1, 2. Dikon nos mester mira orashon komo un gran privilegio, i dikon nos mester sa kiko Beibel ta siña tokante orashon?

KOMPARÁ ku e universo inmenso, tera ta masha chikí. De echo pa Yehova, “Esun ku a traha shelu i tera,” e nashonnan ta manera un gota di awa for di un hèmber. (Salmo 115:15; Isaias 40:15) Pero tòg Beibel ta bisa: “SEÑOR ta serka di tur esnan ku ta sklama na dje, serka di tur esnan ku ta sklama na dje den bèrdat. E lo kumpli ku e deseo di esnan ku ta tem’é; tambe e lo tende nan sklamashon.” (Salmo 145:18, 19) Imaginá bo kiko esei ta nifiká! E Kreadó todopoderoso ta serka di nos i lo tende nos si nos “sklama na dje den bèrdat.” Ta un gran privilegio nos tin di por hasi orashon na Dios!

² Sin embargo, si nos ke pa Yehova skucha nos orashonnan, nos tin ku resa na dje den e manera ku e ta aprobá. Kon nos por hasi esaki a ménos ku nos ta komprondé loke Beibel ta siña tokante orashon? Ta sumamente importante anto pa nos sa kiko e Skritura ta bisa riba e tópiko aki, pasobra orashon por yuda nos hala mas serka di Yehova.

3. Menshoná un motibu importante pakiko nos lo mester hasi orashon na Yehova.

³ Un motibu importante pakiko nos lo mester hasi orashon  na Yehova ta ku e mes ta invitá nos pa hasi esei. Su Palabra ta animá nos: “No preokupá pa nada; ma den tur kos, pa medio di orashon i súplika ku gradisimentu, laga boso petishonnan ta konosí dilanti di Dios. I e pas di Dios, ku ta surpasá tur komprondementu, lo warda boso kurason i boso mente den Kristu Hesus.” (Filipensenan 4:6, 7) Sigur nos lo no ke ignorá un areglo asina bondadoso ku e Gobernante Supremo di universo a hasi pa nos!

4. Kon orashon regular na Yehova ta fortalesé bo relashon kuné?

⁴ Un otro motibu pa resa ta ku hasimentu di orashon riba un base regular na Yehova ta un manera pa fortalesé nos relashon kuné. Berdadero amigunan no ta komuniká ku otro solamente ora nan tin mester di algu. Mas bien, bon amigu ta interesá den otro, i nan amistat ta bira mas fuerte segun ku nan ta ekspresá nan pensamentunan, preokupashonnan i sintimentunan libremente. Den algun aspekto, e situashon ta kasi meskos pa loke ta nos relashon ku Yehova Dios. Ku yudansa di e buki aki, bo a haña sa hopi kos ku Beibel ta siña tokante Yehova, tokante su personalidat i su propósito. Bo a siña konos’é komo un berdadero persona. Orashon ta  duna bo e oportunidat di ekspresá bo pensamentunan i sintimentunan di mas íntimo na bo Tata selestial. Segun ku bo ta hasi esei, bo ta hala mas serka di Yehova.—Santiago 4:8.

5. Kiko ta mustra ku Yehova no ta skucha tur orashon?

⁵ Yehova ta skucha tur orashon? Wak kiko el a bisa e israelitanan rebelde den tempu di profeta Isaias: “Maske boso hasi hopi orashon, lo mi no skucha. Boso mannan ta yen di sanger.” (Isaias 1:15) Pues, sierto akshonnan por pone ku Dios no ta skucha nos orashonnan. P’esei pa Dios tende nos orashonnan ku aprobashon, nos tin ku kumpli ku algun rekisito básiko.

6. Pa Dios por skucha nos orashonnan, kiko ta e rekisito prinsipal, i kon nos por kumpli kuné?

⁶ Un rekisito prinsipal ta ku nos mester tin fe. (Mateo 21:22) Apòstel Pablo a skirbi: “Sin fe ta imposibel pa agrad’é [Dios], pasobra esun ku bin serka Dios mester kere ku e ta, i ku e ta Esun ku ta rekompensá esnan ku ta busk’é.” (Hebreonan 11:6) Berdadero fe no ta djis sa ku Dios ta eksistí i ku e ta tende i kontestá orashon. Nos ta demostrá nos fe pa medio di nos akshonnan. Nos tin ku duna evidensia kla ku nos tin fe na e manera ku nos ta hiba nos bida tur dia.—Santiago 2:26.

7. (a) Dikon nos mester mustra rèspèt ora nos ta papia ku Yehova den orashon? (b) Ora nos ta resa na Dios, kon nos por mustra humildat i sinseridat?

⁷ Un otro rekisito di Yehova ta ku hendenan ku ta hasi orashon na dje mester hasié ku humildat i sinseridat. I nos tin motibu pa ta humilde ora nos ta papia ku Yehova, no ta bèrdat? Ora hende haña e oportunidat di papia ku un rei òf un presidente, nan ta hasi esei por lo general ku hopi rèspèt, dunando rekonosementu na e posishon haltu di e gobernante. Kuantu mas rèspèt nos lo mester mustra ora nos ta aserká Yehova! (Salmo 138:6) De echo, e ta “Dios Todopoderoso.”  (Génesis 17:1) Ora nos ta hasi orashon na Dios, e manera ku nos ta aserk’é mester demostrá ku humildemente nos ta rekonosé nos posishon dilanti dje. Tal humildat lo motivá nos tambe pa resa di kurason ku sinseridat, evitando orashonnan rutinario ku ta keda ripití mesun kos.—Mateo 6:7, 8.

8. Kon nos por aktua na armonia ku loke nos ta pidi den orashon?

⁸ Un otro rekisito pa Dios tende nos ta ku nos mester aktua na armonia ku nos orashonnan. Yehova ta ferwagt di nos ku nos ta hasi tur loke ta na nos alkanse pa traha konforme loke nos ta pidi p’e. Por ehèmpel, si nos ta pidi den orashon: “Duna nos awe nos pan di kada dia,” nos mester traha duru den kualke trabou ku ta disponibel ku nos por hasi. (Mateo 6:11; 2 Tesalonisensenan 3:10) Si nos ta pidi Dios yudansa pa vense un debilidat di karni, nos mester sòru evitá sirkunstansia i situashonnan ku lo por hiba nos den tentashon. (Kolosensenan 3:5) Fuera di e rekisitonan básiko aki, tin preguntanan tokante orashon ku nos mester haña kontesta riba nan.

9. (a) Na ken nos mester hasi orashon, i den nòmber di ken? (b) Kiko ke men hasi orashon den nòmber di Hesus?

⁹ Na ken nos mester hasi orashon? Hesus a siña su siguidónan hasi orashon na “nos Tata ku ta den shelu.” (Mateo 6:9) Pues anto nos orashonnan mester ta dirigí solamente na Yehova Dios. Sin embargo, Yehova ta rekerí pa nos rekonosé e nòmber òf posishon di su Yu unigénito, Hesukristu. Manera nos a siña den Kapítulo 5, Dios a manda Hesus na mundu pa sirbi komo un reskate pa libra nos di piká i morto. (Juan 3:16; Romanonan 5:12) Hesus ta esun nombrá komo Sumo Saserdote i Hues. (Juan 5:22; Hebreonan 6:⁠20) P’esei e Skritura ta manda nos ofresé nos orashonnan pa medio di Hesus. Hesus mes a bisa: “Ami ta e kaminda, i  e bèrdat, i e bida; ni un hende no ta bin serka e Tata, sino pa medio di mi.” (Juan 14:6) Pa Dios tende nos orashonnan, nos tin ku hasi orashon solamente na Yehova pa medio òf den nòmber di su Yu.

10. Dikon nos no mester di ta den un posishon òf postura spesífiko ora nos ta hasi orashon?

¹⁰ Nos kurpa mester ta den un posishon spesial ora di hasi orashon? Nò. Yehova no ta rekerí ningun posishon spesífiko, sea di man òf di henter e kurpa. Beibel ta siña ku ta aseptabel pa hasi orashon den diferente posishon. Esakinan ta inkluí sintá, di bùig, na rudia i pará. (1 Krónikanan 17:16; Nehemias 8:6; Daniel 6:10; Marko 11:25) Loke ta realmente importante no ta un òf otro postura ku otro hende por mira, sino e aktitut korekto di kurason. De echo, durante nos aktividatnan diario òf ora nos ta konfrontá un emergensia, nos por hasi un orashon silensioso na unda ku nos ta. Yehova ta tende orashonnan asina maske hende rònt di nos kisas no a ripará mes ku nos a hasi orashon.—Nehemias 2:1-6.

11. Menshoná algun asuntu personal ku apropiadamente nos por hasi orashon tokante nan.

¹¹ Kiko nos por pidi p’e den orashon? Beibel ta splika: “Si nos pidi kualkier kos konforme su boluntat, e [Yehova] ta tende nos.” (1 Juan 5:14) Pues nos por pidi den orashon kualke kos ku ta na armonia ku Dios su boluntat. Akaso ta su boluntat pa nos hasi orashon tokante asuntunan personal ku ta molestiá nos? Sigur ku sí! Hasi orashon na Yehova por ta kasi meskos ku papia ku un amigu íntimo. Nos por papia abiertamente, i ‘drama nos kurason’ na Dios. (Salmo 62:8) Ta na su lugá pa nos pidi pa haña spiritu santu, pasobra e lo yuda nos hasi loke ta korekto. (Lukas 11:13) Tambe nos por pidi guia pa tuma desishonnan sabí i pa haña fortalesa pa trata ku difikultatnan ku éksito. (Santiago 1:5) Ora nos peka, nos mester pidi pordon a base di Kristu su sakrifisio.  (Efesionan 1:​3, 7) Klaru ku nos no mester hasi orashon tokante nos asuntunan personal so. Nos mester amplia nos orashonnan i pidi tambe pa otro hende: miembronan di famia i tambe pa rumannan den fe.—Echonan 12:5; Kolosensenan 4:12.

12. Kon nos por duna asuntunan relashoná ku nos Tata selestial e lugá mas importante den nos orashonnan?

¹² Asuntunan relashoná ku Yehova Dios mester ta di promé importansia den nos orashonnan. Nos sigur tin motibu pa ekspresá alabansa i gradisimentu sinsero na Yehova pa tur su bondat. (1 Krónikanan 29:10-13) Hesus a duna e orashon modelo, ku ta pará skirbí na Mateo 6:9-13. Den e orashon ei el a siña nos pidi pa Dios su nòmber sea santifiká, es desir, tratá komo santu òf sagrado. Despues el a menshoná pa Dios su Reino bin i pa su boluntat sosodé na tera meskos ku den shelu. Ta ora el a kaba di trata e asuntunan importante aki relashoná ku Yehova, Hesus a duna atenshon na asuntunan personal. Pues, ora nos tambe ta duna Dios e lugá mas importante den nos orashonnan, nos ta demostrá ku nos ta interesá den mas ku solamente nos propio bienestar.

13. Kiko e Skritura ta indiká tokante e largura di orashonnan aseptabel?

¹³ Kon largu nos orashonnan mester ta? Beibel no ta pone ningun límite na kon largu orashonnan priva òf públiko mester ta. Nan por varia di un orashon kòrtiku promé ku kome te na un orashon largu den privá ora ku nos ta drama nos kurason na Yehova. (1 Samuel 1:12, 15) Sin embargo, Hesus a kondená personanan hustu den nan mes bista ku tabata hasi orashonnan largu pa broma dilanti di otro hende. (Lukas 20:46, 47) Orashonnan asina no ta impreshoná Yehova. Loke ta importante ta pa nos hasi orashon di kurason. Pues, e largura di orashonnan aseptabel por varia segun e nesesidat i sirkunstansia.

14. Kiko Beibel ke men ora e ta animá nos pa “hasi orashon tur ora bai,” i ki konsuelo esaki ta duna nos?

 ¹⁴ Ku ki frekuensia nos mester hasi orashon? Beibel ta animá nos pa “hasi orashon tur ora bai,” pa ta “dediká na orashon” i pa “hasi orashon sin stòp.” (Lukas 18:1; Romanonan 12:12; 1 Tesalonisensenan 5:17) Klaru ku e deklarashonnan aki no ke men ku nos mester ta resando na Yehova na tur momentu di dia. Mas bien, Beibel ta urgi nos pa hasi orashon ku regularidat, gradisiendo Yehova kontinuamente pa su bondat mustrá na nos i akudiendo na dje pa guia, konsuelo i fortalesa. Ta un gran konsuelo pa sa ku Yehova no ta pone límite na kon largu òf kuantu biaha nos por papia kuné den orashon, no ta asina? Si di bèrdat nos ta apresiá e privilegio di orashon, nos lo haña hopi oportunidat pa hasi orashon na nos Tata selestial.

15. Dikon nos mester bisa “Amèn” na final di orashonnan personal òf públiko?

¹⁵ Dikon nos mester bisa “Amèn” na final di un orashon? E palabra “amèn” ta nifiká “siguramente” òf “sea asina.” Tin ehèmpelnan den Beibel ku ta mustra ku ta apropiá pa bisa “Amèn” na final di orashonnan personal òf públiko. (1 Krónikanan 16:36; Salmo 41:13) Dor di bisa “Amèn” na final di nos propio orashon, nos ta konfirmá ku nos ekspreshonnan tabata hasí ku sinseridat. Ora nos bisa “Amèn”—sea silensiosamente òf na bos haltu—na final di un persona su orashon públiko, nos ta indiká ku nos ta di akuerdo ku e pensamentu ku el a ekspresá.—1 Korintionan 14:16.

16. Ki siguransa nos por tin relashoná ku orashon?

¹⁶ Yehova realmente ta kontestá orashon? Sigur ku sí! Nos tin un base firme pa ta sigur ku Esun “ku ta skucha orashon” ta kontestá orashonnan sinsero di miónes di hende. (Salmo 65:2) Yehova por kontestá nos orashonnan den vários manera.

17. Dikon nos por bisa ku Dios ta usa su angelnan i su sirbidónan riba tera pa kontestá nos orashonnan?

 ¹⁷ Yehova ta usa su angelnan i su sirbidónan riba tera pa kontestá orashon. (Hebreonan 1:13, 14) Tin hopi eksperensia di personanan ku a resa pidi Dios yudansa pa komprondé Beibel i ku poko despues un sirbidó di Yehova a tuma kontakto ku nan. Eksperensianan asina ta duna prueba ku angelnan ta dirigí e trabou di prediká e Reino. (Revelashon 14:6) Pa kontestá e orashonnan ku nos hasi den un momentu di berdadero nesesidat, Yehova por  motivá un kristian pa bin yuda nos.—Proverbionan 12:25; Santiago 2:16.

18. Kon Yehova ta usa su spiritu santu i su Palabra pa kontestá orashon di su sirbidónan?

¹⁸ Yehova Dios ta usa tambe su spiritu santu i su Palabra, Beibel, pa kontestá orashon di su sirbidónan. Kisas e ta kontestá nos petishon pa haña yudansa pa trata ku situashonnan difísil, dor di duna nos guia i fortalesa mediante su spiritu santu. (2 Korintionan 4:7) Hopi bes e kontesta riba nos petishon pa haña guia ta bin for di Beibel, mediante kua Yehova ta duna nos yudansa pa tuma desishonnan sabí. Nos por haña tekstonan bíbliko práktiko durante nos estudio di Beibel personal i segun ku nos ta lesa publikashonnan kristian, manera e buki aki. Ademas puntonan bíbliko ku nos mester tene kuenta kuné por ser tresé na nos atenshon via loke ta ser bisá na un reunion di kongregashon òf via e remarkenan di un ansiano di kongregashon ku ta interesá den nos bienestar.—Galationan 6:1.

19. Kiko nos mester kòrda si tin biaha ta parse ku nos no ta haña kontesta riba nos orashonnan?

¹⁹ Si ta parse ku Yehova ta tarda pa kontestá nos orashonnan, esaki nunka ta pasobra e no por kontestá nan. Mas bien nos tin ku kòrda ku Yehova ta kontestá orashon di akuerdo ku su boluntat i na su debido tempu. E konosé nos nesesidatnan i sa kon pa atendé nan hopi mas mihó ku nos mes por. Hopi biaha e ta permití nos sigui ‘pidi, buska i  bati.’ (Lukas 11:5-10) E perseveransia ei ta mustra Dios ku nos deseo ta profundo i ku nos fe ta berdadero. Ademas, kisas Yehova ta kontestá nos orashonnan den un manera ku no ta bisto pa nos. Por ehèmpel, kisas e ta kontestá nos orashon relashoná ku un sierto prueba difísil, no dor di kita e difikultat, sino dor di duna nos e fortalesa pa soport’é.—Filipensenan 4:13, NW.

20. Dikon nos tin ku probechá plenamente di e presioso privilegio di orashon?

²⁰ Nos mester ta masha gradisidu ku e Kreadó di e inmenso universo aki ta serka di tur ku ta sklama na dje na e manera korekto den orashon. (Salmo 145:18) Laga nos probechá plenamente di e presioso privilegio di orashon. Si nos hasi esei, nos lo tin e speransa gososo di hala mas i mas serka di Yehova, Esun ku ta skucha orashon.