Waut meent daut, jerat to sennen?
Waut de Schreft doatoo sajcht
Wan daut en de Schreft von “raden” rät, dan meent daut eenjemol, daut Menschen von eene Jefoa ooda Venichtunk jerat woaren (2. Mose 14:13-14, PB; Aposteljeschicht 27:20). Oba foaken rät daut uk von jerat, ooda seelich, woaren, wan daut doarom jeit, daut Menschen von de Sind friejemoakt woaren (Matäus 1:21). Wie Menschen stoawen, wäajen wie Sinda sent, oba wan een Mensch von de Sind jerat ooda friejemoakt es, dan haft dee de Hopninj, fa emma to läwen (Johanes 3:16-17). a
Woo kaun eena jerat woaren?
Toom jerat woaren mott eena aun Jesus jleewen un disen Gloowen doaderch bewiesen, daut eena siene Jebooten jehorcht (Aposteljeschicht 4:10, 12; Reema 10:9-10, NW; Hebräa 5:9).
De Schreft sajcht, daut woara Gloowen aun de Woakjen to seenen es, aulsoo daut eena jehuarsom es (Jakobus 2:24, 26). Oba daut meent nich, daut eena sikj siene Radunk selfst vedeenen kaun. Von de Radunk sajcht daut: “Daut es een Jeschenkj von Gott”, waut von “Gott siene Jnod” kjemt, waut wie ons nich vedeenen kjennen (Efeesa 2:8-9, PB).
Kaun eena siene Radunk velieren?
Jo, daut es mäajlich. Wan biejlikj een Mensch jerat wort, waut em Wota meist krakjt vesopen wia, kaun hee wada trigj doa nennhupsen ooda doa nennfaulen. Un soo es daut uk met soonen, waut von de Sind jerat wort. Dee kaun wada en sien sinteljet Läwen trigjfaulen un doaderch siene Radunk velieren. Doawäajen rot de Schreft Christen too, waut aul jerat wieren, “fa dän Gloowen to kjamfen” (Judas 3, PB). De Schreft sajcht to dee uk: “Schauft met ferchten un zetren, daut jie seelich woaren” (Filippa 2:12, PB).
Wäa es de Rada – Gott ooda Jesus?
De Schreft sajcht, daut ons wichtichsta Rada Gott es, un daut sajcht foaken, daut hee deejanja es, waut “raden deit” (1. Samuel 10:19, PB; Jesaja 43:11; Judas 25). Gott deed uk veschiedne Mana brucken, om daut Volkj Israel to raden, un en de Bibel woaren dee “stoakje Helpasch”, ooda “Rada”, jenant (Nehemia 9:27, PB; Rechta 3:9, 15, PB; 2. Kjennichs 13:5). De Schreft sajcht uk von Jesus Christus, daut hee een “Heilant”, ooda Rada, es, wäajen Gott ons derch am von de Sind raden deed (Aposteljeschicht 5:31, PB; Titus 1:4). b
Woaren aule Menschen jerat woaren?
Nä, nich aule Menschen woaren jerat woaren (2. Tessalonicha 1:9). Aus se Jesus fruagen: “Sent daut mau weinje, dee doa seelich woaren?”, auntwuad hee: “Sträft doano derch daut enje Puat nenn to gonen; wiels ekj saj junt, väle woaren vesieekjen nenn to komen, un woaren nich kjennen” (Lukas 13:23-24, PB).
Eenje jleewen, daut aule jerat woaren
Waut eenje jleewen: 1. Korinta 15:22 (PB) sajcht, daut “derch Christus wada aula toom läwen” komen woaren, aulsoo daut aule Menschen jerat woaren.
Woo daut es: Wan wie de Varzhen doaver un doahinja läsen, dan woa wie en, daut et hia von daut Oppstonen von de Doodes rät (1. Korinta 15:12-13, 20-21, 35). Wan daut sajcht, daut “derch Christus wada aula toom läwen” komen, dan meent daut, daut aul dee, waut oppstonen, wada toom läwen komen. Daut es derch Jesus Christus mäajlich (Johanes 11:25).
Waut eenje jleewen: Titus 2:11 (JHF) wiest, daut aule Menschen jerat woaren, wäajen daut sajcht, Gott “brinjt Heil [ooda Radunk] fa aule Menschen”.
Woo daut es: Daut griechische Wuat, waut en disen Varsch met “aule” äwasat woat, kaun uk “aule Sorten” ooda “veschiedne” bedieden. c Titus 2:11 meent, daut Gott de Radunk fa aule Sorten Menschen mäajlich muak, aulsoo fa Menschen “von aule Raussen, Volkjsstam, Sproaken un Menschen” (Openboarunk 7:9-10, PB).
Waut eenje jleewen: 2. Petrus 3:9 (PB) lieet, daut aule Menschen woaren jerat woaren, wäajen daut sajcht, daut Gott well, “daut kjeena veloaren jeit”.
Woo daut es: Gott well jieren, daut de Menschen jerat woaren, oba hee bemott kjeenem, de Radunk auntonämen. Wan Gott ieescht rechten deit, woat hee dee Gottloose venichten (2. Petrus 3:7).
a De Schreft sajcht von eenje Menschen, daut dee aul jerat sent, wan dee äare werkjelje Radunk von Doot un Sind oba noch komen woat (Efeesa 2:5, JHF; Reema 13:11).
b De Nomen Jesus kjemt von dän hebräischen Nomen Jehoschua, waut bediet “Jehova es Radunk”.
c See Vine’s Complete Expository Dictionary of Old and New Testament Words. Dautselwje griechische Wuat kjemt uk en Matäus 5:11 (PB) väa, wua Jesus sajcht, daut de Menschen äwa siene Nofolja “aulahaunt” schlajchtet räden wudden.
Veleicht jleichst du uk dit
WAUT SAJCHT DE SCHREFT ÄWA ...?
Woo kaun Jesus sien Opfa väle looskjeepen?
Woo kjennen derch Jesus sien Opfa onse Sinden vejäft woaren?
WAUT SAJCHT DE SCHREFT ÄWA ...?
Es eena fa emma jerat, wan eena ieescht Jesus aunjenomen haft?
Eent von Jesus siene Jlikjnisen jeft ons de Auntwuat.
WAUT SAJCHT DE SCHREFT ÄWA ...?
Es de Gloowen aun Jesus aules, waut doa fält toom jerat woaren?
De Schreft rät von soone, waut aun Jesus jleewen un doch nich jerat woaren. Woo kaun daut sennen?
WICHTJE BIBLISCHE LIEREN
Wuarom must Jesus stoawen?
Veleicht hast du mol jehieet, daut hee fa onse Sinden storf. Oba woo kaun eenen Mensch sien Läwen millionende Menschen togood komen?
BIBLISCHE LIEREN
Fang een Bibelstudium aun
Du kaust een Studium haben met dienen ieejnen Bibelliera un daut kost nuscht.