سبق 11
یسوع مسیح دے بارے کتاباں لکھن والے آدمی
کیہہ توانوں تصویر چ ایہہ آدمی نظر آ رہے نیں؟— ایہہ متی، مرقس، لُوقا، یوحنا، پطرس، یعقوب، یہوداہ تے پولُس نیں۔ ایہہ سارے یسوع مسیح دے زمانے چ رہندے سن تے ایہناں نے یسوع مسیح دے بارے کجھ کتاباں لکھیاں۔ آؤ، اَسی ایہناں دے بارے پڑھنے آں۔
تُسی ایہناں آدمیاں دے بارے کیہہ جان دے او؟
ایہناں وچوں تِن آدمی رسول سن جنہاں یسوع مسیح نال مِل کے منادی کیتی سی۔ کیہہ توانوں ایہناں دے ناں یاد نیں؟— ایہناں دے ناں متی، یوحنا تے پطرس نیں۔ متی رسول تے یوحنا رسول یسوع مسیح نُوں بڑی چنگی طرحاں جان دے سن۔ ایہناں دونواں نے یسوع مسیح دے بارے اِک اِک کتاب
لکھی سی۔ یوحنا رسول نے اِک ہور کتاب وی لکھی سی جدا ناں مکاشفہ اے۔ اوہناں نے تِن خط وی لکھے جنہاں نُوں پہلا یوحنا، دُوجا یوحنا تے تیجا یوحنا کہیا جاندا اے۔ پطرس رسول نے وی دو خط لکھے۔ ایہناں نُوں پہلا پطرس تے دُوجا پطرس کہندے نیں۔ پطرس نے اپنے دُوجے خط چ دسیا کہ اِک واری یہوواہ خدا نے اسمان توں یسوع مسیح دے بارے کہیا سی کہ ایہہ میرا پترُ اے۔ مَیں ایہنوں بوہت پیار کرنا واں تے مینوں ایہدے تے فخر اے۔تصویر چ جیہڑے باقی آدمی نیں اوہناں نے وی یسوع مسیح بارے کجھ کتاباں لکھیاں۔ ایہناں وچوں اِک دا ناں مرقس اے۔ جدوں دُشمناں نے یسوع مسیح نُوں گرفتار کیتا تے شاید مرقس اوس ویلے یسوع مسیح دے نال سن۔ شاید اوہناں نے سارے واقعے نُوں اپنیاں اَکھاں نال ویکھیا سی۔ تصویر چ اِک ہور آدمی وی اے۔ ایہدا ناں لُوقا اے۔ اوہ ڈاکٹر سن۔ ہو سکدا اے کہ اوہ یسوع مسیح دی موت توں بعد مسیحی بنے سن۔
تصویر چ دو ہور آدمی وی نظر آ رہے نیں جنہاں نے بائبل دیاں کجھ کتاباں لکھیاں۔ ایہہ یسوع مسیح دے چھوٹے بھرا سن۔ کیہہ توانوں اوہناں دے ناں یاد نیں؟— ایہناں دے ناں یعقوب تے یہوداہ نیں۔ شروع شروع وچ ایہہ دونویں یسوع مسیح اُتے ایمان نئیں رکھ دے سن۔ اوہناں نُوں یسوع مسیح دیاں گلاں بوہت عجیب لگ دیاں سن۔ پر بعد چ اوہ یسوع مسیح اُتے ایمان لے آئے تے مسیحی بن گئے۔
تصویر چ نظر آؤن والا آخری آدمی پولُس اے۔ مسیحی بنن توں پہلاں اوہناں دا ناں ساؤل سی۔ اوہ مسیحیاں توں نفرت کردے سن تے اوہناں نال بوہت بھیڑا سلوک کردے سن۔ کیہہ توانوں پتہ اے کہ پولُس مسیحی کیویں بنے؟— اِک دن اوہ شہر دمشق نُوں جا رہے سن۔ اچانک راستے چ اوہناں نُوں اسمان توں اِک آواز آئی۔ ایہہ یسوع مسیح دی آواز سی۔ یسوع مسیح نے پولُس نُوں کہیا: پولُس! تُوں اوہناں لوکاں نال بھیڑا سلوک کیوں کرنا ایں جیہڑے میرے تے ایمان رکھ دے نیں۔ ایہدے بعد پولُس چنگے آدمی بن گئے تے یسوع مسیح اُتے ایمان لے آئے۔ پولُس نے رومیوں دے خط توں لے کے عبرانیوں دے خط تک چوداں کتاباں لکھیاں۔
اَسی ہر روز بائبل پڑھنے آں۔ ہے نا؟— بائبل پڑھ کے اَسی یسوع مسیح دے بارے بوہت ساریاں گلاں سکھ سکنے آں۔ کیہہ تُسی یسوع مسیح دے بارے ہور گلاں سکھنا چاہندے او؟—
ایہہ ایتاں پڑھو:
-
اعمال 9:1-18