Es eena fa emma jerat, wan eena ieescht Jesus aunjenomen haft?

AUFSPÄLEN

Waut de Schreft doatoo sajcht

Nä, de Schreft sajcht nich, daut eena fa emma jerat es, wan eena ieescht Jesus aunjenomen haft. Een Mensch, waut derch sienen Gloowen aun Jesus Christus jerat woat, kaun vom Gloowen auffaulen un doamet de Radunk vespälen. De Schreft sajcht, daut et needich es, “fa dän Gloowen to kjamfen”; eena mott sikj aulsoo aunstrenjen, om em Gloowen to bliewen (Judas 3, 5, PB). Un de Christen von ieeschtemma, waut Jesus aul aunjenomen hauden, wort toojerot: “Schauft met ferchten un zetren, daut jie seelich woaren” (Filippa 2:12, PB).

Bibelvarzhen, waut bewiesen, daut eena nich fa emma jerat es

De Schreft woarnt fa schwoare Sinden un sajcht, daut een Mensch, waut soone Sinden deit, nich en Gott sien Kjennichrikj nenkomen kaun (1. Korinta 6:9-11; Galata 5:19-21). Wan eena aul fa emma jerat wia, to waut wudd daut dan fälen, fa soone Sinden to woarnen? De Schreft sajcht, daut een Mensch, waut aul jerat es, wada auffaulen kaun, wan dee wada aunfangt, schwoare Sinden to driewen. Biejlikj Hebräa 10:26 (PB) sajcht: “Wan wie de Woarheit haben kjanen jelieet, un wie dan doch mootwellens wieda sindjen, dan es doa kjeen Opfa mea fa onse Sind jebläwen” (Hebräa 6:4-6; 2. Petrus 2:20-22).
Jesus muak daut mol met een Jlikjnis dietlich, woo wichtich daut es, daut eena em Gloowen blift. Hee vejlikjt sikj selfst met eene Wienstud un siene Nofolja met de Ranken doaraun. Eenje Nofolja wudden eene jewesse Tiet lank Frucht droagen, aulsoo äaren Gloowen aun am derch Woakjen bewiesen, oba wudden lota doamet opphieren. Dee wudden “soo aus eene [fruchtloose] Rank wajch jeschmäten”, aulsoo äare Radunk vespälen (Johanes 15:1-6, PB). De Apostel Paulus brukt ernoa soon Jlikjnis un säd, daut Christen, waut nich em Gloowen bliewen, “rut jebroaken woaren” (Reema 11:17-22, PB).
Von Christen woat velangt, daut dee sellen woaken un waka bliewen (Matäus 24:42; 25:13). Dee, waut em jeisteljen enschlopen, doaderch daut dee soont doonen, “waut toom diestren jehieet”, ooda nich de Woakjen volbrinjen, waut Jesus an oppjeef, vespälen äare Radunk (Reema 13:11-13, PB; Openboarunk 3:1-3).
Väl Schreftstäden wiesen, daut dee, waut jerat sent, batem Enj motten tru uthoolen (Matäus 24:13; Hebräa 10:36; 12:2-3; Openboarunk 2:10). Eenje Christen ieeschtemma wieren froo, aus see hieeden, daut äare Breeda un Sestren em Gloowen tru wieren (1. Tessalonicha 1:2-3; 3. Johanes 3-4). Woo wudd de Schreft emma wada doavon räden, daut eena mott tru uthoolen, wan eena aulmols aul fa emma jerat wia, endoont aus eena tru bleef ooda nich?
De Apostel Paulus kunn mau korz ver sienen Doot sajen, daut hee fa secha jerat wia (2. Timotäus 4:6-8). Een poa Joa ea säd hee noch, daut hee de Radunk noch vespälen kunn, wan hee een orrajchtet Velangen nojinkj. Hee schreef: “Ekj bedwinj mienen Kjarpa, daut dee mie jehorcht, daut ekj nich aundre prädjen doo un selfst nich to brucken sie” ooda “veschmäten woa” (1. Korinta 9:27; PB, JHF; Filippa 3:12-14).