Meñe ejjab juon bokin taktõ, ak Baibõl̦ eo ej letok naanin tõl ko me remaroñ jipañ kõj im jemaroñ bõk tokjãn jãni. Naanin tõl kein remaroñ jipañ juon armej eo me ewõr an nañinmej ko me rej jelõt kõl̦mãnl̦o̦kjen̦ eo an. Jen lale jet waanjoñak ko.

“Ro rãjmour rejjab aikuji juon taktõ, ro renañinmej wõt.”—MATU 9:12.

Baibõl̦ eo ej ba bwe jemaroñ aikuj in kappok jipañ ñe ej itok ñan ad taktõ. Elõñ armej ro me ewõr aer nañinmej ilo kõl̦mãnl̦o̦kjen̦ em̦õj ear bõk jipañ ikijjeen aer kar katak kõn mel̦el̦e ko rejejjet kõn apañ ko aer im ikijjeen aer kar etal im taktõ.

‘Ñe juon ej kãjjimourur ãnbwinnin . . . ewõr tokjãn.’—1 TIMOTE 4:8, ftn.

Ñe kwõnaaj kõm̦m̦an iien im kammineneik eok ñan kõm̦m̦ani men ko renaaj kãjmour ãnbwinnũm̦, men in emaroñ jipañ eok kakõm̦anm̦anl̦o̦k nañinmej eo am̦ ilo kõl̦mãnl̦o̦kjen̦. Imminene kein kwõmaroñ kõm̦m̦ani ej kitibuj am̦ keini am̦ exercise, m̦õñã m̦õñã ko reuõne, im am̦ kabwe awa in am̦ kiki.

“Juon bõro em̦õn̦õn̦õ ej ãinwõt uno em̦m̦an; a bõro erup ej kajeik di ko dien.”—JABÕN KÕNNAAN 17:22.

Am̦ riiti men ko rekõketak ilo Baibõl̦ im am̦ kõm̦m̦an mejãnkajjik ko kwõmaroñ tõpari, men in emaroñ jipañ eok bwe kwõn maroñ dãpij wõt am̦ m̦õn̦õn̦õ. Ñe kwõj kate eok ñan bõk wõt l̦õmn̦ak ko  rejim̦we im tõmak bwe ewõr am̦ kõjatdikdik bwe aolep men renaaj em̦m̦anl̦o̦k ilju im jekl̦aj, men in enaaj jipañ eok bwe kwõn maroñ kijenmej ium̦win apañ ko kwõj iiooni jãn nañinmej eo am̦ ilo kõl̦mãnl̦o̦kjen̦.

“Jel̦ãl̦o̦kjen̦ ej pãd ippãn ro ettã bũrueer.”—JABÕN KÕNNAAN 11:2.

Bõlen kwõmaroñ kile bwe kwõjjab maroñ make kõm̦m̦ani aolep men ko kokõn̦aan kõm̦m̦ani, kõn men in kwõj aikuj in m̦õn̦õn̦õ in bõk jipañ jãn ro jet. Ro m̦õttam̦ im baam̦le eo am̦ remaroñ kõn̦aan jipañ eok, bõtab remaroñ jab jel̦ã ta eo ren kõm̦m̦ane. Kõjjel̦ãik er kõn ta eo me enaaj l̦aptata an jipañ eok. Jab kõtmãne bwe renãj kõm̦m̦ani aolep men ñan kwe, im aolep iien kwõn kwal̦o̦k am̦ kam̦m̦oolol er kõn jipañ ko aer.

“Ikar eñjake bwe ekar wõr juon men ejjab em̦m̦an ilo ãjmour eo aõ, kõn men in iar lol̦o̦k juon taktõ. Taktõ eo ear maroñ jel̦ã ta nañinmej eo aõ. Men in ear jipañ eõ ñan kile bwe em̦ool wãween eo ij pãd ie im ñan katak kõn kein kõm̦adm̦õd ko repel̦l̦o̦k bwe in maroñ jel̦ãl̦o̦k kilen lale ãjmour e aõ.”—Nicole, a eo me ej eñtaan jãn nañinmejin bipolar disorder.

“Em̦õj aõ lo bwe aõ ekkeini aõ riiti Baibõl̦ eo ippãn lio ippa ej jipañ eõ bwe in maroñ bõk l̦õmn̦ak ko rejim̦we im rekõketak ilo jinoin juon raan. Im ilo raan ko me ekkã an pen aõ kõm̦adm̦õd nañinmej e aõ, ekkã an juon eoon tõpar bũruõ.”—Peter, eo me ej eñtaan jãn nañinmejin depression.

“Ebwe an kar pen aõ kõnono ñan ro jet kõn nañinmej eo aõ kõnke iar lukkuun jook. Ak ear wõr juon m̦õtta me ekar lukkuun roñjake ña im ear kajjioñ in mel̦el̦e kõn eñjake ko aõ. Ear lukkuun jipañ eõ bwe en em̦m̦anl̦o̦k aõ mour im bwe in bõk eñjake eo bwe ijjab make iaõ.”—Ji-yoo, eo me ej eñtaan jãn nañinmejin eating disorder.

“Baibõl̦ eo ear jipañ eõ bwe in maroñ bõk l̦õmn̦ak ko rejim̦we ñe ej itok ñan jerbal im kakkije. Mãlõtlõt eo ilo Baibõl̦ ear jipañ eõ bwe in maroñ kijenmej ium̦win apañ ko ij iiooni jãn eñjake ko me rej kaeñtaan eõ.”—Timothy, eo im ej kijenmej wõt kõn nañinmejin obsessive-compulsive disorder.