उत्पत्ति २:१-२५
२ यसरी आकाश र पृथ्वी अनि यिनमा भएका सबै थोक सृष्टि गर्ने काम सिद्धियो।+
२ सातौँ दिन सुरु हुनुअघि परमेश्वरले सबै काम सिद्ध्याउनुभयो र सातौँ दिनमा उहाँले सबै कामबाट विश्राम लिन थाल्नुभयो।+
३ परमेश्वरले सातौँ दिनलाई आशिष् दिनुभयो र त्यस दिनलाई पवित्र घोषणा गर्नुभयो किनकि आफ्नो उद्देश्यअनुसार सबै कुरा सृष्टि गरेपछि परमेश्वरले सातौँ दिनदेखि विश्राम लिइरहनुभएको छ।
४ यो आकाश र पृथ्वी सृष्टि गरिएको बेलाको विवरण हो। जुन दिन* यहोवा* परमेश्वरले पृथ्वी र आकाश बनाउनुभयो,+ त्यस दिनको विवरण यही हो।
५ पृथ्वीमा घाँसपात, बोटबिरुवा केही थिएन किनकि यहोवा परमेश्वरले पृथ्वीमा पानी बर्साउनुभएको थिएन र भूमि खनजोत गर्ने मानिस पनि थिएन।
६ तर पृथ्वीबाट कुहिरो उठ्थ्यो र त्यसले नै पूरै जमिन भिजाउँथ्यो।
७ यहोवा परमेश्वरले भूमिको माटोबाट+ मानिस बनाउनुभयो अनि तिनको नाकमा जीवनको सास+ फुकिदिनुभयो र तिनी जीवित मानिस* भए।+
८ साथै यहोवा परमेश्वरले पूर्वतिर अदनमा+ एउटा बगैँचा लगाउनुभयो र आफूले बनाएको मानिसलाई+ त्यहाँ राख्नुभयो।
९ यहोवा परमेश्वरले हेर्नमा रहरलाग्दा अनि खानलाई मीठामीठा फल भएका हरेक किसिमको रूख भूमिबाट उमार्नुभयो। बगैँचाको बीचमा चाहिँ उहाँले जीवनको रूख+ लगाउनुभयो अनि असल र खराबको ज्ञानको रूख+ पनि लगाउनुभयो।
१० अदनबाट एउटा नदी बगेको थियो, जसले गर्दा अदनको बगैँचा सुक्खा हुँदैन थियो। त्यस नदीबाट चार वटा शाखा नदी निस्किएका थिए।
११ पहिलो नदीको नाम पिसोन हो; यस नदीले हविलाहको पूरै इलाकालाई घेरेको छ र त्यस इलाकामा सुन पाइन्छ।
१२ त्यहाँको सुन असल छ। त्यहाँ गोकुल धूप* र ओनिक्स* रत्न पनि पाइन्छ।
१३ दोस्रो नदीको नाम गिहोन हो; यो नदी कुस* इलाकाको वरिपरि बग्छ।
१४ तेस्रो नदीको नाम हिद्देकेल*+ हो; यो नदी अस्सेरियाको पूर्वतिर बग्छ।+ अनि चौथो नदीको नाम युफ्रेटिस हो।+
१५ अदनको बगैँचाको गोडमेल र रेखदेख गर्न यहोवा परमेश्वरले मानिसलाई त्यहाँ राख्नुभयो।+
१६ यहोवा परमेश्वरले मानिसलाई यो आज्ञा पनि दिनुभयो: “बगैँचाको हरेक रूखबाट चाहेजति फल खान सक्छौ।+
१७ तर असल र खराबको ज्ञानको रूखको फलचाहिँ खाँदै नखानू किनकि जुन दिन तिमीले त्यो खान्छौ, त्यही दिन तिमी मर्नेछौ।”+
१८ त्यसपछि यहोवा परमेश्वरले भन्नुभयो: “मानिस एक्लो रहन असल छैन। म उसको लागि सुहाउने एक जना साथी बनाइदिनेछु, उनी मानिसको सहयोगी हुनेछिन्।”+
१९ यहोवा परमेश्वरले माटोबाट जातजातका जङ्गली जनावर र आकाशमा उड्ने जातजातका जीवहरू बनाउनुभयो अनि उहाँले ती सबैलाई मानिसकहाँ ल्याउन थाल्नुभयो। मानिसले ती सबैलाई के नाम दिँदा रहेछन् भनेर उहाँ हेर्न चाहनुहुन्थ्यो। मानिसले तिनीहरूलाई जे-जे नाम दिए, त्यही नै तिनीहरूको नाम भयो।+
२० यसरी मानिसले घरपालुवा जनावर, आकाशमा उड्ने जीव र जङ्गली जनावर सबैको नाम राखे तर मानिसको लागि सुहाउने सहयोगी भने कोही पनि थिएन।
२१ त्यसैले यहोवा परमेश्वरले मानिसलाई गहिरो निद्रामा पार्नुभयो र तिनी निदाइरहेको बेला तिनको एउटा करङ निकालेर त्यसको ठाउँमा मासु भर्नुभयो।
२२ अनि यहोवा परमेश्वरले मानिसबाट निकालेको करङबाट एउटी स्त्री बनाउनुभयो र त्यस स्त्रीलाई मानिसकहाँ ल्याउनुभयो।+
२३ त्यसपछि मानिसले भने:
“यिनी मेरै हाडको हाड,
मासुको मासु हुन्।
यिनी नरबाट बनाइएकी हुन्,+
त्यसैले यिनलाई नारी भनिनेछ।”
२४ यसैकारण पुरुषले आफ्ना बुबा र आमालाई छोड्छ अनि आफ्नी पत्नीसित बस्छ* र तिनीहरू एउटै शरीर हुन्छन्।+
२५ मानिस र तिनकी पत्नी दुवै नाङ्गै थिए+ तैपनि तिनीहरू लाज मान्दैनथे।
फुटनोटहरू
^ यसले सृष्टिका छ दिनलाई जनाउँछ।
^ परमेश्वरको बेजोड नाम יהוה (YHWH) बाइबलमा पहिलो पटक यही पदमा चलाइएको छ। अतिरिक्त लेख क४ हेर्नुहोस्।
^ शब्दावलीमा “नेफेश; साइखी” हेर्नुहोस्।
^ मसिना पात र ससाना फूल हुने एक किसिमको रूखको सुगन्धित चोप।
^ वा “इथियोपिया।”
^ वा “टिग्रिस।”
^ यहाँ चलाइएको हिब्रू शब्दले गमले टाँसेजस्तै बलियोसित टाँसिनुलाई जनाउँछ।
