1-3. Ngera el omelsemai a lechelebangel a rebechiil el chad? (Momes er a siasing er a uchelel a suobel.)

 A CHAD el mla bechiil el 38 el rak a dmu el kmo: “Sel leblak a rengum el ochotii el kmo ngmera el soam a chebechiielem a bo lungil, e ngmo sebechem el dmeu a rengum er a klengeltengat er a Jehovah.” Nguaisei, ngkmal sebechir a rubekel el mo dmeu a rengrir el dmak e dirrek el kaingeseu er a chelsel a meringel el taem er a klengar er tir.​—Osi. 18:22.

² A bek el chebechiil a di mo chelebangel a meringel el mondai a lebebil er a taem. A Biblia a mesaod er ngii el kmo: Te “mo metik a rengelel a klechad.” (1 Ko. 7:28) E ngera uchul? E le mondai er a bek el sils a sebechel el mo uchul a ringelel a uldasu er a chelsel a chebechiil. A rubekel a diak lemecherrungel me ngsebechir el mo dmung a tekoi el mo uchul a kngtil a rengrir me a lechub e ngmo er ngii a rraurreng er a delongelir. (Jak. 3:2, 5, 8) A rebetok el obekel a kmal meringel el oureor e dirrek el oungalek. Me a ringelel a uldasu me tir el kmal skareter a sebechel el mo uchul e ngmo diak a temir el melisiich er a chebechiielir. A klou el belsir me a secher me a lmuut el bebil er a tekoi a sebechel el choitechetur a bltikerreng me a omengull er a delongelir. Me a lmuut el tang, a chebechiil el ua lemesisiich a  sebechel el metemall el okiu a “urerel a klechad” el uldimukl er ngii a deleboes el omeruul, me a klekad, me a klauketui, me a klakoad, me a chelechei, me a ngasecherreng, me a klekakeakl.​—Gal. 5:19-21.

³ Nglmuut el kmal meringel a blekeradel er chelechang, e le kede kiei er a uriul sils el rechad a di melatk er a di tir e diak loba omengull el bedul a Dios. E aikang a blekeradel el sebechel el tomall a chebechiil. (2 Ti. 3:1-4) Me a lmuut el tang, ngar er ngii a kmal mekngit el cheraro el di soal el melemall a chebechiil. Me a apostol el Paulus a omeklatk er kid el kmo: “A cherrouiu, el Diabelong, a omibais el mol mei el ua ongumk el laion el osiik er a bo lomerkakl er ngii.”​—1 Pe. 5:8; Och. 12:12.

4. Ngmekerang e sebechel el mo ungil e mesisiich a chebechiil?

⁴ A ta el bechiil el chad er a Siabal a kmo: “Ngkmal mle klou a mondai er ngak el kirel a udoud. E dimlak a ungil el cheldecheduch er a delongelek ngak me a bechik me nguchul e ngdirrek el kmal mlo meringel a uldesuel. Me a lmuut el tang, ngmlo smecher er a oberaod el rakt. Me a lebebil er a taem e aika el meringel el uldesuam a rirellemam el mo kautoketok.” Me alta ngmo er ngii a mondai er a chebechiil, engdi ngsebeched el mo sumechokl ngii el mondai. Ngokiu a ngelsuil a Jehovah e a rubekel a sebechir el mo dmeu a rengrir er a ungil e mesisiich el chebechiielir. (Monguiu er a Psalm 127:1.) Me bo dosaod a eim el rolel e ngsebechel el meteketek a mesisiich e ungil el chebechiil. Kede dirrek el mo mesaod er sel uchul me a bltikerreng a kirel el ngar er a chelsel a chebechiil el rullii me ngungil e mesisiich el chebechiil.

5, 6. Te mekerang a rubekel e osisebii a Jehovah er a chelsel a chebechiielir?

⁵ A lsekum a rubekel a blak a rengrir el olengesenges er a Jehovah e ngmo mesisiich a uchetemel a chebechiielir. (Monguiu er a Olisechakl 4:12.) Me sel loltirakl a ulekrael er a Jehovah e ngmo sebechir el osisebii a Dios er a chelsel a chebechiielir. A Biblia a kmo: “Kom mo rongesii a ngor el di ngar ulliu el kmo, ‘Tiakid a rael el bo mokiu ngii,’ sel bo metetuchakl el mor a kadikm ma lechub e kom mor a katur.” (Isa. 30:20, 21) Me chelecha el taem e a rubekel a ‘rongesii a ngerel’ a Jehovah sel ledak el terung el menguiu er a Biblia. (Psa. 1:1-3) Te lmuut el smisichii a chebechiielir sel ledak el meruul er a omengull el telungalek er tir el ngii a mo uchul a deurreng e dirrek el melisiich er tir. E sel ledak el meluluuch er a bek el sils e te toketekii a chebechiielir el mo mesisiich me ngsebechir el oltngakl a odechelakl er tia el beluulechad er a Satan.

⁶ A Gerhard er a beluu er a Dois a dilu el kmo: “Sel lebo er ngii a mondai me bo lak a deurreng er a chebechiielam me a lechub e ngmo mekngit a rolel a cheldecheduch e a omellach er a Tekingel a Dios a ngosukemam el mo oba kllourreng e dirrek el mo sebecham el kausubes.” Ngmelekoi el kmo aika el blekeradel a kmal meklou a ultutelel er a chelsel a ungil el chebechiil. Me a lsekum a rubekel a melasem el olsiseb er a Jehovah er a chelsel a chebechiielir e dmak el mesiou er ngii, e te melemolem el kmeed er ngii e dirrek el lmuut el smisichii a chebechiielir.

7. Ngkirel el ua ngerang a omerellel a bechiil el sechal el mo er a bechil?

⁷ Sel rolel er a bechiil el sechal a lomtebechel er a telungalek er ngii a sebechel el toketekii a mesisiich e ungil el chebechiil. A Biblia a kmo: “A bderrir a re bek el chad a Kristus, e a bdelul a redil a bechil.” (1 Ko. 11:3) Me tiang ngera belkul? Ngbelkul a kmo a omerellir a rebechiil el sechal el mo er a rebecherir a kirel el mo ua omerellel a Jesus el mo er a redisaiplo er ngii. Ngdimlak a ta el bo lemekngit a tekingel me a omerellel el mo er tir. Ngbai di mle blechoel el  oubltikerreng, e oba delemedemek, e ngariou a rengul, e tabesul a omerellel el mo er tir.​—Mt. 11:28-30.

8. Ngmekerang a bechiil el sechal e nguu a omengull me a bltikerreng er a bechil?

⁸ A rebechiil el sechal el Kristiano a kmal diak el kirir el di mengerechir er a rebecherir el mo mengull er tir. A Biblia a melekoi er a rebechiil el sechal el kmo: “Bo mkerekikl el omekerreu er a rebechemiu, e mungil e mongull er tir ele te mechitechut er kemiu.” (1 Pe. 3:7) Me ngkirel a bechiil el sechal el osisiu a omerellel el omekerreu e olecholt a omengull el mo er a bechil a lengar er a buai me a dirrek el blai. Me a omerellel me a tekingel el mo er a bechil a kirel el ochotii el kmo ngomes er a bechil el redil el kmal mekreos. (Osi. 31:28) Me sel lungil a omerellel el mo er ngii, e a bechil a lmuut el mo betik a rengul er ngii e oba omengull el bedul ngii, e a Jehovah a mo omekngeltengat er a chebechiielir.

9. Ngmekerang a bechiil el redil e ochotii el kmo ngchederedall er a bechil?

⁹ A dmolech el bltkil a rengud el mo er a Jehovah el mengai a uchetemel er a llechul a ngosukid el ngmai a rengud “el mor iou, er cheungel a mesisiich el chimal a Dios.” (1 Pe. 5:6) Me a klou a ultutelel el rolel e a bechiil el redil a ochotii a omengull er ngii el mo er a omengederederel a Jehovah, a sel lolengesenges er a bechil. A Biblia a kmo: “Re bechiil el redil moltubokl er kemiu er a re bechemiu, ele ng kiriu el ua isei ele kom oltirakl er a Rubak.” (Kol. 3:18) Ngmera el tekoi, a bechiil el redil a locha mo diak el soal a rokui el uldesuel a bechil. Engdi a lsekum a uldesuel a diak lomtok a llechul a Dios e a bekongesenges el redil a kirel el melemolem el oltirakl er a uldesuel a bechil.​—1 Pe. 3:1.

10. Ngera uchul me a blekongesenges a klou a ultutelel?

¹⁰ A Jehovah a mla mesterir a rebechiil el redil a ileakl el ngerechelir er a chelsel a telungalek. A bechiil el redil a ‘kldemel’ a bechil. (Mal. 2:14) Sel loruul a telbiil el telungalek, e a bechiil el redil a oba omengull el ouchais aike el ngar er a uldesuel me a rengul engdi ngmelemolem el chederedall er a bechil. E a mellomes a rengul el bechiil el sechal a kerekikl el rongesii a uldesuel a bechil. (Osi. 31:10-31) A blekongesenges er a bechiil el redil a mo uchul a deurreng me a  budech me a kltarreng er a chelsel a telungalek. Tiang a mo uchul me a rubekel a mo ungil a uldesuir e le te medengei el kmo te meruul a tekoi el oldeu er a rengul a Dios.​—Efe. 5:22.

11. Ngera uchul me a klausubes a klou a ultutelel?

¹¹ A rubekel a kmal kirir el mo blechoel el kausubes me lolemolem el ungil a chebechiielir. Sel leblechoel el ‘kausubes a mlo mekngit er a delongelir,’ e nguchul a omelisiich er a chebechiielir. (Kol. 3:13) Engdi ngmo mechitechut a chebechiil a lsekum a rubekel a di melatk a cheleuid er a delongelir e ousbech aika el tekoi el mo uchul a klautoketok er a delongelir. Me ngdi ua urrael er a kboub el sebechel el choitechetur a klou el blai, e a klengiterreng me a ngasecherreng a rulleterir a rubekel me ngmo diak el sebechir el dmak el oureor e kausubes er a delongelir. Engdi a chebechiil a lmuut el mo mesisiich a lsekum a rubekel a kausubes er a delongelir el ua Jehovah el lousubes er tir.​—Mik. 7:18, 19.

12. Ngmekerang a bltikerreng e sebechel el “dokedek a betok el klengit”?

¹² A mera el bltikerreng a “diak longemekl,” e ngbai sebechel el “dokedek a betok el klengit.” (1 Ko. 13:4, 5; monguiu er a 1 Petrus 4:8.) Me a lsekum ngbetik a rengud er a chad, e ngdiak a telkelel a klausubes er kid el mo er ngii. A Petrus er a loker er a Jesus el kmo ngkirel el mo tela el taem el lousubes, e ngdilu er ngii el kmo: “Ng diak di leuid, ng bai mo okeuid el euid el chachisois.” (Mt. 18:21, 22) Me ngera mle belkul a tekingel a Jesus? Ngbelkul a kmo ngkirel el diak a telkelel a ildisel a taem el Kristiano a ousubes er a rechad.​—Osi. 10:12. *

13. Ngerang a ngosukid me ngmo sebeched el ousubes?

¹³ A Annette el redil er a Dois a kmo: “A lsekum a rubekel a diak lekengei el kausubes, e a kltui a mukeroul e mo diak a klaumerang er a delongelir, e tiang a kmal klou a letemellii er a chelsel a chebechiielir. Engdi sel lekausubes e ngsmisichii a chebechiielir e okesengii a deleuill er tir el terung.” Me a leuaisei, e bo blechoel el ‘mereng a saul’ e mosiik a bek el techall el mo chemat er a bechim. Sel moruul el uaisei, e tiang a ngosukau me ngmo sebechem el ousubes. (Kol. 3:15, BT) Tiaikid a rolel e ngmo er ngii a budech me a kltarreng er a delongeliu el obengkel a kengei er a Dios.​—Rom 14:19.

14, 15. Ngerang a uleklatk er a Jesus el medung er a Lukas 6:31, e mekerang a doltaut er ngii er a chelsel a chebechiieled?

¹⁴ Kau a ulterekokl el soam a rechad a lungil a omerellir e lolecholt a omengull el eko er kau. Ngmo ungil a rengum a lsekum a rechad a rongesau e dirrek el omekerreu er kau. Engdi ngmla ta el mrengesii a chad el melekoi el kmo, “Chelechang e ak mo remuul a tekoi el mo er ngii el di uaike el tekoi el leriruul el me er ngak”? A lebebil er a taem e kede mo omdasu el uaisei, engdi a Biblia a kmo: “Lak mdu el kmo, ‘Ak mo remuul el mor ngii a ikei el le riruul el mer ngak.’” (Osi. 24:29) A Jesus a ullisechakl er a rechad er a kot el ungil el rolel a losmechokl a chouaika el meringel el blekeradel. Ngdilu el kmo: “Moruul el mor a re chad a ikel somiu a loruul el ekor kemiu.” (Lk. 6:31) Me ngosisecheklid el kmo ngbai kired el meruul aike el tekoi el soad a rechad a loruul el me er kid. Me a lsekum ngsoad a bo lungil a chebechiieled e ngkirel a tekoi el doruul el mo uchul e ngmelisiich er ngii.

¹⁵ A rubekel a lmuut el smisichii a chebechiielir sel leblak a rengrir el kaukerreu. A bechiil  el sechal el ngar er a South Africa a kmo: “Aki melasem el oltaut er tia el uleklatk er a Jesus er a chelsel a chebechiielam. A lebebil er a taem e aki mo kaiuengasechereng, engdi aki blechoel el melasem el olecholt a omengull er a delongelam.”

16. Ngera el tekoi a diak el kirir a rubekel el meruul?

¹⁶ Lak di mouchais a chelitechetul a bechim el mo er a rechad me a lechub e moumondai el kirel aike el chetim el omerellel me a lechub e moungelakel el ousbech aika el tekoi. E lak mobes, a chebechiielem a diak el tekoi er a klaiuechit el kmo ngtecha mesisiich er kemiu el terung e sebechel el oldiu el klou a ngerel, me a lechub e ngtecha er kemiu a sebechel el mera el tomellii a rengul a tang. Ngmera el tekoi, kede rokui el diak demecherrungel me a lebebil e ngmo er ngii a ngasechereng er a delongeled, engdi ngkmal diak a llemeltel a bechiil el sechal me a lechub e ngredil el meruul er a tang el mo merur, e melekoi a mekngit me a lechub e ngoldubech, e mengelebed er a tang.​—Monguiu er a Osisechakl 17:27; 31:26.

17. Te mekerang a rebechiil el sechal e oukerebai er a uleklatk er a Jesus el medung er a Lukas 6:31?

¹⁷ Ngar er a bebil el beluu, e a resechal a omecheracheb e mengelebed er a rebecherir el di olecholt er a klisichir. Engdi a Biblia a kmo: “A klou a rengul a kuk ungil er a mesisiich el chad; me ngikel orekedii a rengul a kuk ungil er a chad el melai a beluu.” (Osi. 16:32) A chad a kirel el blak a rengul el omtebechel er a uldesuel el rullii el mo klou a rengul el ua Jesus Kristus, el ngike el kot el ungil el chad el mla kiei er a chutem. A chad el mekngit a tekingel e mengelebed er a bechil a mechitechut, e ulterekokl el mo oridii a deleuill er ngii me a Jehovah. A David el ngii a mle mesisiich e bekeu el chad a kmo: “Sel bo louedikel a rengum, e lak bor a klengit; mongedecheduch er a rengum er a dukllem, e bo mchelellakl.”​—Psa. 4:4.

18. Ngera uchul me ngklou a ultutelel el dolecholt er a bltikerreng?

¹⁸ Monguiu er a 1 Korinth 13:4-7. A bltikerreng a kot el klou a ultutelel el blekeradel el kirel el ngar er ngii er a chelsel a chebechiil. A Biblia a kmo: “Mochotii er a klengar er kemiu a klechubechub, ma blekokuiirreng, ma klengariourreng, ma delemedemekerreng, ma kllourreng. E a ngar uchei, e bo mkaubltikerreng, ele bltikerreng a semesemel a rokui el tekoi el kmal mo ungil el uldak.” (Kol. 3:12, 14) Me a rubekel a kirir el dul kaubltikerreng e oukerebai er a Jesus Kristus el ngii a kilengei el tongetengii a klengar er ngii el kirir a rechad. Me a chebechiil el meteketek el okiu a bltikerreng a mo sebechel el outekangel a chelitechetul a chad, me a secher, me a mondai er a udoud me a dirrek el klekakebosech er a uldasu er a delongelel a bechiil el chad me a rechad er a blil a bechil.

19, 20. (a) Te mekerang a rubekel e toketekii a mesisiich e ungil el chebechiil? (b) Ngera kede mo mesaod er a ongingil el suobel?

¹⁹ A bltikerreng, me a blakerreng, me a ungil el omeruul a kmal usbechall el mo uchul a ungil el chebechiil. Me sel lebo er ngii a chetituokel e ngdiak el kirir a rebechiil el chad el mo kebii, e bai kmal kirir el melemolem el olekes er a chebechiielir. A rubekel el kaubltikerreng e dul betik a rengrir er a Jehovah a kirir el dmak el mesmechokl a mondai er tir, e le “bltikerreng a diak bo le ngemed.”​—1 Ko. 13:8; Mt. 19:5, 6; Heb. 13:4.

²⁰ Ngkmal meringel el meteketek a mesisiich e ungil el chebechiil er chelecha el taem er a ulebongel. (2 Ti. 3:1) Engdi ngokiu a ngelsuil a Jehovah e ngsebechel el meteketek. Me nguaisei, engdi a rubekel a dirk kirir el oltngakl er a uldasu er tia el beluulechad el di melisiich a tekoi er a cheliuaiu. Me a ongingil el suobel e kede mo mesaod er a rolel e ngsebechir a rubekel el mo ungil el omekerreu er a chebechiielir.