Diabel ta un kriatura spiritual ku ta biba den un region invisibel. Sinembargo, e lugá ei no ta un fièrnu di kandela kaminda e ta laga hende malbado sufri, manera e plachi den e artíkulo akí ta mustra.

“Guera den shelu”

 Un tempu, Satanas e Diabel tabata move libremente den e region spiritual i tabata presentá tambe dilanti di Dios huntu ku e angelnan fiel. (Yòb 1:6) Pero Beibel a profetisá ku lo tin un ‘guera den shelu,’ i komo resultado Satanas a ser saká for di shelu i “bentá abou riba tera.” (Revelashon 12:7-9) Tantu kronologia di Beibel komo susesonan mundial ta konfirmá ku e guera den shelu a tuma lugá kaba. Awor Diabel ta restringí na bisindario di tera.

 Esei ta nifiká ku Diabel ta biba na un lugá spesífiko riba nos planeta? Por ehèmpel, Beibel ta bisa ku e stat antiguo di Pérgamo tabata “kaminda e trono di Satanas ta” i “kaminda Satanas ta biba.” (Revelashon 2:13) E ekspreshonnan ei muy probablemente ta referí na e echo ku hopi hende tabata praktiká ritonan satániko den e stat ei. Beibel ta bisa ku Diabel ta goberná riba “tur e reinonan di e tera habitá.” Pues, e no ta biba na niun lugá spesífiko riba tera, sino e ta restringí na bisindario di tera.—Lukas 4:5, 6.