Tlaltikpaktlakamej akinmej ixtlamatkej uelis kichiuaskej miak tlamantli. Pero ¿uelis nochi nin kichiuas kuali ma yetokan tlaltikpaktlakamej uan ma motekipachokan itech oksekimej? Amo. Axkan tlaltikpaktlakamej san intech motekipachoaj. Pero toTajtsin Dios kineki tlaltikpaktlakamej kuali ma yetokan. (Xiktlajtolti 2 Pedro 3:13.)

Biblia kijtoa satepan itech nochi Tlaltikpak nochtin motlasojtlaskej. Tlaltikpaktlakamej kuali yetoskej uan ayakmo ikaj kintlajyouiltis. (Xiktlajtolti Miqueas 4:3, 4.)

Ijkuak toTajtsin Dios okichijchi Adán, amo okichijchi san pampa itech ma motekipacho, pampa Adán amo okipiaya tlajtlakoli. Pero ijkuak Adán amo okitlakamatki toTajtsin Dios, ye opejki kipia tlajtlakoli. Tejuan otikselijkej tlajtlakoli uan ik non, san totech timotekipachoaj. Pero toTajtsin Dios ika Jesús kichiuas ayakmo ma tikpiakan tlajtlakoli. (Xiktlajtolti Romanos 7:21, 24, 25.)

Ijkon ken kineki toTajtsin Dios, Jesús okitemakak iyolilis uan ijkon okitlajtlami nochi tlen techmaka tlajtlakoli pampa achto tlakatl amo otetlakamatki (Romanos 5:19). Ijkon Jesús okichi nochtin tlaltikpaktlakamej ma tikchiakan itlaj kuali kanin ayakmo san totech timotekipachoskej uan ayakmo titlajtlakolchiuaskej. (Xiktlajtolti Salmo 37:9-11.)