi ti fer, ti montre dan enn fason bien kler ki se Bondie ki ti avoy li. Sa ti montre osi ki Zeova ena pouvwar pou regle tou nou bann problem.
3. Ki nou kapav aprann ar fason ki Zezi ti viv?
Zezi ti fer tou seki so Papa ti demann li. (Lir Zan 8:29.) Li ti fer sa toutlong so lavi lor later, mem si boukou dimounn ti esey anpes li. Li ti montre ki mem dan bann sitiasion difisil, bann dimounn kapav servi Bondie. Alor, Zezi finn donn nou “enn lexanp pou [nou] swiv li.”—1 Pier 2:21.
ANOU GET INPE PLIS
Anou gete seki Zezi ti fer pou partaz bon nouvel ek ki bann mirak li ti fer.
4. Zezi ti partaz bon nouvel
Zezi ti mars bann santenn kilomet lor bann semin later, pou partaz bon nouvel ar maximum dimounn posib. Lir Lik 8:1, ek apre sa, get sa bann kestion-la ansam:
-
Eski Zezi ti pres zis ar bann dimounn ki ti rasanble pou ekout li?
-
Ki zefor Zezi ti fer pou rod bann dimounn?
Bondie ti predir ki Lemesi ti pou partaz bann bon nouvel. Lir Izai 61:1, 2, ek apre sa, get sa bann kestion-la ansam:
-
Kouma Zezi ti realiz sa profesi-la?
-
Eski ou panse ki bann dimounn azordi bizin tann sa bon nouvel-la?
5. Zezi ti donn bann konsey ki ena boukou valer
Zezi pa ti zis pres bon nouvel lor Rwayom Bondie, li ti osi donn bann bon konsey. Anou get de-trwa lexanp dan so Sermon lor Montagn. Lir Matie 6:14, 34 ek 7:12, ek apre sa, get sa bann kestion-la ansam:
-
Ki bann bon konsey Zezi ti done dan sa bann verse-la?
-
Eski ou panse ki sa bann konsey-la zot ankor itil azordi?
6. Zezi ti fer bann mirak
Zeova ti donn Zezi pouvwar pou fer boukou mirak. Par exanp, lir Mark 5:25-34 ouswa zwe VIDEO-la. Apre sa, get sa bann kestion-la ansam:
-
Ki kitsoz sa madam ki ti malad la ti krwar?
-
Ki kitsoz ou finn kontan avek sa mirak-la?
Lir Zan 5:36, ek apre sa, get sa kestion-la ansam:
-
Ki bann mirak Zezi “montre,” ouswa aprann nou lor li?
Eski ou ti kone?
Laplipar bann kitsoz ki nou kone lor Zezi sorti dan kat liv Labib ki nou apel bann Levanzil, setadir Matie, Mark, Lik, ek Zan. Sak ekrivin ti donn diferan detay lor Zezi. Kan nou met tou sa bann detay-la ansam, sa ed nou pou konpran pli bien lavi Zezi.
-
MATIE
ti ekrir so Levanzil an premie. Li ti met boukou laksan lor bann lansegnman Zezi, sirtou seki Zezi ti ansegne lor Rwayom Bondie.
-
MARK
ti ekrir pli tipti Levanzil. Li ti dekrir bann laktivite Zezi dan enn fason bien vivan.
-
LIK
ti montre ki lapriyer ti bien inportan pou Zezi ek kouma Zezi ti tret bann madam.
-
ZAN
ti koz boukou lor personalite Zezi. Li ti koz lor bann konversasion ki Zezi ti gagne avek so bann bon kamarad ek bann lezot dimounn.
SERTIN DIMOUNN DIR: “Zezi limem Bondie.”
-
Me ou, ki ou panse?
SEKI NOU’NN APRANN
Zezi ti pres lor Rwayom Bondie, ti fer bann mirak, ek ti touletan obeir Zeova.
Eski Ou Rapel?
-
Kan Zezi ti lor later, ki travay ti pli inportan pou li?
-
Ki bann mirak Zezi montre nou?
-
Ki bann bon konsey Zezi ti done?
DEKOUVER
Lor ki kitsoz Zezi ti plis koze?
“Rwayom Bondie—Kifer Li Inportan pou Jésus?” (Latour Degard, 1e Novam 2014)
Anou gete kifer nou kapav sir ki Zezi vremem ti fer bann mirak.
« Les miracles de Jésus : que vous enseignent-ils ? » (Latour Degard, 15 Ziliet 2004, an Franse)
Zezi pa ti egois. Gete kouma so lexanp finn sanz lavi enn misie.
Get bann kitsoz ki Zezi inn fer dan so minister dan lord ki sa finn arive.
“Levennman Prinsipal dan Lavi Jésus” (Enn Gid pou Pli Konpran Parol Bondie, seksion 4)
a Dan Leson 31-33, nou pou koz plis lor Rwayom Bondie.
Ena Osi
KESTION KI POZE SOUVAN
Ki sa Inplike Etidie Labib Avek Bann Temwin Zeova?
Bann Temwin Zeova ofer bann letid Labib gratis, ek ou kapav servi ninport ki version Labib ki ou anvi. Santi ou lib pou invit bann manb ou fami ouswa bann kamarad ki ou anvi.
