Pijaikl̦o̦k m̦õk an juon jemãn bwebwenato ippãn l̦addik eo nejin me 7 an iiõ. Ej ba, “Etto im etto, Anij ear kõm̦anm̦an lal̦ in im aolep men ko ie. Ear kõm̦anm̦an al̦, allõñ, im iju ko.” L̦addik eo ej l̦õmn̦ak jidik im kiiõ ej kajjitõk, “Baba, wõn ar kõm̦anm̦an Anij?”

Jemãn ej uwaake im ba, “Ear baj wõr wõt Anij, ejjel̦o̦k ear kõm̦anm̦ane.” Kõnke l̦addik in ej dik wõt, emaroñ kajju errã ilo uwaak in. Ak el̦ak rũttol̦o̦k, ej bar jino l̦õmn̦ak kõn kajjitõk in. Ej kile bwe epen an mel̦el̦e ewi wãween an juon pãd ak ejjel̦o̦k ear kõm̦anm̦ane. Kõnke ñe baj lañ im lal̦, ewõr juon ear kõm̦anm̦ani. Innem ej l̦õmn̦ak ippãn make, ‘Anij ear itok jãn ia?’

Ewi wãween an Baibõl̦ eo uwaake kajjitõk in? Eokwe ejjel̦o̦k oktak jãn uwaak eo an jemãn l̦addik eo. Moses ear je: “Irooj, . . . m̦okta jãn am̦ kar kõm̦anm̦an lal̦ in, im tol̦ ko ie, kwe kwõj Anij indeeo, ejjel̦o̦k jinoum̦ im ejjel̦o̦k jem̦l̦o̦kũm̦.” (Sam 90:1, 2, UBS) Rũkanaan Aiseia ear bar ba: “Kwaar jab jel̦ã ke? Kwaar jab roñ ke? Anij eo ej ñan indeeo, Jeova, rũkõm̦anm̦an jabõn ko jabõn lal̦”! (Aiseia 40:28) Bareinwõt, bokin Jud ej ba bwe Anij ear pãd m̦okta “jãn epepen ko otemjej remootl̦o̦k.”​—Jud 25, UBS.

Eoon kein rej kwal̦o̦k bwe Anij ej “Kiiñ eo ej mour wõt jãn indeeo ñan indeeo” ãinwõt an rijjilõk Paul ba. (1 Timote 1:17) Mel̦el̦ein men in bwe Jeova ear pãd jãn etto im etto, ak ejjel̦o̦k jinoin. Im enaaj pãd ñan indeeo. (Revelesõn 1:8) Alikkar bwe e eo Ekajoor Bõtata.

Etke emaroñ pen ad mel̦el̦e bwe ejjel̦o̦k jinoin im jem̦l̦o̦kin Anij? Kõnke eoktak mel̦el̦e eo ad kõn iien jãn mel̦el̦e eo an Jeova. Anij ej mour ñan indeeo, kõn men in, 1,000 iiõ ko rej ãinwõt 1 wõt raan ñane. (2 Piter 3:8) L̦õmn̦ak kõn men in, jel̦o ko rej mour wõt ium̦win 50 raan, ak armej rej mour ium̦win 70 ak 80 iiõ. Innem, jel̦o ko reban mel̦el̦e kõn aetokin mour an armej. Baibõl̦ ej ba bwe jej ãinwõt jel̦o ko ñe jej keidi kõj ñan RũKõm̦anm̦an eo ad. Ejabwe mel̦el̦e ko ippãd jãn E. (Aiseia 40:22; 55:8, 9) Eñin unin emaroñ pen an armej ro mel̦el̦e aolep men ko kõn Jeova.

Meñe emaroñ pen ad mel̦el̦e bwe ejjel̦o̦k jinoin Anij ak ñe jej kõl̦mãnl̦o̦kjen̦ kake emaroñ jipañ kõj. Ñan waanjoñak, el̦aññe en kar wõr juon eo ear kõm̦anm̦ane Anij, innem en kar e eo ej Rũkõm̦anm̦an eo. Bõtab, Baibõl̦ ej ba bwe Jeova ear “kõm̦anm̦an men ko otemjej.” (Revelesõn 4:11) Bareinwõt, ilo jinoin ear ejjel̦o̦k jabdewõt men ilal̦ im ilañ. (Jenesis 1:1, 2) Ak ewi wãween an kar men kein pãd im wal̦o̦k? Ealikkar bwe ewõr juon eo ear kõm̦anm̦ani im ear mour m̦oktal̦o̦k jãn an men kein wal̦o̦k. Ear bareinwõt mour m̦oktal̦o̦k jãn Nejin im enjel̦ ro. (Job 38:4, 7, UBS; Kolosse 1:15, UBS) Innem, ealikkar bwe Anij ear mour m̦okta jãn men otemjej. Mel̦el̦ein bwe ejjel̦o̦k juon ear kõm̦anm̦ane kõnke ejjel̦o̦k ear mour m̦oktal̦o̦k jãne.

Menin kõm̦anm̦an ko ãinwõt armej im men otemjej ilañ im lal̦ rej kam̦ool bwe ewõr Anij me ejjel̦o̦k jinoin im ejjel̦o̦k jem̦l̦o̦kin. E eo ear kõm̦m̦ani men ko otemjej ilo lañ im lal̦ bwe ren m̦akũtkũt im mour. Im ear kõm̦m̦ani men kein bwe en kon̦ aer jerbal ippãn doon. Men kein rej kaalikkar bwe ejjel̦o̦k jinoin im jem̦l̦o̦kin Anij. Im E eo ear letok mour ñan men otemjej.​—Jenesis 2:7.