D tõe n paama sũ-noog bɩ?

A Benjamin Franklin yeela woto: “Sũ-noog kɩtdame tɩ naong soab wõneg arzɛk soaba, la sũ-toog kɩtdame tɩ arzɛk soab me wõneg naong soaba.”

GOM-KÃNGÃ yaa sɩda. Bala neb wʋsg sak n deegame tɩ sũ-noog pa bũmb b sẽn koosd tɩ f tõe n da ne ligd ye. Dẽnd sẽn wõnd nebã pa tõe n paam sũ-noog dũni kãngã pʋgẽ b sẽn tusd-b tɩ b bao tarem, yʋʋre, wall b bao n vɩɩmd wa b taabã, pa lingr ye. Rẽ yĩnga yɛl nins sẽn pʋgdã a yembr zoe n namsa yãmb bɩ?

• Piblisite wã rãmb wilgdame tɩ yaa f sã n paamd bõn-paalã la f talld sũ-noogo.

• Wags-taabã tʋʋmã zĩisẽ la lekoll dãmbẽ wã kɩtdame tɩ y tagsdẽ tɩ yaa y sẽn na n tõogd n maand y taabã sẽn maandã la y tar yõodo.

• Nebã yaa sõm-zɩtba.

• Y zo-rãmbã no-goam la b manesem mi n kɩtame tɩ y tʋll bũmb nins b sẽn tarã.

• Y sokda y mens yɛl kẽer vɩɩmã wɛɛngẽ n pa paamd b leoor ye.

Rẽ yĩnga baa ne yel-kãensã fãa, d tõe n paama sũ-noog bɩ? Tʋm-tʋmd a Poll wilgame tɩ yẽ bãnga sũ-noog sẽn paamd to-to wã. Wakat n zĩnd t’a ra tarẽ, la sasa n zĩnd me t’a ra pa tarẽ ye. A zo-rãmbã ra pẽgd-a lame, la neb n da yaand-a. La ne rẽ fãa, a yeelame t’a ‘zãmsame tɩ maan sũ-noog ne bũmb ning a sẽn tarã bala.’—Filip rãmba 4:11, 12, Kãab-paalgã Koe-noogo.

Neb nins sẽn pa makd sũ-noogã baoob baa bilfã pa tol n mi a sẽn paamd to-to ye. La wala a Poll sẽn wilgã, yaa bũmb d sẽn sɩd tõe n paame. Sõss nins sẽn pʋgdã wilgda yɛl a nu sẽn be Biiblã pʋgẽ n tõe n kɩt tɩ y paam sũ-noogo.