Bo ta di akuerdo ku esei? Meskos ku Samantha, nos tur a yega di haña nos den un pèrtá òf situashon difísil. Pero, e manera ku nos ta reakshoná den un situashon asina ta mustra ki tipo di hende nos ta. Por ehèmpel, si tur loke nos ta interesá den dje ta pa skapa kara, nos por pensa ku falta di onrades ta un manera hustifiká pa saka nos for di un pèrtá. Pero, ora bèrdat sali na kla, nos lo tin ku enfrentá e konsekuensianan. Laga nos konsiderá algun di nan.

Un relashon òf amistat entre dos persona ta basá riba konfiansa. Ora nan ta konfia otro, nan ta sinti nan mes safe. Pero, e konfiansa ei no ta bini di un dia pa otro. E ta krese ora nan ta pasa tempu huntu, ta papia habrí ku otro i ta trata otro sin egoismo. Ma un solo mentira òf kualke otro akto desonesto por kibra e konfiansa ei. Anto ora e konfiansa ei kibra, ta masha difísil pa hañ’é atrobe.

Un persona ku bo a kere ta bo bon amigu a yega di engañá bo? Si ta asina, kon bo a sinti bo? Kasi sigur bo a sinti bo di hùrt òf asta traishoná. Esei ta di komprondé. Pues sin duda, falta di onrades por destruí e relashonnan di mas será.

Un estudio ku Robert Innes, un profèser di ekonomia na e Universidat di California, a hasi a indiká ku “desonestidat ta kontagioso.” Bo por kompar’é ku un vírùs. Mas bo anda ku un persona ku ta desonesto, mas chèns bo tin di ‘pega’ ku desonestidat.

Kon anto bo por evitá di bira desonesto? Beibel por yuda bo. P’esei, laga nos konsiderá algun prinsipio di Beibel.