کیہہ کدی کسے نے توانوں کوئی راز دی گل دسی اے؟‏—‏ * بائبل چ اِک مُقدس راز دسیا گیا اے۔‏ ایہہ راز مُقدس ایس لئی اے کیونکہ ایہہ خدا نے دسیا اے۔‏ تے ایہنوں راز ایس لئی کہیا گیا اے کیونکہ ایہدے بارے کسے نُوں وی پتہ نئیں سی۔‏ ایتھوں تک کہ فرشتے وی ایہدے بارے جاننا چاہندے سن۔‏ کیہہ تُسی ایہہ راز جاننا چاہندے او؟‏—‏

ایہہ کئی سال پہلاں دی گل اے کہ خدا نے زمین تے پہلے مرد تے پہلی عورت نُوں بنایا۔‏ مرد دا ناں آدم سی تے عورت دا ناں حوا سی۔‏ خدا نے اوہناں نُوں اِک بوہت سوہنے باغ چ رکھیا۔‏ ایس باغ دا ناں عدن سی۔‏ جے آدم تے حوا خدا دا کہنا من دے تے اوہ تے اوہناں دے بچے پُوری زمین نُوں اِک خوب‌صورت باغ بنا سکدے سن۔‏ اوہ ایہدے چ ہمیشاں تک رہ سکدے سن۔‏ پر کیہہ توانوں یاد اے کہ آدم تے حوا نے کیہہ کیتا؟‏—‏

آدم تے حوا نے خدا دا کہنا نئیں منیا ایس لئی اَج ساڈی زمین اِک خوب‌صورت باغ نئیں اے۔‏ پر خدا نے وعدہ کیتا اے کہ اوہ پُوری زمین نُوں عدن وانگوں خوب‌صورت بنائے گا۔‏ فیر سارے لوک سوہنی زمین تے ہمیشاں تک ہسدے وسدے رہن گے۔‏ پر خدا زمین نُوں اِک خوب‌صورت باغ کیویں بنائے گا؟‏ ایہہ اِک راز سی تے بڑے لمے عرصے تک لوکاں نُوں ایہدا پتہ نئیں چلیا۔‏

فیر یسوع مسیح زمین تے آئے۔‏ اوہناں نے لوکاں نُوں ایس راز بارے کجھ گلاں دسیاں۔‏ اوہناں نے دسیا کہ ایہہ راز خدا دی بادشاہی دے بارے اے۔‏ یسوع مسیح نے لوکاں نُوں کہیا کہ اوہ ایہہ دُعا کرن کہ خدا دی بادشاہی آئے۔‏ ایہہ بادشاہی ساری زمین نُوں اِک خوب‌صورت باغ بنا دَوے گی۔‏

کیہہ توانوں ایہہ راز جان کے خوشی ہوئی؟‏—‏ پر سانوں یاد رکھنا چاہی دا اے کہ صرف اوہی لوک زمین تے ہمیشاں تک رہن گے جیہڑ‌ے یہوواہ خدا دا کہنا من دے نیں۔‏ بائبل سانوں بوہت سارے لوکاں بارے دسدی اے جنہاں نے یہوواہ خدا دا کہنا منیا۔‏ کیہہ تُسی اوہناں بارے جاننا چاہندے او؟‏—‏ آؤ،‏ ویکھئے کہ اوہناں وچوں کجھ لوک کون سن تے اَسی اوہناں وانگوں کیویں بن سکنے آں۔‏