Non. Labib pa dir ki larzan li move, ni li pa dir ki larzan responsab pou tou bann move kitsoz ki arive. Souvan nou tann sa lexpresion-la: “Larzan samem rasinn tou lemal.” Sa sitasion-la sorti dan Labib, me li pa konple ek li kapav tronp nou. Seki Labib vremem dir se: “Kontan larzan samem rasinn tou lemal.” a​—1 Timote 6:10, Nouvo Testaman dan Kreol Morisien, NTKM.

•  Ki Labib dir lor larzan?

•  Kifer Labib averti nou pou pa kontan larzan?

•  Ki bienfe nou gagne kan nou aplik bann konsey ki Labib done lor larzan?

•  Bann verse Labib lor larzan

 Labib fer konpran ki si servi larzan avek sazes, li pou itil ek li kapav “enn proteksion.” (Ekleziast 7:12) Anplis, Labib koz an bien lor bann ki zenere anver lezot, ek sa konsern osi bann don.​—Proverb 11:25.

 Me Labib osi averti nou ki fode pa met larzan an premie dan nou lavi. Li dir: “Ki lamour pou larzan pa determinn zot lavi, kontant zot avek seki zot ena.” (Ebre 13:5, NTKM) Leson ki nou tire se les larzan dan plas ki bizin ek pa galoup deryer larises. Me plito kontant nou avek seki nou bizin, kouma manze, linz ek lakaz.​—1 Timote 6:8, NTKM.

 Bann ki gourman larzan pa pou gagn lavi pou touletan. (Efezien 5:5, NTKM) Kifer? Enn rezon se parski lanvi pou gagn plis larzan se enn form lidolatri ouswa enn fos ladorasion. (Kolosien 3:5, NTKM.) Enn lot rezon, se ki kan bann dimounn fer zefor pou satisfer zot dezir, souvan zot abandonn zot bann bon prinsip. Proverb 28:20 dir ki “enn kikenn ki pe prese pou vinn ris, pa pou res inosan.” Zot kapav tante pou fer bann krim kouma: Fer santaz, menas enn lot dimounn pou gagn kas, fer frod, kidnap enn kikenn, ouswa touy enn dimounn.

 Mem si kontan larzan pa pous enn kikenn pou ena bann move manier, li kapav ena enn move lefe. Labib dir: “Me bann ki anvi vinn ris, zot tom dan tantasion. Zot bann move dezir met zot dan latrap.”​—1 Timote 6:9, NTKM.

 Si nou pa al kont nou bann valer moral ek spiritiel zis pou gagn plis larzan, sa pou fer nou gagn plis konfians an noumem ek osi nou pou gagn led ek faver Bondie. Bann ki fer Bondie plezir avek tou zot leker, Bondie fer zot sa promes-la: “Zame mo pa pou kit twa, ni abandonn twa.” (Ebre 13:5, 6, NTKM) Li rasir zot ki “enn dimounn fidel, pou gagn boukou benediksion.”​—Proverb 28:20.