Aet, ewõr enjel̦ ak jetõb ro renana. Rein rej itok jãn ia? L̦õmn̦ak kõn an Anij kar kõm̦anm̦an enjel̦ ro im lel̦o̦k anemkwõj in kããlõt ñan er. Ãlikin wõt an kar Jeova kõm̦anm̦an em̦m̦aan im kõrã eo m̦oktata, Adam im Iv, enjel̦ eo eweeppãn ear kõjekdo̦o̦n anemkwõj in kããlõt eo an im jum̦ae Anij. Ear lo tõprak ilo an kar kapo Adam im Iv bwe ren jum̦ae Anij. (Jenesis 3:1-7; Revelesõn 12:9) Baibõl̦ ejjab kwal̦o̦k etan kar enjel̦ in jinointata im ta kar jerbal eo an ke ear pãd ilañ m̦okta jãn an jum̦ae. Ak ãlikin an kar jum̦ae, elukkuun jim̦we an Baibõl̦ n̦aetan Setan, eo im ej mel̦el̦ein “Rijum̦ae,” im Tepil̦ ej mel̦el̦ein “Riruruwe.”​—Matu 4:8-11.

Ekabũrom̦õjm̦õj bwe ejjab enjel̦ in wõt ear jum̦ae. Ilo raan ko an Noa, ewõr jet enjel̦ ro im rar ‘ilo̦k jãn ijo jikier’ im jãn baam̦le eo an Anij ilañ. Rar wanlal̦tak ñan lal̦ in im ukot m̦õraer ñan armej bwe ren kõm̦m̦ani m̦anit ko rettoon, ak ejjab kar eñin karõk eo an Anij ke ear kõm̦anm̦an er bwe ren pãd im mour.​—Jud 6; Jenesis 6:1-4; 1 Piter 3:19, 20, UBS.

Ta eo ear wal̦o̦k ñan enjel̦ rein renana? Ke Anij ear bõktok ibwijleplep eo ñan jol̦o̦k aolep ro renana ilo lal̦ in, enjel̦ rein rar ukot m̦õraer ñan jetõb im jepl̦aak ñan lañ. Bõtab, Anij ear jab kõtl̦o̦k bwe enjel̦ rein renana ren bar jepl̦aak ñan ‘ijo jikier.’ Ijello̦kun an kar kõm̦m̦ane men in, ear likũt er n̦a “ilowaan ro̦ñin marok ko,” im kar n̦aetan ijin Tartarus. (Jud 6; 2 Piter 2:4) Enjel̦ ak jetõb rein renana rar make kõtl̦o̦k bwe ren pãd ium̦win tõl eo an Setan Tepil̦ eo, eo im ej “irooj in tim̦on̦ ro,” me ej “ukot e make bwe en ãinwõt juon enjel̦ in meram.”​—Matu 12:24; 2 Korint 11:14, UBS.

Baibõl̦ ej katakin kõj bwe Aelõñ eo an Anij ear jino jutak ilo iiõ eo 1914. * (Lale kõmel̦el̦e eo itulal̦.) Ãlikin wõt kar iien in, kar jolal̦tak Setan im tim̦on̦ ro an ñan ijin ioon lal̦. Im ilo an l̦apl̦o̦k wõt nana im m̦anit ko rettoon ilo lal̦ in, men kein rej kaalikkar bwe Setan im enjel̦ ro renana rej pãd ijin ioon lal̦ im rekõn̦aan ko̦kkure aolep armej.​—Revelesõn 12:9-12.

Bõtab ilo an l̦apl̦o̦k wõt men ko renana, men in ej bar kaalikkar bwe epaak jem̦l̦o̦kin an Setan im enjel̦ ro an renana tõl ilo lal̦ in. M̦õttan jidik, aolep wãween jerbal ko me enjel̦ ak jetõb rein renana rej kõm̦m̦ani renaaj jako. Ãlikin 1,000 iiõ in an naaj Aelõñ eo an Anij tõl armej ro ilo pedetaij eo ijin ioon lal̦ ium̦win, naaj bar kõtl̦o̦k jidik iien bwe enjel̦ rein renana ren mãlejjoñe armej ro naaj ijin ioon lal̦. Innem ãlikin iien in, naaj ko̦kkure er im renaaj jako ñan indeeo.​—Matu 25:41; Revelesõn 20:1-3, 7-10.