Cahaavo miteko cinci caavaraaya malevita yahaari anankuttho. Nteko mmoca waavaraaya waari ukhala mapoliisiya o watempulu. Ayo yaahooleliya ni ntthu aavahaceriye uhoolela miteko co watempuluni. Namantikha nyuuta Fílon naahimya nteko waakhalanaaya ayo akhalenlyaayo: “[Malevita] akiina anaaweesiya mmamikhorani. Akhwaawe ankhala nipuro niri [ipuwa yotempulu], uhoolo waya itempulu, wiira ankhottihe khula ntthu nhala upheela ukela nipuro nowaarya hitthuniheriye, hataa hicuwelaka awula hataa apheelaka ukela imweeni. Akhwaawe ankhala yeettakacaka nipuro niri ipuwa yotempulu ni anaavirihana ukhalenla uthana ni uhiyu.”

Itiripunali ya ayuuta pooti waalepelaaya ayo mapoliisiyaayo wiira yaakavihere. Ni mapoliisiya o watempulu paahi phaari ikhurupu ya ayuuta yaatthuniheriya naahooleli o Roma uweettana asoowa awula ikatana.

Toko cihimyalyaawe namasoma mmoca neehaniya Joachim Jeremias, “moolumo a Yesu ukati waawiirenlyaawe ale yaawaale untthuka, wiira uyova aakhala utempulu khula mahuku eetthucihaka masi khayantthuka, khanrika wiiwannya wakhalaka wiira Yesu aawaaca mapoliisiya o watempulu.” (Mat. 26:55) Uyo namasomooyo ciicammo nkupali wiira alopwana yaarumiye ukati nkiina wiira yantthuke Yesu yaari mapoliisiya o watempulu. (Joau 7:32, 45, 46) Wahoolo, itiripunali ya ayuuta yahonruma nhooleli o miteko co watempulu wiira akhume wamoca naakhalenli ni yaarweele atthari a Yesu. Ni unoonannya wiira ayo mapoliisiyaayo phanpurulacale apostolu Paulu yamoomolaka watempulu.—Mite. 4:1-3; 5:17-27; 21:27-30