Ebat ed Saray Tepet ed Biblia
Kasin dedengelen na Dios so amin ya pikakasi?
Dedengelen na Dios iray totoo ed amin a bansa. (Salmo 145:18, 19) Ipapaseseg na Salita to, say Biblia, ya ibaga tayod sikato so antokaman ya pampapagaan tayo. (Filipos 4:6, 7) Balet wala ray pikakasin aglabay na Dios, singa say pangulit-ulit ed impatlep iran dasal.—Basaen so Mateo 6:7.
Ontan met, agdengelen nen Jehova so pikakasi na totoon agda uunorey ganggan to. (Uliran 28:9) Singa bilang, nensaman et agdinengel na Dios so pikakasi na saray Israelita ya mamapatey. Kanian pian dengelen na Dios iray pikakasi tayo, kaukolan ya gawaen tayo ray pagagawa to.—Basaen so Isaias 1:15.
Antoy nepeg ya gawaen tayo pian dengelen itayo na Dios?
Agtayo makaasingger ed Dios diad pikakasi no anggapoy pananisia tayo. (Santiago 1:5, 6) Kaukolan ya kombinsido tayon walan talagay Dios tan inad-aro to tayo. Napabiskeg tayoy pananisia tayo no manaral tayoy Biblia lapud say tuan pananisia et base ed saray ebidensya tan panamaseguro ya walad Salita na Dios.—Basaen so Hebreos 11:1, 6.
Kaukolan ya impapuso tan mapaabeba itayon manpikasi. Anggan si Jesus ya Anak na Dios et mapaabeba nen nampikasi. (Lucas 22:41, 42) Kanian imbes ya ibagad Dios no antoy labay tayon gawaen to, kaukolan tayon talosan iray panlabayan to diad pambasad Biblia. Diad ontan et makapanpikasi tayo unong ed linawa na Dios.—Basaen so 1 Juan 5:14.
