Библийыште «ылыжмаш» кусарыме мут ана́стасис грек мут деч лектеш, кудыжо «угыч кынелмаш» манмым ончыкта. Колышо айдеме илышыш пӧртылеш. Колымо деч ончыч айдеме могай лийын, тыгаяк ылыжеш (1 Коринфян-влаклан 15:12, 13).

 «Ылыжмаш» мут Еврей йылме дене Возымаште (тудым эше чӱчкыдын Тошто Сугынь маныт) ок вашлиялт гынат, тушто ылыжмашлан ӱшан нерген раш возымо. Мутлан, Юмо Осия пророк гоч сӧрен: «Мый калыкемым шӱгар деч утарем, колымаш деч тудым пӧртылтем» (Осия 13:14; Иов 14:13—15; Исайя 26:19; Даниил 12:2, 13).

 Еҥ-влак кушто ылыжыт? Южо еҥ-влак Христос дене каваште вуйлаташлан ылыжыт (2 Коринфян-влаклан 5:1; Почмаш 5:9, 10). Библийыште тиде ылыжмашым «икымше ылыжмаш» манме. Тиде шомак ончыкыжым эше ик ылыжмаш лиеш манын ончыкта (Почмаш 20:6). Тиде варарак лийше ылыжмаш годым шуко еҥ мландыште илашлан ылыжтыме лиеш (Псалом 36:29).

 Еҥ-влак кузе ылыжыт? Юмо Иисуслан колышо-влакым ылыжташ вийым пуэн (Иоаннын 11:25). Иисус колышо-влакым чылаштымат илышыш пӧртылта. Ту жапыште еҥ-влак колымышт деч ончыч лийше койышышт дене да шарнымашышт дене ылыжыт (Иоаннын 5:28, 29). Кавасе илышлан ылыжше-влак шӱлыш капым налыт, а мландысе илышлан ылыжше-влаклан нимогай экшык деч посна таза физический кап пуымо лиеш (Исайя 33:24; 35:5, 6; 1 Коринфян-влаклан 15:42—44, 50).

 Кӧ ылыжтыме лиеш? Библийыште возымо: «Чын ыштыше-влакат, осалым ыштыше-влакат колымаш гыч ылыжыт» (Апост. пашашт 24:15). Чын ыштыше-влак — тиде Юмын ӱшанле служитлышыже-влак, мутлан, Ной, Сарра да Авраам (Тӱҥалтыш 6:9; Еврей-влаклан 11:11; Иаковын 2:21). А осалым ыштыше-влак — тиде тыгай еҥ-влак, кӧ Юмын нормыжо почеш илен огыл, вет нунын Юмо нерген чын шинчымашым пален налаш йӧнышт лийын огыл.

 Но шуко языкым ыштен илыше да тӧрлаташ лийдыме еҥ-влак огыт ылыж. Тыгай еҥ-влакын колымышт деч вара ылыжаш ӱшан уке (Матфейын 23:33; Еврей-влаклан 10:26, 27).

 Кунам ылыжмаш лиеш? Библий дене келшышын, еҥ-влак кавасе илышлан 1914-ше ийыште ылыжаш тӱҥалыныт, кунам Христос каваште вуйлаташ тӱҥалын (1 Коринфян-влаклан 15:21—23). Мландыште илашлан ылыжмаш Иисус Христосын тӱжем ий вуйлатымыж годым лиеш, кунам мланде райыш савырна (Лукан 23:43; Почмаш 20:6, 12, 13).

 Еҥ-влак ылыжыт манын, молан ӱшанаш лиеш? Библийыште ылыжмаш нерген индеш случайым возымо. Нине случай-влакым еҥ-влак шке шинчашт дене ужыныт (1 Царей 17:17—24; 2 Царей 4:32—37; 13:20, 21; Лукан 7:11—17; 8:40—56; Иоаннын 11:38—44; Апост. пашашт 9:36—42; 20:7—12; 1 Коринфян-влаклан 15:3—6). Лазарьын ылыжмыже поснак ойыртемалтше, вет тудо уже ныл кече колышо лийын да тиде чудым Иисус шуко еҥын шинча ончылныжо ыштен (Иоаннын 11:39, 42). Иисусын тушманже-влакат тиде чудын чынжымак лиймыжым паленыт, сандене нуно Иисусымат, Лазарьымат пушташ шонен пыштеныт (Иоаннын 11:47, 53; 12:9—11).

 Колышо-влакым ылыжташ Юмын вийжат, кумылжат уло манын, Библий ончыкта. Тудо кажне айдеме нерген чылажымат шарна. Юмо еҥ-влакым, куатле вийжым кучылтын, ылыжта (Иов 37:23; Матфейын 10:30; Лукан 20:37, 38). Юмо колышо еҥ-влакым чот ылыжтынеже! Библий ылыжмаш шотышто Юмын шижмашыже нерген теве мом палдара: «Шке кидет дене ыштымет верч йокрокланаш тӱҥалат» (Иов 14:15).

Ылыжмаш нерген йоҥылыш шонымаш-влак

 Йоҥылыш шонымаш. Ылыжмаш — тиде чонын кап дене угыч ушнымыжо.

 Факт. Библий дене келшышын, чон — тиде айдеме шкеже, а колымаш деч вара умбакыжат илыше айдемын ала-могай ужашыже огыл (Тӱҥалтыш 2:7; Иезекииль 18:4). Ылыжше айдеме чонжо дене угыч огеш ушно; тудо илыше чон семын ылыжеш.

 Йоҥылыш шонымаш. Южо еҥ-влак ылыжыт да вигак пытарыме лийыт.

 Факт. Библийыште возымо дене келшышын, «осалым ыштыше-влак судлан» ылыжтыме лийыт (Иоаннын 5:29, У Сугынь, 1986). Но нуно колымаш деч ончыч огыл, а ылыжмаш деч вара ыштыме пашашт-влаклан судитлыме лийыт. Иисус каласен: «Колышо-влак Юмын Эргын йӱкшым колыт, да тудым колыштшо-влак илаш тӱҥалыт» (Иоаннын 5:25, УТ). Ылыжмаш деч вара налме шинчымаш дене келшышын илен, нуно Иисусым колыштмыштым ончыктат. Сандене лӱмышт «илыш книгаш» пуртымо лиеш (Почмаш 20:12, 13).

 Йоҥылыш шонымаш. Ылыжше айдемылан тыгаяк кап пуымо лиеш, могай тудын колымыж деч ончыч лийын.

 Факт. Колымо деч вара айдемын капше шукыж годым шӱеш да пуракыш савырна (Экклезиаст 3:19, 20).