Ugaw ak ni, naliliketan ak lad saray balibalin kaliberliber. Lanang kamin ompapasyar ya sankapamilya ed makapal ya kakiewan tan diad saray balibalin lake ya akapaliber ed panaayaman min baley diad Jyväskylä, Central Finland. Mahilig ak met ed ayayep. Nen ugaw ak, no nayari labat et labay kon lakapen so amin ya pusa tan aso ya nanengneng ko! Legay ibabaleg ko, agko nagugustoay pangaabuso na totoo ed saray ayayep. Ag-abayag, akila ak ed organisasyon ya manproprotektad kanepegan na ayayep, tan diman ko akaiba iray kaparehok na kanonotan.

Aktibo min ilalaban iray kanepegan na ayayep. Mangikakayat kami impormasyon tan angorganisa kami na saray rally pian manprotesta ed saray lakoay gamit ya gawad bago tan saray laboratoryon uusaren da ray ayep ed eksperimento da. Amorma kami ni ingen na balon organisasyon ya manprotektad ayayep. Lapud talagan ilalaban mi prinsipyo mi, mabetbet ya nakaka-inkuentro mi ray autoridad. Aminpiga ak ya naaresto tan inawit ed korte.

Aliwa labat ya saray ayayep so nononoten ko. Naaaburido ak met ed arum nin problemad mundo. Kanian ag-abayag, akimembro ak ed pigapigaran organisasyon, kaiba lay Amnesty International tan Greenpeace. Inupot koy biskeg kod insuporta ed saray aktibidad na saratan ya organisasyon. Idedepensak iray mairap-bilay, nanaerasan, tan arum nin pakaskasin totoo.

Balet kalkalnak ya atalosan ya agko sarag ya umaney mundo. Anggaman wala met so nagagawaan na saraman ya organisasyon pian naresolbe iray angkelag ya problema, saray angkabaleg ya problema balet et mas onloloor. Singa inakmon na kaugsan so interon mundo tan anggapoy pibabali na amin ya too. Anggapo lay nagawaan ko.

Lapud maermen ak ta anggapoy nagawaan ko, anonotan koy Dios  tan say Biblia. Nanaral ak nensaman na Biblia diad saray Tasi nen Jehova. Anggano maomaong iray Tasi tan interesado rad pankaabigan ko, agak ni akaparaan ed saman ya umaney bilay ko. Balet natan, akaparaan ak la.

Ginapoan kon binasa so Bibliak. Singa itan tambal ed saray sugat ko. Amayamay so teksto ed Biblia ya mangibabangat ed dugan pantratod ayayep. Alimbawa, ibabaga na Uliran 12:10 ya “say maptek a too pablien to so bilay na ayep to.” Atalosan ko met ya aliwan say Dios so panlalapuan na saray problema ed mundo. Noagta linmoor labat iratan lapud ag-uunoren na maslak a totoo so panangigiya to. Pandinayewan koy panangaro tan andukey a panag-anos nen Jehova.—Salmo 103:8-14.

Diad saman et akalmo ak na coupon parad pan-request na libron Anto so Peteg ya Ibabangat na Biblia? tan impawit ko itan. Ag-abayag, walay sanasawan Tasi ya linmad abung ko tan inawat koy inyopresi dan panagaral na Biblia. Ginapoan ko met so onatendid saray aral da diad Kingdom Hall. Bilang resulta, linmamot ed pusok so katuaan ya walad Biblia.

Diad tulong na Biblia, asarag koy manggawa na dakel a pananguman. Intundak so panagsigarilyo tan panagbuanges. Inayos koy itsurak tan panagsalitak. Tan inuman koy panmoriak ed autoridad. (Roma 13:1) Sakey ni, dati et talagan agko nakontrol so sarilik ed imoral ya kabibilay balet tinundaan ko met itan.

Say sankairapan ya inuman ko et say pakawalaan na dugan panmoria ed saray organisasyon parad kanepegan na totoo tan ayayep. Talagan nairapan ak. Diad gapo, say pakaliknak et traidor ak no onekal ak ed saraman ya organisasyon. Balet atalosan kon siansia a say Panarian na Dios labat so makapanguman ed mundo. Nandesisyon ak ya iyupot koy biskeg kod panuporta ed Panarian tan panulong ed arum ya naaralan itan.—Mateo 6:33.

Nen aktibista ak ni, parad siak et duara labat so klase na totoo—maong odino mauges—tan naynay ak ya akaparaan ya onlaban ed saramay ipapasen kon mauges. Balet, misalsalamat ak ed Biblia ta natan et nakal ko lay sobran pambusol kod arum ya totoo. Gagawaen ko la natan so anggaay nayarian ko ya ipanengneng so Kristianon panangaro ed amin. (Mateo 5:44) Say sakey a paraan a nagagawaan ko iya et diad panginanabang kod maong a balita na Panarian na Dios. Naliliketan ak no nanenengneng ko ya lapud sayan kimey et walay kareenan tan liket na totoo, tan naiikdan iray tuan ilalo.

Mareen lay nonot ko natan ta inmatalek ko lad si Jehova so amin a bengatla. Kombinsido ak ya bilang Manamalsa, agto abuloyan ya tuloytuloy a naabuso iray ayayep tan totoo odino paulyanan ton naderal so balibalin planeta tayo. Imbes, asingger to lan apigeren so amin ya aderal panamegley na Panarian to. (Isaias 11:1-9) Naliliketan ak ya maong lapud agko labat naaralan irayan katuaan, natutulongan ko met so arum ya nawalaay pananisia ed saraya. Agko la natan iisipen ya kaukolan kon umaney mundo.