Mbela owu uvite ngaashi oohandimwe mboka taya kondjo nuupyakadhi wopamadhiladhilo, mbono ya popiwa metetekelo? Mbela ngoye nenge gumwe gwomwaamboka wu hole, ohamu kala mu uvite ngawo?

Kala wu shi kutya hangoye awike ho kala wu uvite ngaaka. Aantu oyendji kunena oya gumwa kuupyakadhi wopamadhiladhilo, kutya nduno oyo yene taya ehama, nenge aantu mboka ye hole.

Kapu na omalimbililo kutya otu li ‘momathimbo omadhigu’ nohage tu etele omaupyakadhi ogendji. (2 Timoteus 3:1) Iizemo yomapekapeko gamwe ngoka ga ningwa oya ulika kutya muuyuni awuhe, omuntu gumwe gwomaantu yahetatu ota kondjo nuupyakadhi wopamadhiladhilo. Omolwomukithi gwekomba, gwo-COVID-19, mo 2020 omwaalu gwaantu mboka ye na iimpwiyu ya pitilila ogwa indjipala noopelesenda 26 lwaampono, nomwaalu gwaamboka ya kwatwa kepolimano, ogwa indjipala noopelesenda 28 lwaampono.

Eeno, osha simana okutseya kutya aantu ye thike peni ye na iimpwiyu ya pitilila nenge ya kwatwa kepolimano. Ihe shoka sha simanenena osho okutseya nkene ngoye nosho wo mboka wu hole mu uvite.

Ongele omadhiladhilo ge ge li pehala noku uvite ombili. Oha vulu okuungaunga nuupu nomaupyakadhi ngoka hatu iyadha mugo esiku kehe, oha pondola miilonga ye noha kala e uvite a gwanenwa monkalamwenyo.

• Ngele omuntu oku wu na ITASHI TI KUTYA okwa ninga sha sha puka.

• Ihe OWU LI uuvu mboka wa pumbwa ekwatho lyopaunamiti, molwaashono ohawu kutha omadhiladhilo gomuntu pehala, nohawu mu ningitha a kale a nyengwa okupangela omaiyuvo ge nosho wo eihumbato lye.

•   Ohawu shi ningitha oshidhigu komuntu a pange uukuume nayalwe nenge a ungaunge nonkalamwenyo yakehe siku.

• Ohawu vulu okukwata aantu yomapipi agehe, yomihoko adhihe, yomaludhi agehe, yomomalongelokalunga agehe, yuulongelwe wa yoolokathana noyomaithano gi ili nogi ili.

Ngele owa ndhindhilike elunduluko miikala yoye nenge yagumwe gwomwaamboka wu hole, pashiholelwa, ho kotha unene nenge iho kotha we nawa, ho li sha pitilila nenge wa kanitha ehalo lyokulya, ho kala wu uvite wa gwililwa po, wu na iimpwiyu ya pitilila nenge wa yemata, otashi vulika wa pumbwa ekwatho lyomunawino gwontumba miinima yopaunamiti, e ku kwathele wu mone kutya owu na uupyakadhi washike, noshike wu na okuninga po. Ihe mbela openi to vulu okukonga ekwatho?

Omulumentu omunandungelela ngoka a li ko nale, Jesus Kristus, okwa ti: “Aandjolowele itaa pumbwa omwaaludhi, ihe aavu tuu ayeke.” (Mateus 9:12) Mbono ye na uukolele tawu nyangwanyangwa, nohaya mono ekwatho lyopaunamiti tali opalele, onkalo yawo ohayi kala yi li hwepo nohashi ya kwathele ya kale ya nyanyukwa monkalamwenyo. Oshi li pandunge kaantu mboka ye na uupyakadhi wopamadhiladhilo ya konge ekwatho lyopaunamiti meendelelo, ngele oye na omandhindhiliko ga kwata miiti nenge ga kala ethimbo ele. a

Nonando Ombiimbeli kayi shi embo lyopaunamiti, shoka shi li mo otashi vulu oku tu kwathela, ngele tashi ya puukolele wetu wopamadhiladhilo. Otatu ku hiya wu leshe iitopolwa ya landula ko moshifo shika, mbyoka tayi popi kombinga yankene Ombiimbeli tayi vulu oku tu kwathela tu ungaunge nuupyakadhi wopamadhiladhilo.