1. Isiyani inniiriha upanka citthu coohinamaana awula comaana?

 ATTHU akhwaawe anonswalela Yehova apattisiye khalayi ni ahaavo apattisiye mphiyaaruni. Masi hataa ukhalaka wiira nipattisiye khalayi awula mphiyaaruni, otheene cihu ninneekurumica ukhalana meettelo anontteeliha nrima Yehova. Wiira nikhitiri upanka iyo itthwiiyo, isiiryaaya ukhanle wiikurumica ukhalana moopuwelo omaana, kontha citthu cinoopuweleehu pooti uniiriha upanka citthu comaana awula coohinamaana. Nakhalaka nuupuwelaka citthu coohinamaana, nimmalela upanka citthu coohinamaana. (Efesu 4:17-19) Masi nakhalaka nuupuwelaka citthu comaana, khunhala unirika wuuluma ni upanka citthu cinoncivela Yehova.—Akalas. 5:16.

2. Makohoni anhaleehu waakhula nhina ula mwahoola?

² Khampa ciitthucileehu nhina mwaha uvinre, hi khaninhala ukhitiri ukhala woohiniphwanya hataa moopuwelo oohinamaana. Masi ninaakhitiri wiivaraca wiira nihipanke citthu coohinamaana cinhala uniphwanya mmuru wihu. Itthu yoopacera inhala unikavihera uhiya meettelo okhalayi ukhanle uhuuluma ni uhipanka citthu cinonrusa Yehova; ni nnyo cikhanle citthu cinlamuliyeehu uhiya upanka nihinaaya upattisiya. Masi wiira khweeliini nintteelihe nrima Yehova, ihaavo itthu ikhwaawe inlamuliyeehu upanka: nihaana ‘niiwarihaka meettelo ophiyaaru.’ (Akol. 3:10) Nhina ula mwahoola, ninhala waakhula ala makohwaala: “Meettelo ophiyaaru” isiyani? Isiyani inlamuliyeehu upanka wiira nikhalane meettelo ophiyaaru ni nihihiye uthoonyera ayo meettelwaayo?

3. Khampa cinthoonyeraaya Akalasiya 5:22, 23, “meettelo ophiyaaru” isiyani, ni manannani ntthu cinthoonyeraawe ayo meettelwaayo?

³ “Meettelo ophiyaaru” ankhala mananna o wuupuwela ni upanka citthu khampa Yehova cimpheelaawe. Ntthu nothoonyera meettelo ophiyaaru naakhalana makhalelo o nnepa wowaarya  wa Nluku ni naahiya wiira uyo nnepooyo weettihere citthu cimpankaawe ni cinoopuwelaawe. (Nsome Akalasiya 5:22, 23. *) Wootakihera, ntthu nothoonyera meettelo ophiyaaru nanfenta Yehova ni nawaafenta mayamunnaawe o wanlokoni. (Mat. 22:36-39) Uyo khanhiya utteeliya nrima, hataa ukhalaka wiira ahomphwanya masakha. (Tiya. 1:2-4) Uyo nawiikurumica ukhalakhala ninnema naakhunanawe. (Mat. 5:9) Uyo nokhala ntthu oopisa nrima ni namaana. (Akol. 3:13) Uyo cinancivela ni naapanka citthu comaana. (Luka 6:35) Citthu cotheene cimpankaawe cinaathoonyera wiira uyo naamwaamini cinene Yehova. (Tiya. 2:18) Nlattu wo wiivaraca, uyo apaciyaka khanaakuva urusiya.—1 Akor. 9:25, 27; Titu 3:2.

4. Nlattuni nineereehu wiira makhalelo anhimiya nhina Akalasiya 5:22, 23 ni makhwaawe anhimiya mbiiblyani khari khampa ikuwo cinwareehu imoca-imoca?

⁴ Wiira nithoonyere meettelo ophiyaaru, nihaana niikurumicaka uthoonyera makhalelo otheene anhimiya nhina Akalasiya 5:22, 23 ni makhalelo anoolumiya nhina miphantte cikhwaawe co mbiiblyani. * Ayo makhalelwaayo khari toko ikuwo cinwareehu imoca-imoca, masi anaavaranaca nimakhalelo makhwaawe. Wootakihera, wakhala wiira nyuuva nnanfenta nkhunaninyu, nnaahala umpisera nrima ni unthoonyera unamaana. Ni wiira nikhale atthu khweeliini ooreera nrima, nihaana nithoonyeraka unamaana ni ukhala atthu owiivaraca.

5. Ukhalana “moopuwelo a Kristu” maanaaya isiyani, ni nlattuni unreeraaya usoma makhalelo a Yesu? (Nwehe 1 Akorintu 2:16.)

⁵ Nsome 1 Akorintu 2:16. * Wiira nikhitiri uthoonyera meettelo ophiyaaru, nihaana nikhalanaka “moopuwelo a Kristu.” Maanaaya wiira nihaana nicuwelaka mananna Yesu cinoopuwelaawe ni wiikurumica untakiha. Yesu anthoonyera makhalelo otheene o nhokorokho wo nnepa wowaarya. Khampa iloola cinooniheraaya ratta ikhove ya ntthu, Yesu aanaathoonyera sana-saana makhalelo a Nluku. (Mabere. 1:3) Noopuwelaka khampa Yesu cinoopuwelaawe, khunhala unirika untakiha ni uthoonyera meettelo yaarinaawe.—Afili. 2:5.

6. Citthuni ninlamuliyeehu wuupuwela nhina uthoonyera makhalelo ophiyaaru?

⁶ Niireke khweeliini ninaahala ukhitiri untakiha Yesu? Atthunaka nyuuva nnoopuwela co:  ‘Yesu aari ntthu oohimatampi. Mi akinhala ukhitiri ukhala toko uyova caaryaawe.’ Wakhala wiira commo phinoopuweleenyu, muupuwele nnya citthunnya: Yoopacera, hi numpiye nimananna ninkhitiriihu uthoonyera makhalelo arinaawe Yehova ni Yesu. Phimaana, ninaahala ukhitiri waatakiha ni mpaka usaalattanana. (Upha. 1:26) Yonayeeli, nihaana nuupuwelaka wiira nnepa wowaarya wa Nluku ikhanle ikuru yuulupale ihinlikananiya. Nnyo ikurunnyo pooti unikavihera upanka citthu cahaahaleehu ukhitiri upanka veekha. Yoneeraru, Yehova naacuwela wiira nna co nyuuva khannohala ukhitiri uthoonyera makhalelo omaana woohivonyaniha. Phimaana, uyo naahala waavaha myaakha 1.000 ale anweherera ukhala upeephoni wiira akhale atthu oohipahuwa. (Apoka. 20:1-3) Masi Yehova nopheela wiira otheene cihu niikurumice ni ninkhuluvele wiira uyova naahala unikavihera.

7. Isiyani impheeleehu woopela mwaha vano?

⁷ Masi isiyani yaapankaawe Yesu inlamuliyeehu untakiha? Nttwee noone mananna Yesu caathoonyenryaawe makhalelo macese o nhokorokho wo nnepa wowaarya ni isiyani hiiva ineetthuceehu nhina mananna Yesu caathoonyenryaawe ayo makhalelwaayo. Ciicammo, nimpheela woona citthu cinhala unikavihera untakiha ratta Yesu ni uthoonyera makhalelo ophiyaaru.

8. Yesu thoonyenre cani nifento nawe?

⁸ Yesu aananfenta cinene Yehova. Phimaana aheevaherera wiira apanke itthu yaapheelaaya Athumwaane ni wiira anoopole hiiva. (Joau 14:31; 15:13) Makhalelo yaarinaawe Yesu va watuninyani va, ahothoonyera wiira uyo khweeli nawaafenta cinene atthu. Khula nihuku, Yesu aanaathoonyera waafenta ni uwoonela ikiriri atthu otheene, hataa ni ale yanlupattha. Yesu ahothoonyera wiira aanawaafenta atthu kontha aheevaherera uwiitthuciha myaha co Umwene wa Nluku. (Luka 4:43, 44) Ciicammo, nlattu Yesu wonfenta Nluku ni wowaafenta cinene atthu, ahokupali uvaha ukumyaawe, uhuvihiya ni wiiviya naatakhali. Ni nlattu Yesu woopanka iyo itthwiiyo, otheene cihu pooti uphwanya ukumi woohimala.

9. Ninhala uthoonyera cani nifento khampa Yesu?

⁹ Hi ninawaafenta cinene Apaapeehu Yehova, mpaka nihaavaha ukumiihu ni nihopattisiya. Vano, nihaana nithoonyeraka wiira khweeli ninanfenta Yehova naawaceraka saana akhunanihu. Apostolu Joau hantikha co: “Ule hinonfenta munnaawe nomoonaawe, khawanoorannya unfenta Nluku, ule himmoonaawe.” (1 Jo. 4:20) Phimaana, nihaana niikohaka co: ‘Kinawaafenta khweeli akhunanaka? Kinawaawacera ratta akhwaaka, hataa yakipankaka itthu yootakhala? Kinaaleva ukatyaaka ni citthu cirinaaka wiira kaakavihere akhunanaka uncuwela Yehova? Kinnolalya moolumo a Nluku hataa atthu enci yoonaka uhikhalana ifayita ni hataa yakilupatthaka? Kihaana kuncereraka ukati unvirihaaka kilalyaaka ni kiitthucihaka moolumo a Nluku?’—Efesu 5:15, 16.

10. Manannani Yesu caathoonyenryaawe ukhala nannema?

¹⁰ Yesu aari nannema. Ahuvihiyaka, uyo khaahokolosera atthu yanhuviha. Uhiya commo, uyo aanawaakurumica atthu ummaliha nanrokottole ni ukhalakhala ninnema. Uyo heetthuciha wiira ntthu apheelaka untteeliha nrima Yehova, khanlamuliya unkhalana nanrokottole ni mayamunnaawe. (Mat. 5:9, 23, 24) Ni khula ikwaha attharyaawe waanyakulihanaaya wiira acuwele tipani aari muulupale, Yesu aanawaakavihera ummaliha nanrokottole.—Luka 9:46-48; 22:24-27.

11. Ninhala uthoonyera cani ukhala anannema?

¹¹ Wiira nikhale anannema, khuntosa paahi unyema unkumihaca nanrokottole. Nihaana niikurumicaka ummaliha nanrokottole rineehu ni nkhunanihu, ni waakurumica mayamunneehu upanka itthu imocaaru. (Afili. 4:2, 3; Tiya. 3:17, 18) Niikohe co: ‘Kinnaamini ummaliha nanrokottole rinaaka ni nkhunanaka? Munna awula  nuunu o wanlokoni akitthekelaka kinancukula? Khula ikwaha intthekeliyaaka, kimmakelaka unweherera ntthuuyo uwa ukuulumana wiira nimmalihe nanrokottole? Awula kinaarwaa umuulumana hataa kicuwelaka wiira thi mi kirina isariya? Kacuwelaka wiira munna awula nuunu o wanlokoni haana nanrokottole ni ntthu nkhwaawe, kinankurumica urwaa umuulumana uyo ntthuuyo wiira ammalihe nanrokottole?’

12. Yesu aathoonyenre cani ureera nrima?

¹² Yesu aari nlopwana ooreera nrima. (Mat. 11:28-30) Uyo aathoonyera ureera nrima wawe aawaceraka saana atthu otheene, hataa ukati waakhalaawe nimasakha. Wootakihera, athiyana o Fenícia wanlepenlyaaya Yesu wiira anvonihe mwanaya, uyo khaawaakhunle pusya. Woopacera, Yesu ahokhotta upanka itthu yanlepelaaya. Masi ukati wonnyaawe wiira ayo athiyanaayo yahaana waamini woolipa, uyo ahonvoniha mwanaya. (Mat. 15:22-28) Yesu aari ntthu ooreera nrima, masi khaahiya unhimerya ntthu awula unvaha ikano amoonaka wiira hovonya. Ukati nkhwaawe, uyo aathoonyera ureera nrima wawe, aahimeryaka woohaakhuwakhuwa atthu yaafentaawe. Wootakihera, ukati Peturu waamwiirenlyaawe Yesu wiira hivaherere ukumyaawe ni hiiviye, Yesu ahompwapwela Peturu atthari otheene yamoonaka. (Mark. 8:32, 33) Yesu khaapankile iyo itthwiiyo wiira amoonihace ihaaya Peturu, masi aapheela unlaka ni waathoonyera atthari akiinaayo wiira khayaalamuliya utepa wiikhuluvela. Peturu atthunaka wahomuula muru, masi waanamphwanela ulakiya.

13. Ninhala uthoonyera cani ureera nrima?

¹³ Napheelaka ukhala atthu ooreera nrima, ukati nkhwaawe nihaana naahimeryaka akhunanihu woohaakhuwakhuwa. Ukati wonhimerya ntthu vonyale, muntakihe Yesu ni munvahe uyo ntthuuyo ikano co mbiiblyani. Mmuulumane ratta. Nkupali wiira ale anonfenta Yehova ni anaafenteenyu anaapheela upanka citthu comaana ni anaahala wiiwelela ikano impheeleenyu waavaha. Mwiikohe co: ‘Koonaka wiira ntthu nonfentaaka hopanka itthu yoohinamaana, kinaalipa nrima wiira kimuulumane? Kapheelaka unhimerya ntthu awula unvaha ikano, kinaamuulumana ratta awula kinaatepa ucaca? Isiyani inkiiriha unvaha iyo ikannweeyo? Kinonvaha iyo ikannweeyo nlattu woorusiya nuuyo ntthuuyo, awula nlattu woopheela umoona akhalaka saana?’

14. Nlattuni Yesu waapankelaawe citthu comaana akhunanawe?

¹⁴ Yesu khaakurumica atthu upanka citthu comaana paahi; uyova mwaneene ampanka. Nlattu wo waafenta Athumwaane, Yesu aanawaapankela atthu citthu comaana ni aapanka niiraati. Ntthu nontakiha Yesu nawaapankela citthu comaana akhwaawe woohiweherera wiireliya. Wiira nintakihe Yesu, khuntosa paahi upanka citthu comaana, masi nihaana nipankaka niiraati. Masi atthunaka nyuuva nnawiikoha co: ‘Upanka citthu comaana niiraati maanaaya wiira cani?’ Wootakihera, Yesu ahowuuluma atthu yaakawela amasikhini icimoola waatthuni. Ayo yaapanka iyo itthwiiyo kahi niiraati, masi yaapanka wiira yooniye ni attottopeliye. Maweherwaawe Yehova, upanka itthu yomaana woohiraati unaalikanaca ni uhipanka itthu.—Mat. 6:1-4.

15. Wiira itthu yomaana yaapankenleehu akhwiihu ikhalane ifayita, isiyani ihinlamuliyeehu uweherera?

¹⁵ Wiira itthu inaapankeleehu akhwiihu ikhalane ifayita, nihaana naapankelaka iyo itthwiiyo woohiweherera waakhela itthu. Mwiikohe co: ‘Mi kinaapheelaka waapankela akhwaaka itthu yomaana, masi kinaahiya upanka iyo itthwiiyo? Isiyani khweeliini inkiirihaka waapankela citthu comaana akhwaaka?’

16. Isiyani inlamuliyeehu upanka khula nihuku, ni nlattuni?

¹⁶ Hiiva khaninlamuliya wuupuwela wiira ninlamuliya uthoonyera meettelo ophiyaaru mpaka wampattisiyeehu paahi. Hataa ukhalaka wiira  nihopattisiya, khaninlamuliya uhiya uthoonyera meettelo ophiyaaru. Wiira nihihiye uthoonyera meettelo ophiyaaru, nihaana nitothaka uthoonyera makhalelo onnepa wowaarya khula nihuku. Nhiliyale wiira Yehova khanle Nluku oohinyoonyaciya, ni nnepaawe wowaarya ikhanle ikuru ihinhiya uvara nteko. (Upha. 1:2) Phimaana, khula ikhalelo yo nnepa wowaarya ihaana iniirihaka upanka itthu. Wootakihera, Tiyaku enre co: “Waamini woohivareliya nteko unkhala waamini wookhwa.” (Tiya. 2:26) Naahithoonyereke makhalelo o nnepa wowaarya wa Nluku, ayo makhalelwaayo anhala ukhala ookhwa. Khula ikwaha inthoonyereehu makhalelo o nhokorokho wo nnepa wowaarya, hi ninawoonihera wiira nnepa wowaarya wa Nluku unaanikavihera.

17. Isiyani inlamuliyeehu upanka wanihukuni naahikhitiriki uthoonyera makhalelo o nhokorokho wo nnepa wa Nluku?

¹⁷ Hataa ntthu pattisiye khalayi haana ipahuwa ni ukati nkiina naavonyihaka uthoonyera makhalelo o nhokorokho wo nnepa wowaarya wa Nluku. Masi itthu yuulupale ukhanle uhihiya wiikurumica. Muupuwele nna ntakiheronna: Yaahuwaka vakaani ikuwo inoocivelani cinene, nnaahala uriha iyo ikuweeyo? Mena! Nyuuva nnaahala uttottha nipuro naahuwilyaaya ni nnaahala wiikurumica wiira ihaahuwe-tho. Inanna imocaaru, wakhalaka wiira nihaavo nihuku nihinhaleenyu ukhitiri unwacera ratta ni unfenta ntthu, nhoocye. Mwiikurumice ummaliha nanrokottole nuuyo ntthuuyo ni munlepele nsammaha. Upanka commo unaahala wuukaviherani uhokoleela ukhalana upatthani womaana nuuyo ntthuuyo. Ni mwiikurumice wiira iyo itthwiiyo ihiirannye-tho.

18. Isiyani inlamuliyeehu ukupali?

¹⁸ Khweeliini, unaareera ukhalana ntakihero nomaana na Yesu wiira nitakihe! Neekurumicaka wuupuwela khampa uyova coopuwelaawe, unaahala utepa uhinirika untakiha. Ni nantakihaka Yesu, ninaahala uthoonyera meettelo ophiyaaru. Nhina ula mwahoola, nihoona makhalelo macese o nhokorokho wo nnepa wowaarya wa Nluku. Nnoonela cani ukumiha ukati wiira nsome makhalelo makhwaawe o nnepa wowaarya wa Nluku ni wuupuwelaca mananna oothoonyera ayo makhalelwaayo? Nhina Guia de Pesquisa para as Testemunhas de Jeová, nyuuva nnaahala uphwanya myaha cinci cinooluma ayo makhalelwaayo. Nrwee mphantte wantikhiye “Vida cristã,” ni ntothe vathi waya “Fruto do espírito.” Nkupali wiira mweekurumicaka, Yehova naahala wuukaviherani uthoonyera makhalelo ophiyaaru nenna co mpaka uhoolo unkeleehu.