NGYEGYELƐ: Baebolo kɛlɛvoma hɛlɛle aloa nee nane nwoma zo titili. * (2 Temɔte 4:13) Kɛzi ninyɛne ɛhye mɔ bahola amaa Baebolo ne azɛkye ɛ?

Aloa kola tete, ɔ nye kpa na ɔyɛ bɛtɛɛ ndɛndɛ. Richard Parkinson nee Stephen Quirke mɔɔ bɛsukoa Egypt tetedwɛkɛ nwo debie la hanle kɛ, “Kɛlata kola sɛkye na awieleɛ kolaa ne ɔyɛ munlutu. Saa bɛfa bɛsie a, ɔkola ɔbɔ adubue anzɛɛ ɔkpɔlɔ yɛɛ ngɛkɛba kola di, titili nvɔlekɛ, wɔ mekɛ mɔɔ bɛva bɛzie azɛlɛ bo la.” Bɛnwunle aloa bie mɔ la, bɛmaanle ewia bɔle ye anzɛɛ ɛbɔlɛ dɔle guale zolɛ somaa la ati, ɔmaanle bɛzɛkyele ndɛndɛ.

Nane nwoma kyɛ tɛla aloa, noko saa bɛannea ye boɛ anzɛɛ bɛmaa ewia bɔ ye anzɛɛ ɛbɔlɛ tɔ gua zo ɛsesebɛ a ɔsɛkye. * Ngɛkɛba di nane nwoma noko. Yemɔti, Everyday Writing in the Graeco-Roman East buluku ne hanle ye wɔ tete kɛlɛtokɛ nwo kɛ, “ɔyɛ se kɛ tete kɛlɛtokɛ bawoa ɛkɛ.” Saa Baebolo ne zɛkyele a, anrɛɛ nuhua edwɛkɛ ne baminli.

DEƐMƆTI BAEBOLO NE ANZƐKYE LA: Dwuuma mɛla ne maanle belemgbunli biala hɛlɛle “Nyamenle Mɛla Buluku ne,” mɔɔ le Baebolo mbuluku nnu ne mɔɔ limoa la. (Mɛla ne 17:18) Bieko, kɛlɛvoma mɔɔ yɛ deɛ kpalɛ la yɛle bɛsanloangɛlɛlera dɔɔnwo kpalɛ yemɔti ɔkadwu ɛvoya mɔɔ limoa Y.M. la, ɛnee bɛnwu Ngɛlɛlera ne wɔ nyianu azua mɔɔ wɔ Yizilayɛ la kɔsɔɔti anu yɛɛ Masidonea mɔɔ wɔ moa bɔbɔ la! (Luku 4:16, 17; Gyima ne 17:11) Duzu ati a tete bɛsanloangɛlɛlera bie mɔ anzɛkye too badwu ɛnɛ a?

Ngyekyeleɛ Fofolɛ ne anwo nwomanli Philip W. Comfort hanle kɛ, “Ɛnee bɛze Dwuuma kɛ bɛfa nwomamobɔleɛ mɔɔ Ngɛlɛlera ne wɔ nu la bɛwula dwora nu amaa bɛanzɛkye.” Ɔda ali kɛ Kilisienema doale amaamuo ɛhye azo. Ɛhye ati, bɛnwunle alimoa bɛsanloangɛlɛlera bie mɔ wɔ ndɛtɛlɛ dwora nu yɛɛ ɛleka mɔɔ bɛsie ninyɛne nee bolɛbɔne nu nee ɛleka gyɛne bɔbɔ.

MƆƆ VI NU ƐRA: Bɛnwu bɛsanloangɛlɛlera dɔɔnwo, bie mɔ ɛli ɛvolɛ mɔɔ bo 2,000 mɔɔ bɛanzɛkye too badwu ɛnɛ a. Tete bɛsanloangɛlɛlera mɔɔ zonle dɔɔnwo biala ɛnle ɛkɛ mɔɔ ɛhyɛ zɛhae a.