MBELA nangoye opu na esiku limwe wa li wu uvithwa nayi komwiitaali omukweni ngaashi omumwameme Linda? Opu na yamwe mboka ya yematekwa keihumbato lyayalwe. Oshinima shoka ohashi gumu ekwatathano lyayamwe naKalunga. Mbela nangoye oshe ku ningilwa?

Odhoshili kutya ohashi kala oshidhigu okudhimina po omwiitaali omukwetu ngoka e tu yemateka. Ombiimbeli otayi ladhipike Aakriste ayehe ya kale ye holathane. (Johannes 13:34, 35) Ihe uuna twa ningwa nayi komwiitaali omukwetu, ohashi tu yemateke nayi nohashi lulumike omitima dhetu. —  Episalomi 55:12.

Ombiimbeli nayo oye shi popya kutya opu na omathimbo gamwe mpoka Omukriste ha “ningathana namukwawo.” (Aakolossa 3:13) Uuna twe shi ningilwa ohashi kala lela oshidhigu kutse tu ungaunge nonkalo ndjoka. Mbela opu na sha shilwe shoka tashi vulu oku tu kwathela? Eeno. Opu na omakotampango gatatu gOmbiimbeli ngoka taga vulu oku tu kwathela.

Tate yetu gwomegulu oha mono kehe shimwe. Jehova oha mono kehe shimwe shoka tashi ningwa. Oha kala wo e wete okwaahenuuyuuki hoka tatu ningilwa nosho wo iilanduliko yako. (Aahebeli 4:13) Shimwe ishewe, ohe tu kenukile uuna tatu mono iihuna. (Jesaja 63:9) Ihe etha nando ‘uudhigu nenge oothina’ dhi ‘tu topole ko kohole yaKalunga.’ Kakele kaashono, ihe etha nando osha kutya nduno omupiya gwe gumwe e tu topole ko kohole ye. (Aaroma 8:35, 38, 39) Natse otwa pumbwa tu ninge sha faathana. Inatu etha nando osha nenge gumwe a tile omeya pokati ketu nAakriste ooyakwetu nosho wo pokati ketu naJehova.

Okudhimina po itashi ti kutya owa hokwa shoka sha ningwa po. Uuna tatu dhimine po yalwe, itashi ti kutya katu na ko nasha naashoka ya ninga. Sho itashi ti kutya otwa dhina, nenge tu wete shoka ya ninga shu uka, nenge tatu shi popile. Otu na okudhimbulukwa kutya Jehova iha kala nando a panda iilonga yuulunde. Ihe ohe tu dhimine po ngele oku wete kutya osha pumbiwa. (Episalomi 103:12, 13; Habakuk 1:13) Sho Jehova te tu pula tu dhimine po yalwe, okwa hala tu mu holele. Iha kala a “geya sigo aluhe.” — Episalomi 103:9; Mateus 6:14.

Uuna itaatu kwatele onkone, uuwanawa owetu yene. Omomikalo dhini mbela? Natu shi yelekanithe. Tenteka ando emanya ndyoka li na uudhigu woshiyeleke peke lyoye, e to kala wa tagananeka oshikaha shoye. Mbela otashi ka kala ngaa uupyakadhi kungoye okukala wu li na uule wokathimbo okafupi? Aawe. Ihe ongiini ngele owe shi ningi ethimbo ele? Oto ka vula ngaa okukala wu li na uule wominute dhontumba, wowili nenge ethimbo li vulithe po? Ngele owe shi ningi, okwaako koye otaku ka vulwa lela. Ihe uudhigu wemanya itawu lunduluka, otawu kala owala ngaashi wu li. Uudhigu wemanya ndyoka owu na oku wu uva, ngele owa kala wu li na ethimbo ele. Osha faathana nonkone. Uuna wa kala wu yi na ethimbo ele, nonando oyi kale onshona, otashi ke ku ehameka. Onkee ano, Jehova ote tu kumagidha  kaatu kwatele yalwe onkone. Ngele otwe shi ningi, uuwanawa owetu yene. — Omayeletumbulo 11:17.

Oshike sha li sha kwathele omumwameme Linda kaa kwatele omwiitaali omukwawo onkone? Okutedhatedha kOmanyolo ngoka tage tu ladhipike tu dhimine po yalwe. (Episalomi 130:3, 4) Shoka she mu inyengitha unene osho shono kutya, ngele otatu dhimine po yalwe, Jehova naye ote ke tu dhimina po. (Aaefeso 4:32–5:2) Omumwameme Linda okwa popi nkene Oohapu ndhoka dhe mu kwathele. Okwa ti: “Onda li ndi uvite Jehova oye mwene ta popi nangame.”

Mokweendelako kwethimbo okwa dhimine po omumwameme ngoka e mu lundilile. Ina kala we e mu kwatela onkone, nongashingeyi oye li ookahewa kopothingo. Shoka osha kwathele omumwameme Linda a pule komeho nokulongela Jehova. Kala wu shi kutya Jehova okwa hala wu ninge sha faathana.