Ophiyerya vaava, noowerya ophwanya naakhulo na nikoho nla, Muluku taani? Nipacenrye moorweela wa ohuserya Mpiipiliyani wi nsina na Muluku ti Yehova nave wi mukhalelo awe woochuneya ti osivela. Noomala tho ohuserya ichu eenreiye ni seiho onahaaleiye weera wi aakhaviherye achu. Woona wi sootepa waaca ichu nnaphwanelaahu ohuserya vooloca sa Muluku, akhweya munanwerya okoha, tiheeni kinahaalaaka ophura?

Yehova oororomeliha wi wakhala wi ‘ninnamwaavya, nnamumphwanya.’ (1 Matharihelo 28:9) Nkaanyiheryani mareeliho oohaalakhanyeya munahaalaanyu waakhela vaavaa muniilipixeryaanyu omwaavya ni omusuwela Muluku—munamukhalano “waataana” ni Yehova! (Salumu 25:14) Mphurelo taani munahaalaanyu waakhela nthowa na opaka onthamwene ni Muluku?

Ohakalala weeparipari. Yehova onnalociwa wi owo ti “Muluku oohakalala.” (1 Timóteo1:11, Tradução do Novo Mundo.) Opaka onthamwene ni yoowo ni otakiherya meecelo awe, onahaala wooruuhelaani ohakalala weeparipari, yoowo onahaala orehererya muupuwelo anyu, makhalelo, ophiyerya tho mwiili anyu. (Salumu 33:12) Nyuwaano tho munanwerya okhalano echoko yoohakalala moorweela wa osepa meecelo oonanara, okhalano okumi waphaama, ni okhala a waataana ni akina. Nyuwaano munahaala weemererya masu a namarepa a Salumu yoowo aariye: “Nto wa miyo, onnakireerela omwaacamela Muluku.”—Salumu 73:28.

Waakhela othokororya ni okhapelela wawe. Yehova onnaaroromeliha akapuro awe: “Kinarwa koovaha miruku koovareryaka.” (Salumu 32:8) Ela enooniherya wi Yehova onnampwacha mmoha ti mmoha a akapuro awe nave onnamuthokororya mwawiiwanana ni soothowa sawe. (Salumu 139:1, 2) Wakhala wi mohinnuwiha onthamwene anyu ni Yehova, munahaala woona wi ilukuluku soothene owo ori ni nyuwaano wi ookhaviheryeeni.

Omwaahiyu woohakalaliha. Ohiya pahiru woovahaani ekari ya okhalano ekumi yoohakalala hiihaano, Yehova tho onnahula ephiro wi mukhaleno omwaahiyu wootikhiniha. (Isaiya 48:17, 18) Piipiliya onnaloca: “Okumi ene woohimala tuula: yoosuweleeni nyu, muri Muluku mmoharu eeparipari, ni Yeesu, ti Kristu yoowo mmuruminhaanyu.” (Yohani 17:3) Mu elukuluku yeela yookacamiha, ewehereryo yeeyo Muluku onavaheiye enanwerya okhala ntoko ankora yoowo onahaala onikhaviherya okhala “oothipeleya.”—Ahebri 6:19.

Aakhalavo mathowa mancipale oochuneya yaawo ananeeriha ochuna omusuwela phaama Muluku ni wunnuwiha onthamwene ahu ni yoowo, nyenya nthokoronrye pahiru mathowa a vakhaani. Ninnoovekaani wi mmwaavye Namoona a Yehova wi ookhaviheryeeni, naari muye mu jw.org wi moone sooleeliherya ikina.