၁-၂။ ဗာဗုလုန်​ပြည်မှာ နေတဲ့ ဂျူးတွေ ဘာ​အရေးကြီး ဆုံးဖြတ်ချက် ချ​ရမလဲ။ (ဧဇရ ၁:၂-၄)

 ဗာဗုလုန်​ပြည်မှာ အနှစ် ၇၀ လောက် သုံ့ပန်း​ဘဝ ရောက်နေတဲ့ ဂျူးတွေ နေရင်းပြည် အစ္စရေး ပြန်​လို့ ရပြီ​ဆိုတဲ့ အမိန့်​ထွက်လာတယ်။ (ဧဇရ ၁:၂-၄ ကို ဖတ်ပါ။) ဒါ ယေဟောဝါ​ကြောင့်​ပဲ။ ဘာကြောင့် အဲဒီလို ပြောနိုင်သလဲ။ ဗာဗုလုန်တွေ​ဟာ သုံ့ပန်း​တွေ​ကို ပြန်လွှတ်ပေးရိုး ထုံးစံ မရှိဘူး။ (ဟေရှာ. ၁၄:၄၊ ၁၇) ဒါပေမဲ့ ဗာဗုလုန်​မြို့ သိမ်းပိုက်​ခံလိုက်ရတယ်။ အဲဒီနောက် လာ​အုပ်ချုပ်တဲ့ ဘုရင်​က ဂျူးတွေကို နိုင်ငံကနေ ထွက်ခွာခွင့် ပေးလိုက်တယ်။ ဒီတော့ ဂျူး​အားလုံး၊ အထူးသဖြင့် အိမ်ထောင်ဦးစီး​တွေ ဆုံးဖြတ်​ရတော့မယ်။ ဗာဗုလုန်​ပြည်​ကနေ ထွက်​သွားမလား၊ ဆက်နေ​မ​လား။ တော်တော် ဆုံးဖြတ်​ရ ခက်​မှာ​ပဲ။ ဘာကြောင့်လဲ။

^၂ ခရီးဝေး နှင်ဖို့ သက်ကြီး​ပိုင်း​တွေ​အတွက် မလွယ်ဘူး။ ဗာဗုလုန်​ပြည်မှာ မွေးတဲ့ နောက်ပေါက်တွေအတွက်ကျတော့ ဒီ​နေရာက နေရင်းပြည် ဖြစ်နေပြီ။ အစ္စရေး​ပြည်​လို့ ပြောလိုက်ရင် ဘိုးဘေး​တွေ နေခဲ့တဲ့ နေရာလို့​ပဲ မြင်​နေကြတာ။ ဒါ့အပြင် တချို့က ဗာဗုလုန်​ပြည်မှာ တော်တော်လေး စီးပွား​ဖြစ်နေကြတယ်။ ဒီတော့ အိမ်ကြီး​အိမ်ကောင်း​တွေ၊ စီးပွား​တွေ ထားခဲ့ပြီး နေရာသစ်မှာ သွား​အခြေချ​ဖို့ ခက်နေနိုင်တယ်။

၃။ အစ္စရေး​ပြည် ပြန်လာမယ့် သစ္စာရှိ ဂျူးတွေ ဘာကောင်းချီး ရမလဲ။

^၃ စွန့်လွှတ်​ရမှာ​တွေ ရှိပေမဲ့ အစ္စရေး​ပြည် ပြန်လာ​ရင် ကောင်းချီး အများကြီး ရမယ်ဆိုတာ သစ္စာရှိ ဂျူးတွေ သိကြတယ်။ ကောင်းချီး​တစ်ခုကတော့ ဝတ်ပြုရေး​နဲ့ ဆိုင်​တယ်။ ဗာဗုလုန်​ပြည်မှာ အယူမှား ဗိမာန် ၅၀ ကျော် ရှိပေမဲ့ ယေဟောဝါရဲ့ ဗိမာန်တော် မရှိဘူး။ မောရှေ​ပညတ် တောင်းဆိုတဲ့​အတိုင်း ပူဇော်သက္ကာတွေ ဆက်သ​ဖို့ ပလ္လင် မရှိဘူး။ ဆက်သ​ပေးဖို့ စနစ်တကျ ဖွဲ့စည်းထားတဲ့ ပုရောဟိတ်တွေ မရှိဘူး။ ဒါ့အပြင် ယေဟောဝါဘုရားနဲ့ ဘုရား​စံနှုန်းတွေကို အလေး​မထားတဲ့ အယူမှား အမျိုးသား/သမီးတွေ​ကြားမှာ ဘုရား​လူမျိုး မြုပ်နေတယ်။ ဒါကြောင့် ယေဟောဝါကို ချစ်တဲ့ ဂျူးတွေ​ကတော့ နေရင်းပြည် ပြန်ဖို့ စိုင်းပြင်း​နေကြပြီ။  အဲဒီ​ကို ရောက်မှ စင်ကြယ်တဲ့ ဝတ်ပြုရေး ပြန်​ထွန်းကား​အောင် လုပ်နိုင်​ကြ​မှာ​ကိုး။

၄။ အစ္စရေး​ပြည် ပြန်လာမယ့် ဂျူးတွေကို ယေဟောဝါ ဘာကတိ​ပေးသလဲ။

^၄ ဗာဗုလုန်​ပြည်​ကနေ အစ္စရေး​ပြည်ကို လေးလ​လောက် ခရီး​ကြမ်း နှင်ရမယ်။ ဒါပေမဲ့ လမ်းမှာ အတားအဆီး မှန်သမျှ ရှင်းထားမယ်လို့ ယေဟောဝါ ကတိပေးတယ်။ “ယေဟောဝါဘုရားရဲ့ လမ်းကို ရှင်းလင်း​ကြ။ တောကန္တာရ​မှာ ငါတို့ရဲ့ ဘုရားသခင်​အတွက် လမ်းမ​ကို ဖြောင့်ဖြူးအောင် လုပ်ကြ။ . . . မညီညာတဲ့ မြေဟာ ညီညာ​ပြန့်ပြူး​ရမယ်။ ကြမ်းတမ်းတဲ့ မြေဟာ ချိုင့်ဝှမ်း​လွင်ပြင် ဖြစ်ရမယ်” လို့ ဟေရှာယ ပြောတယ်။ (ဟေရှာ. ၄၀:၃၊ ၄) မြင်ယောင်​ကြည့်ပါ– တောကန္တာရ​ကို ဖြတ်ပြီး လမ်းမ ဖောက်ထားမယ်။ လွင်ပြင်​လို ညီညာ​ပြန့်ပြူး​နေမယ်။ တောင်တက် တောင်ဆင်း သွားရတာ၊ လျှိုမြောင်​တွေ ဖြတ်​ရတာထက် ဖြောင့်ဖြူးနေတဲ့ လမ်းမ​မှာ သွားရတာ ပိုလွယ်လို့၊ ပိုမြန်လို့ ခရီးသွား​တွေ​အတွက် ကောင်းချီးပါပဲ။

၅။ ဗာဗုလုန်​ပြည်​ကနေ အစ္စရေး​ပြည် ပြန်​တဲ့ လမ်းမကြီး​ကို ဘယ်လို တင်စား​ခေါ်​သလဲ။

^၅ အခုခေတ်မှာ လမ်းမ တော်တော်​များများ​ကို နာမည်တွေ၊ နံပါတ်​တွေ တပ်​ပြီး ခေါ်ကြတယ်။ ဟေရှာယ ပြောတဲ့ လမ်းမ​မှာ​လည်း နာမည် ရှိတယ်။ “အဲဒီမှာ လမ်းမကြီး​တစ်ခု ရှိမယ်။ သန့်ရှင်းတဲ့ လမ်း​လို့ ခေါ်တယ်။ အဲဒီ​လမ်းပေါ် မသန့်ရှင်းတဲ့​သူ သွားလာမှာ မဟုတ်ဘူး” လို့ ဖတ်ရတယ်။ (ဟေရှာ. ၃၅:၈) ဒီ​ကတိက အဲဒီ​ခေတ် အစ္စရေးတွေ​အတွက် ဘာအဓိပ္ပာယ် ရှိသလဲ။ ကျွန်တော်တို့အတွက်​ကော ဘာအဓိပ္ပာယ် ရှိသလဲ။

၆။ ဒီ​လမ်းမ​ကို သန့်ရှင်း​တယ်လို့ ဘာကြောင့် ပြောသလဲ။

^၆ ဒီ​လမ်းမ​ကို “သန့်ရှင်းတဲ့ လမ်း” ဆိုတဲ့ သိပ်လှတဲ့ နာမည် ပေးထားတယ်။ သန့်ရှင်း​တယ်လို့ ဘာကြောင့် ပြောသလဲ။ “မသန့်ရှင်းတဲ့​သူ၊” တစ်နည်းအားဖြင့် လိင်​အကျင့် ယိုယွင်း​သူ၊ ရုပ်တု ကိုးကွယ်​သူ၊ ကြီးလေးတဲ့ အပြစ် ကျူးလွန်သူ ဂျူး​တစ်ယောက်မှ အစ္စရေး​ပြည် ဝင်ခွင့် ရမှာ မဟုတ်လို့​ပဲ။ ပြည်တော်ပြန် ဂျူးတွေဟာ ဘုရားအတွက် “သန့်ရှင်းတဲ့ လူမျိုး” ဖြစ်လာကြ​မယ်။ (တရား. ၇:၆) ဒါပေမဲ့ ဘုရား​နှစ်သက်မှု ရဖို့ သူတို့ ဘာ​အပြောင်းအလဲ​မှ လုပ်စရာ မလိုဘူးလို့တော့ မဆိုလိုဘူး။

၇။ ဂျူး​တချို့ ဘာ​အပြောင်းအလဲတွေ လုပ်ရမလဲ။ ဥပမာ ပေးပါ။

^၇ အစောပိုင်းမှာ ဖော်ပြတဲ့​အတိုင်း ဂျူး​အများစုဟာ ဗာဗုလုန်​ပြည်မှာ မွေးကြ​တာ။ ဗာဗုလုန်တွေ​ရဲ့ အတွေးအခေါ်၊ စံနှုန်းတွေနဲ့ ယဉ်ပါးနေကြပြီ။ အစ္စရေး​ပြည်ကို ဂျူး ပထမ​တစ်သုတ် ပြန်လာပြီးနောက် ၆၉ နှစ် အကြာမှာ အယူမှား အမျိုးသမီးတွေကို ဂျူး​တချို့ လက်ထပ်​ယူ​ထား​မှန်း ဧဇရ သိလိုက်ရတယ်။ (ထွ. ၃၄:၁၅၊ ၁၆။ ဧဇ. ၉:၁၊ ၂) ဒါ့အပြင် အစ္စရေး​ပြည်မှာ မွေးပါလျက်နဲ့ ကလေးတွေ ဂျူး​စကား​တောင် မပြောတတ်မှန်း သိလိုက်ရတော့ ဘုရင်ခံ နေဟမိ ပါးစပ် အဟောင်း​သား ဖြစ်သွားတယ်။ (တရား. ၆:၆၊ ၇။ နေ. ၁၃:၂၃၊ ၂၄) တကယ်ဆိုရင် ကျမ်းစာကို ဟီဘရူး​စကားနဲ့ အဓိက ရေးထားတာ။ ဟီဘရူး​စကား နားမလည်မှတော့ ယေဟောဝါကို ဒီ​ကလေးတွေ ဘယ်လို​လုပ် ချစ်ပြီး ဝတ်ပြုတော့မလဲ။ (ဧဇ. ၁၀:၃၊ ၄၄) ဒါကြောင့် ဂျူးတွေ အပြောင်းအလဲ​ကြီး လုပ်ကြရမယ်။ ဒါပေမဲ့ စင်ကြယ်တဲ့ ဝတ်ပြုရေး တဖြည်းဖြည်း ပြန်လည်​ထွန်းကား​နေပြီ ဖြစ်တဲ့ အစ္စရေး​ပြည်မှာ​ဆိုတော့ အပြောင်းအလဲ လုပ်ရတာ လွယ်မှာ​ပါ။—နေ. ၈:၈၊ ၉။

၈။ ဟိုးအရင်က အဖြစ်အပျက်တွေကို ကျွန်တော်တို့ ဘာကြောင့် စိတ်​ဝင်စား​သင့်​သလဲ။ (မျက်နှာဖုံးပုံ​ကို ကြည့်ပါ။)

^၈ ‘ဟိုးအရင်က အဖြစ်အပျက်တွေ ဖတ်ရတာ စိတ်ဝင်စားဖို့တော့ ကောင်းပါတယ်။ ဒါပေမဲ့ ကျွန်တော်တို့အတွက် အဓိပ္ပာယ် ရှိ​ကော ရှိပါ့မလား’ လို့ တချို့ တွေးမိနိုင်တယ်။ အဓိပ္ပာယ် ရှိပါတယ်။ “သန့်ရှင်းတဲ့ လမ်း” မှာ ကျွန်တော်တို့ ပုံဆောင်​သဘော​နဲ့ လျှောက်နေ​ကြ​လို့​ပါ။ ဘိသိက်ခံ ဖြစ်ဖြစ်၊ “တခြား​သိုး” ဖြစ်ဖြစ် “သန့်ရှင်းတဲ့ လမ်း” မှာ ဆက်လျှောက်နေကြရမယ်။ ဒီ​လမ်းပေါ် ဆက်လျှောက်​နေတာက  အခု​ကော၊ နိုင်ငံတော် ကောင်းချီးတွေ ရမယ့် အနာဂတ်မှာ​ပါ ယေဟောဝါကို ဆက်​ဝတ်ပြုဖို့ ကူညီပေးမှာ ဖြစ်လို့ပဲ။ b (ယော. ၁၀:၁၆) အေဒီ ၁၉၁၉ က​စပြီး သန်းနဲ့ချီတဲ့ အမျိုးသား/သမီး၊ ကလေးတွေဟာ မှားယွင်းတဲ့ ကမ္ဘာ့ဘာသာရေး အင်ပါယာ မဟာဗာဗုလုန်​ကနေ ထွက်​လာ​ပြီး ဒီ​ပုံဆောင်​လမ်းမှာ စ​လျှောက်​ကြတယ်။ သင်လည်း ဒီ​လမ်းမှာ လျှောက်နေ​မှာ​ပဲ။ လွန်ခဲ့တဲ့ အနှစ် ၁၀၀ လောက်​က လမ်း စပွင့်လာပေမဲ့ အဲဒီ​မတိုင်ခင် နှစ်ပေါင်းများစွာ​ကတည်းက လမ်းကို အသင့်ပြင်​ထားခဲ့တာ။

၉။ ဟေရှာယ ၅၇:၁၄ မှာ “သန့်ရှင်းတဲ့ လမ်း” အသင့်ပြင်ခြင်း​နဲ့ပတ်သက်ပြီး ဘာဖော်ပြထားသလဲ။

^၉ ဗာဗုလုန်​ပြည်​ကနေ ထွက်လာတဲ့ ဂျူးတွေ​အတွက် အတားအဆီး​တွေ ယေဟောဝါ ဖယ်ရှား​ပေးတယ်။ (ဟေရှာယ ၅၇:၁၄ ကို ဖတ်ပါ။) ခေတ်သစ် “သန့်ရှင်းတဲ့ လမ်း” ကို​ကော။ မဟာဗာဗုလုန်​ကနေ ထွက်လာမယ့် လမ်းကို ရှင်းလင်း​ဖို့ ဘုရားတရား ကိုင်းရှိုင်း​တဲ့ အမျိုးသားတွေကို ၁၉၁၉ မတိုင်ခင် ရာစုနှစ်တွေ​ကတည်းက ယေဟောဝါ စ​သုံး​နေပြီ။ (ဟေရှာယ ၄၀:၃ နဲ့ နှိုင်းယှဉ်ပါ။) စိတ်ရိုးဖြောင့်သူတွေ မဟာဗာဗုလုန်​ကနေ ထွက်​လာ​ပြီး လူမျိုးတော်​နဲ့​အတူ ယေဟောဝါကို ဝတ်ပြုနိုင်ဖို့ အဲဒီ​အမျိုးသားတွေ လမ်း အသင့်ပြင်​ကြတယ်။ “လမ်း အသင့်ပြင်​တဲ့ အလုပ်” မှာ ဘာတွေ ပါသလဲ။ ဥပမာ​တချို့ သုံးသပ်ကြည့်ပါ။

၁၀-၁၁။ ကျမ်းစာ ပုံနှိပ်၊ ဘာသာပြန်ခြင်း​ကြောင့် ကျမ်းစာ အသိပညာ ဘယ်လို တိုးများလာသလဲ။ (ရုပ်ပုံကိုလည်း ကြည့်ပါ။)

^၁၀ ပုံနှိပ်ခြင်း။ ၁၄၅၀ ခုနှစ်လောက်​အထိ ကျမ်းစာကို လက်နဲ့ ကူးရေး​ကြ​ရလို့ တော်တော်လေး အချိန်​စားတယ်။ ကျမ်းစာ ရှားတယ်။ သိပ်​စျေးကြီးတယ်။ ဒါပေမဲ့ ပုံနှိပ်စက်တွေ ပေါ်​လာတော့ ကျမ်းစာကို အလွယ်တကူ ထုတ်ဝေ​ဖြန့်ချိ​လာနိုင်တယ်။

^၁၁ ဘာသာပြန်ခြင်း။ ရာစုနှစ်​များစွာ​အထိ ကျမ်းစာကို လက်တင်​စကားနဲ့​ပဲ အဓိက ရနိုင်တယ်။ ပညာတတ်​တွေ​ပဲ လက်တင်​စကား နားလည်တာ။ ဒါပေမဲ့ ပုံနှိပ်​လုပ်ငန်း တွင်ကျယ်​လာတဲ့အခါ​မှာတော့ သာမန်​လူတွေ နားလည်​တဲ့ ဘာသာ​စကားတွေနဲ့ ကျမ်းစာ ဘာသာပြန်ဖို့ ဘုရားတရား ကိုင်းရှိုင်း​တဲ့ အမျိုးသားတွေ ကြိုးစားကြတယ်။ ဒါကြောင့် ကျမ်းစာမှာ တကယ် ဖော်ပြတာနဲ့ ဓမ္မ​ဆရာတွေ သင်ပေးတာကို ကျမ်း​စာဖတ်သူ​တွေ နှိုင်းယှဉ်​လာနိုင်​ကြတယ်။

၁၂-၁၃။ ၁၉ ရာစုမှာ ဘာသာရေး သွန်သင်ချက် အမှားတွေကို စိတ်ရင်းမှန်တဲ့ ကျမ်းစာ ကျောင်းသားတွေ ဘယ်လို စ​ဖော်ထုတ်​သလဲ။ ဥပမာ ပေးပါ။

^၁၂ ကျမ်းစာ လေ့လာမှု အထောက်အကူ​များ။ ကျမ်းစာ ကျောင်းသားတွေဟာ ကျမ်းစာကို စစ်စစ်​ပေါက်ပေါက် လေ့လာ​လို့ အများကြီး သိလာကြတယ်။ တခြားသူတွေကို သိလာတာ​တွေ စ​ပြောပြကြတယ်။ ဥပမာ၊ ၁၉ ရာစုမှာ ချာ့ချ်​ရဲ့ ဘာသာရေး သွန်သင်ချက် အမှားတွေကို ထောက်ပြ​တဲ့ ဝေစာတွေ စ​ထုတ်ဝေ​တယ်။ ဓမ္မ​ဆရာတွေ ဒေါသူပုန် ထကြတော့တာပေါ့။

^၁၃ ၁၈၃၅ လောက်​မှာ ဟင်နရီ ဂရူး လို့ ခေါ်တဲ့ ဘုရားတရား ကိုင်းရှိုင်းသူ​တစ်ယောက် က လူသေတွေရဲ့ အခြေအနေအကြောင်း ဆွေးနွေးထားတဲ့ ဝေစာ ထုတ်တယ်။ ချာ့ချ်​အများစု သွန်သင်​သ​လို မသေနိုင်တဲ့ အသက်ဟာ မွေးရာပါ မဟုတ်ဘဲ ဘုရား ပေး​မှ ရနိုင်​ကြောင်း ကျမ်းစာကနေ ထောက်ပြ​တယ်။ ၁၈၃၇ မှာ ဂျော့ စတောစ်လို့ ခေါ်တဲ့ ခရစ်ယာန် ဘုန်းကြီး​တစ်ယောက် ရထား စီး​ရင်း အဲဒီ​ဝေစာ တွေ့သွားတယ်။ ဝေစာ ဖတ်ပြီးနောက် ဒါ အရေးကြီး အမှန်တရား ဖြစ်တယ်ဆိုတာ သဘောပေါက်သွားတယ်။ ဒါနဲ့ တခြားသူတွေကို ပြန်ပြောပြဖို့ ဆုံးဖြတ်​လိုက်တယ်။ ၁၈၄၂ မှာ “စုံစမ်း​စစ်ဆေးမှု​တစ်ခု—ဆိုးသွမ်းသူ​များ မသေနိုင်​သော​အဖြစ် ရ​ရှိသလော” ဆိုတဲ့ စိတ်ဝင်စားစရာ ခေါင်းစဉ်​နဲ့ ဟောပြောချက်တွေ ဆက်တိုက်​ပေးတယ်။ ဂျော့ စတောစ်​ရဲ့ ရေးသား​ထုတ်ဝေ​မှု​တွေ​ကို စိတ်ထိမိ​သွား​ သူ တစ်ယောက်ကတော့ ချားလ်စ် တေ့ဇ် ရပ်စယ်လ်​ဆိုတဲ့ လူငယ်လေးပါပဲ။

၁၄။ ညီအစ်ကို ရပ်စယ်လ်​နဲ့ အပေါင်းပါတွေ​ဟာ ရှေ့​ကနေ လမ်း အသင့်ပြင်​ပေး​သွား​သူ​တွေ​ကြောင့် ဘာအကျိုး ရသလဲ။ (ရုပ်ပုံကိုလည်း ကြည့်ပါ။)

^၁၄ ညီအစ်ကို ရပ်စယ်လ်​နဲ့ အပေါင်းပါတွေ​ဟာ ရှေ့​ကနေ လမ်း အသင့်ပြင်​ပေး​သွား​သူ​တွေ​ကြောင့် ဘာအကျိုး ရသလဲ။ ရှေ့​က​လူတွေ ပြုစု​ခဲ့​တဲ့ ကျမ်းစာ အဘိဓာန်၊ ဝေါဟာရ စာရင်း၊ ဘာသာပြန်​ကျမ်းတွေကို သူတို့ မှီငြမ်း​နိုင်​ကြတယ်။ ဟင်နရီ ဂရူး၊ ဂျော့ စတောစ်နဲ့ တခြားသူတွေ လေ့လာ​ရှာဖွေ​ထား​ရာ​တွေ​ကနေလည်း အကျိုးရကြတယ်။ ကျမ်းစာ အကြောင်းအရာတွေ ဆွေးနွေးထားတဲ့ စာအုပ်၊ ဝေစာ အများကြီး ထုတ်ဝေခြင်းအားဖြင့် လမ်း အသင့်ပြင်​တဲ့ လုပ်ငန်းမှာ ကိုယ်တိုင် ပါဝင်ကြတယ်။

၁၅။ ၁၉၁၉ မှာ ဘာ​အပြောင်းအလဲတွေ ဖြစ်လာသလဲ။

^၁၅ ၁၉၁၉ မှာ မဟာဗာဗုလုန် ဩဇာ​အောက်ကနေ ဘုရား​လူမျိုး လွတ်မြောက်​လာတယ်။ အဲဒီ​နှစ်မှာ​ပဲ “သစ္စာနဲ့ သတိပညာရှိတဲ့ ကျွန်” အတန်းအစား အချိန်ကိုက် ပေါ်လာလို့ ဖွင့်ခါစ “သန့်ရှင်းတဲ့ လမ်း” ပေါ် စိတ်ရိုးဖြောင့်သူတွေ စ​လျှောက်ဖို့ ကူညီပေးနိုင်ခဲ့တယ်။ (မ. ၂၄:၄၅-၄၇) ဒီ​လမ်းပေါ် စ​လျှောက်သူ​တွေ​ဟာ ရှေ့​က သစ္စာရှိ “လမ်း​လုပ်သားတွေ” ရဲ့ ကျေးဇူး​ကြောင့် ယေဟောဝါရဲ့ ရည်ရွယ်ချက်​တွေ​အကြောင်း အများကြီး သိလာကြတယ်။ (ပညာ. ၄:၁၈) ယေဟောဝါရဲ့ တောင်းဆိုချက်တွေအတိုင်း နေတတ်​လာကြတယ်။ ဒါပေမဲ့ မိမိလူမျိုး အပြောင်းအလဲတွေ တစ်ထိုင်တည်း လုပ်ဖို့ ယေဟောဝါ မ​မျှော်လင့်ပါ​ဘူး။ အဆင့်ဆင့် သန့်စင်​ပေးတယ်။ (“ လူမျိုးတော်ကို ယေဟောဝါ အဆင့်ဆင့် သန့်စင်​ပေး” လေးထောင့်ကွက်​ကို ကြည့်ပါ။) နောက်​ဆိုရင်တော့ ကျွန်တော်တို့ လုပ်သမျှ ဘုရားစိတ်တော်နဲ့ တွေ့တဲ့ အချိန် ရောက်လာတော့မှာမို့ ဝမ်းသာစရာ​ပါပဲ။—ကော. ၁:၁၀။

၁၆။ ၁၉၁၉ က​စပြီး “သန့်ရှင်းတဲ့ လမ်း” ကို ဘယ်လို မွမ်းမံ​သလဲ။ (ဟေရှာယ ၄၈:၁၇။ ၆၀:၁၇)

^၁၆ ဘယ်​လမ်း​ဖြစ်ဖြစ် မှန်မှန် ပြုပြင်​မွမ်းမံ​ပေးဖို့ လိုတယ်။ ဒါကြောင့် နောက်ထပ် လူများနိုင်သမျှ များများ မဟာဗာဗုလုန်​ ကနေ ထွက်လာ​နိုင်ဖို့ “သန့်ရှင်းတဲ့ လမ်း” ကို ၁၉၁၉ က​စပြီး ပြုပြင်​မွမ်းမံ​တယ်။ ဥပမာ၊ ခန့်အပ်ခံရခါစ သစ္စာနဲ့ သတိပညာရှိ ကျွန်ဟာ ဒီ​လမ်းပေါ် စ​လျှောက်သူ​တွေ ကျမ်းစာ အမှန်တရား သင်ယူနိုင်ဖို့ ဘုရားသခင့် စောင်းတော် ဆိုတဲ့ ကျမ်းစာ လေ့လာမှု စာအုပ်ကို ၁၉၂၁ မှာ ထုတ်ဝေ​တယ်။ ဒီ​စာအုပ်ကို ဘာသာစကား ၃၆ မျိုးနဲ့ အုပ်ရေ ၆ သန်း​နီးပါး ထုတ်ဝေ​နိုင်​ခဲ့​လို့ လူများစွာ အမှန်တရား သိလာကြတယ်။ မကြာသေးခင်​ကလည်း ကျမ်းစာ သင်အံမှုတွေ​မှာ သုံးဖို့ ပျော်စရာဘဝ ထာဝရ စံစားကြ ဆိုတဲ့ စာအုပ်သစ် ထုတ်ထားတယ်။ ကျွန်တော်တို့​အားလုံး “သန့်ရှင်းတဲ့ လမ်း” မှာ ဆက်လျှောက်​နိုင်ဖို့ နောက်ဆုံး​ကာလတစ်လျှောက် အဖွဲ့အစည်းကတစ်ဆင့် ကျမ်းစာ အသိပညာ​တွေ ယေဟောဝါ မပြတ် ပြင်ဆင်​ပေးနေတယ်။—ဟေရှာယ ၄၈:၁၇။ ၆၀:၁၇ ကို ဖတ်ပါ။

၁၇-၁၈။ “သန့်ရှင်းတဲ့ လမ်း” အတိုင်း ဆက်လျှောက်​ရင် ဘယ်​ရောက်​မလဲ။

^၁၇ လူတစ်ယောက် ကျမ်းစာ သင်အံမှု လက်ခံ​လိုက်တာနဲ့ “သန့်ရှင်းတဲ့ လမ်း” မှာ လျှောက်ဖို့ အခွင့်အရေး ရ​သွားပြီ။ တချို့က ခဏပဲ လျှောက်ပြီး လှည့်ထွက်သွားကြတယ်။ တချို့ကတော့ ခရီးဆုံး ပန်းတိုင် ရောက်တဲ့​အထိ ဆက်လျှောက်ဖို့ ဆုံးဖြတ်​ထားကြတယ်။ ခရီးဆုံး ပန်းတိုင်က ဘာလဲ။

^၁၈ ကောင်းကင် မျှော်လင့်ချက် ရှိသူတွေဟာ “သန့်ရှင်းတဲ့ လမ်း” အတိုင်း ဆက်လျှောက်​ရင် ကောင်းကင်မှာ ရှိတဲ့ “ဘုရားသခင့်​ပရဒိသု” ကို ရောက်မယ်။ (ဗျာ. ၂:၇) မြေကြီး မျှော်လင့်ချက် ရှိသူတွေကတော့ အနှစ် ၁,၀၀၀ အကုန်မှာ စုံလင်​ခြင်း​အဖြစ်ကို ရောက်မယ်။ ဒီ​လမ်းအတိုင်း သင် လျှောက်နေတယ်ဆိုရင် နောက်လှည့် မ​ကြည့်ပါ​နဲ့။ လှည့်ထွက်မသွားပါနဲ့။ ကမ္ဘာသစ်​ဆိုတဲ့ ခရီးဆုံး ပန်းတိုင် ရောက်တဲ့​အထိ ဆက်လျှောက်​နေပါ။ “သာယာ​ဖြောင့်ဖြူးတဲ့ လမ်းခရီး ဖြစ်ပါစေ” လို့ ဆုမွန်​ကောင်း တောင်းပေးလိုက်ပါတယ်။