“Dago kayod siak, amin yon mansasagpot tan nabebelatan, tan pampainawaen ta kayo. Sakbat yoy pakok tan manaral kayod siak, ta mauyamo tan mapaabeba ak, pian nainawaan kayo. Ta say pakok et maabig, tan anlemew so awit ko.”—Mateo 11:28-30, Balon Mundo a Patalos.

 “Dago kayod siak, amin yon nakekesawan ed panaawit yoy ambelat, ta pampainawaen ta kayo. Sakbat yoy pakok tan manaral kayod siak, ta mauyamo tan mapaabeba ak, et makapampainawa kayo. Ta mainomay so ipasakbat kod sikayo, tan anlemew so ipaawit kod sikayo.”—Mateo 11:28-30, Maung a Balita.

 Maar-aron inimbitaan nen Jesus iray ondedengel ed sikato ya ondago ra ed sikato. Impaseguro tod sikara ya no awaten day ibabangat to, narepreskoan tan nainawaan ira.

 “Dago kayod siak, amin yon mansasagpot tan nabebelatan.” Maaron inimbitaan nen Jesus iramay “nabebelatan” ed saray ganggan tan tradisyon na too ya impaakseb na saray lider na relihyon da. (Mateo 23:4; Marcos 7:7) Nabebelatan met iray ordinaryon totoo lapud dakdakel so pampapagaan da, tan kaukolan day mansagpot ya maong ed trabaho da pian walay pambilay na pamilya da.

 “Pampainawaen ta kayo.” Impromisa nen Jesus ya ikdan toy inawa, odino pampainawaen to iramay mangawat ed sayan maaron imbitasyon to. Agawaan to itan ya imbaga to nen tinulongan to ran natalosan no anton talagay iilaloan na Dios ed sikara. (Mateo 7:24, 25) Kanian nen naamtaan da itan, nibulos ira ed impakaaripen da ed saray palson bangat tan ed saray makapabelat ya tradisyon na relihyon. (Juan 8:31, 32) Tua ya kaukolan so pansagpot ed panaral tan pangiyaplika ed saray bangat nen Jesus, balet makaparepresko itan.

 “Sakbat yoy pakok tan manaral kayod siak.” Diad panaon na Biblia, saray trabahador et kaslakan ya manguusar na pako—sakey itan ya kiew ya iiyan ed takeb—pian sakbaten iray ambelat ya awit. Kanian diad saya, say labay ya ibaga na salitan “pako” et pampasakop ed autoridad tan panangigiya na arum. (Levitico 26:13; Isaias 14:25; Jeremias 28:4) Say balikas ya “manaral kayod siak” et nayari met ya ipatalos ya “magmaliw kayon disipulok (manaaral o estudyante).” Papasesegen sirin nen Jesus iray ondedengel ed sikato ya magmaliw ya disipulo to diad itumbok da ed sikato tan pangalig da ed alimbawa to.—Juan 13:13-15; 1 Pedro 2:21.

 “Nainawaan kayo.” Ag-impromisa nen Jesus ya naekal lan tampol so amin ya problema. Balet niligliwa to ray ondedengel ed sikato tan inikdan to ra na ilalo. (Mateo 6:25-32; 10:29-31) Apruebaan na saramay nagmaliw ya disipulo to tan angawat ed saray bangat to ya aliwan makapabelat so panlingkor ed Dios, noagta talagan makapenek itan.—1 Juan 5:3.

 “Ta say pakok et maabig, tan anlemew so awit ko.” Mapaabeba tan mauyamo si Jesus, aliwan singa saray lider na relihyon ed panaon to. (Juan 7:47-49) Aliwan maruksa tan agton balot pinairap iray totoo. Imbes, maomaong tan mainomay ya asinggeran. Makatunongan met ed saray iilaloan tod saray papatumbok to. (Mateo 7:12; Marcos 6:34; Lucas 9:11) Impanengneng to met ed sikara no panon iran nagunggonaan ed panangasi na Dios, tan nainawaan ira no malinis so konsiensia ra. (Mateo 5:23, 24; 6:14) Balibali iray kualidad nen Jesus kanian aglabat inmapit iray totoo ed sikato, noagta apakiwas met iran awaten so pako to tan magmaliw ya disipulo to.

 Saramay salitan akarekord ed Mateo 11:28-30 et imbaga nen Jesus legan ya manpupulong diad Galilea nen 31 C.E. Diad amin ya angisulat na Ebanghelyo, si apostol Mateo labat so angirekord ed sayan maar-aron imbitasyon nen Jesus. Lapud datin managsingil na buis si Mateo tan sakey met ya Judio, naobserbaan ton mismo no panon ya apairap iray ordinaryon totoo lapud buis ya kekerewen na saray Romano tan ontan met ed saray mauges ya gagawaen na Judion relihyon. Kanian seguradon apaseseg nen anengneng toy impangusar nen Jesus ed autoridad ya inter na Ama to, si Jehova, a pian imbitaan iray mapaabeba tan napapairap ya totoo ya ondago ed sikato.—Mateo 11:25-27.

 Idadanet na Ebanghelyo nen Mateo iray balibalin kualidad ya impanengneng nen Jesus bilang say insipan ya Mesias tan magmaliw ya manuley diad Panarian na Dios.—Mateo 1:20-23; Isaias 11:1-5.

 Bantayan iyan antikey ya video pian nawalaan kay ideya ed libro na Mateo.