Ejim̦we ke an kar Devid ba bwe Anij ej l̦õmn̦ak kake e? Ak kwe, Anij ej ke l̦õmn̦ak kake eok? Epen an elõñ armej tõmak bwe el̦ap an Anij eo ekajoor bõtata itoklimoen im kea kake er. Etke?

Juon un ej kõnke rej ba bwe Anij ej juon jetõb im eutiejl̦o̦k jãn er. Joñan an utiej, aolep aelõñ ko ilo lal̦ in ‘rej ãinwõt piliñliñ in juon bakõj, im ãinwõt bũñal ilo juon kein bo̦un.’ (Aiseia 40:15) Ekkar ñan juon rijeje me ejjab tõmak ilo Anij ej ba: “Ñe armej ro rej ba bwe Anij ej l̦õmn̦ak kake er im kea kõn ta ko rej kõm̦m̦ani, rein rej l̦õmn̦ak bwe reutiej ak rej l̦õmn̦ak kõn er make.”

Ro jet rej ba bwe unin Anij ejjab l̦õmn̦ak kake er ej kõnke rar kõm̦m̦ani men ko renana. Ñan waanjoñak, juon em̦m̦aan etan Jim ej ba: “Enañin aolep iien ij jar ñan Anij bwe in kõm̦m̦an aenõm̦m̦an im in jel̦ã dãpij aõ illu, ak eitok wõt bwe in illulu. Kõn men in, iar l̦õmn̦ak bwe ña armej nana im Anij eban jipañ eõ.”

M̦ool ke bwe Anij ettol̦o̦k jãn kõj im ejjab l̦õmn̦ak kake kõj? Ta l̦õmn̦ak eo an kõn kõj armej? El̦aññe Anij ear jab letok mel̦el̦e ko kõn e ñan kõj, jeban kar maroñ jel̦ã kõn uwaak ko ñan kajjitõk kein. Bõtab, Anij ear letok Baibõl̦ bwe jen maroñ jel̦ã bwe ej l̦õmn̦ak kake kõj im kaorõk kõj kajjojo. Baibõl̦ ej ba bwe Anij “ejjab ettol̦o̦k jãn kõj otemjej.” (Jerbal 17:27) Ilo katak ko tok jet, jenãj etale jet eoon im lale ta ko Anij ear kõm̦m̦ani ñan kaalikkar bwe ej l̦õmn̦ak kake kõj kajjojo.