انسان دی زندگی خون چ ہوندی اے۔ تے زندگی دا خالق خدا اے ایس لئی خون دے استمال بارے ہدیت وی بس اوہی دے سکدا اے۔ اوہنے ایہدے بارے کیہڑی ہدیت دِتی اے؟ کیہہ خون کھانا یاں لوانا صحی اے؟ تُسی ایس بارے صحی فیصلہ کیویں کر سکدے او؟‏

1.‏ خون دے استمال بارے یہوواہ دی سوچ کیہہ اے؟‏

یہوواہ خدا نے اپنی قوم اِسرائیل نُوں دَسیا سی کہ ہر جان‌دار دی جان اوہدے خون چ ہوندی اے۔‏ (‏احبار 17:‏14‏)‏ تے جے جان یاں زندگی خون چ ہوندی اے تے فیر خدا خون نُوں وی اُنج ای پاک سمجھدا اے جیویں کہ زندگی نُوں۔ خون وی یہوواہ وَلّوں اِک نعمت اے۔‏

2.‏ خدا نے خون بارے کیہڑی ہدیت دِتی اے؟‏

یہوواہ خدا نے پرانے زمانے چ اپنے بندیاں نُوں حکم دِتا سی کہ اوہ خون نہ کھان۔ (‏پیدایش 9:‏4 تے احبار 17:‏10 نُوں پڑھو۔)‏ فیر اوہنے پہلی صدی چ ایہی حکم مسیحیاں نُوں وی دِتا۔ اوہنے اوس ویلے دے رسولاں تے بزرگاں دی اِک جماعت دے ذریعے دَسیا کہ مسیحی خون توں پرہیز کرن۔‏‏—‏اعمال 15:‏28، 29 نُوں پڑھو۔‏

خون توں پرہیز کرن دا کیہہ مطلب اے؟ ایس گل نُوں سمجھن لئی اِک مثال تے غور کرو:‏ فرض کرو کہ اِک ڈاکٹر توانوں شراب پین توں منع کردا اے۔ تُسی کیہہ کرو گے؟ ظاہر اے کہ تُسی شراب نئیں پیو گے۔ پر کیہہ تُسی ایہدی ڈرِپ لواؤ گے؟ بالکل نئیں۔ ایسے طرحاں جے خدا نے خون توں پرہیز کرن لئی کہیا اے تے فیر ایہدا مطلب ایہہ وے کہ اَسی ایہنوں کسے وی طرحاں کھا یاں پی نئیں سکدے۔ تے نہ ای اَسی کسے ایہو جہے جانور دا گوشت کھا سکنے آں جنہوں ذِبح نہ کیتا گیا ہووے۔ اَسی ایہو جیہا کوئی کھانا وی نئیں کھا سکدے جدے چ خون شامل ہووے۔‏

پر کئی طرحاں دے علاج چ ڈاکٹر خون استمال کردے نیں۔ ایہدے بارے اَسی کیہہ کہہ سکنے آں؟ خون دے اصل چ چار حصے ہوندے نیں۔ پہلا لال خلیے، دُوجا سفید خلیے، تیجا پلیٹ‌لیٹس تے چوتھا پلازمہ۔ کجھ علاج کردے ویلے ڈاکٹر یاں تے پورا خون لاندے نیں یاں فیر ایہناں چاراں حصیاں وچوں کوئی اِک حصہ لاندے نیں۔ پر ایہہ یہوواہ خدا دی نظر چ صحی نئیں کیونکہ ایہہ بالکل خون کھان دے برابر اے۔ خون دے ایہناں چار حصیاں نُوں وی اَگے ہور چھوٹے چھوٹے حصیاں چ وَنڈیا جاندا اے تے فیر اوہناں نُوں علاج چ استمال کیتا جاندا اے۔ ایہدے علاوہ کجھ علاج ایہو جہے وی نیں جنہاں چ اِک بندے دا اپنا خون استمال کیتا جاندا اے۔ ایہو جہے علاج بارے خدا نے کوئی حکم نئیں دِتا۔ ایہناں بارے سانوں پاک کلام چ دِتے گئے اصولاں دی بِنا تے فیصلہ کرنا چاہی دا اے۔‏ a‏—‏گلتیوں 6:‏5‏۔‏

 ہور سوچ‌وچار لئی

3.‏ علاج بارے ایہو جہے فیصلے کرو جنہاں توں یہوواہ خوش ہووے

تُسی علاج بارے ایہو جہے فیصلے کیویں کر سکدے او جیہڑے خون بارے یہوواہ دی سوچ دے مطابق ہون؟ ویڈیو چلاؤ تے فیر گل بات کرو کہ تھلے دَسے گئے مشوریاں تے عمل کرنا کیوں ضروری اے:‏

• خدا کولوں دُعا چ عقل‌مندی منگو۔—‏یعقوب 1:‏5‏۔‏

• اپنی صورتحال بارے پاک کلام چوں اصول لبھو تے اوہناں تے عمل کرو۔—‏امثال 13:‏16‏۔‏

• لبھو کہ تواڈے علاقے چ کیہڑے علاج دستیاب نیں۔‏

• طے کرو کہ تُسی کیہڑا کیہڑا علاج نئیں کرا سکدے۔‏

• چنگی طرحاں سوچ‌وچار کر کے فیصلہ کرو تاکہ تواڈا ضمیر صاف رہوے۔—‏اعمال 24:‏16‏۔‏ b

• تُسی علاج بارے کجھ فیصلے اپنے ضمیر مطابق کر سکدے او۔ ایس لئی ایس گل دا خیال رکھو کہ تُسی جو وی فیصلہ کردے او، اوہدے چ تواڈا جیون ساتھی، کلیسیا دا کوئی بزرگ یاں توانوں بائبل کورس کران والا دخل نہ دَوے۔—‏رومیوں 14:‏12‏۔‏

• اپنے فیصلے نُوں لکھ لوو۔‏

4.‏ یہوواہ دے گواہ بہترین علاج کراندے نیں

بھانویں کہ اَسی خدا دے حکم دے مطابق علاج واسطے خون استمال نئیں کر سکدے پر فیر وی اَسی خون دے بغیر بہترین علاج کرا سکنے آں۔ ویڈیو چلاؤ‏۔‏

طِطُس 3:‏2 نُوں پڑھو تے فیر ایس سوال تے گل بات کرو:‏

• سانوں ڈاکٹراں نال عزت تے نرمی نال کیوں گل کرنی چاہی دی اے؟‏

 5.‏ خون دے بنیادی حصیاں چوں لئے گئے چھوٹے حصیاں نال علاج

جیویں کہ اَسی سکھیا کہ خون دے چار بنیادی حصے نیں:‏ لال خلیے، سفید خلیے، پلیٹ‌لیٹس تے پلازمہ۔ پر اَگوں ایہناں بنیادی حصیاں دے وی چھوٹے چھوٹے حصے کیتے جاندے نیں۔‏ c ایہناں چھوٹے حصیاں توں دوائیاں بن دِیاں نیں جیہڑیاں فرق فرق بیماریاں لئی یاں فیر خون نُوں روکن لئی استمال ہوندیاں نیں۔‏

خون دے بنیادی چار حصیاں وچوں لئے گئے چھوٹے حصیاں نال علاج کران بارے ہر مسیحی اپنے ضمیر دے مطابق فیصلہ کر سکدا اے۔ کجھ مسیحیاں نُوں ایہہ علاج کرانا ٹھیک لگدا اے پر کجھ نُوں ایہہ ٹھیک نئیں لگدا۔‏

ایس بارے کوئی وی فیصلہ کردے ویلے ایس سوال تے غور کرو:‏

• مَیں ڈاکٹر نُوں ایہہ کیویں سمجھا سکنا واں کہ میں خون دے بنیادی حصیاں چوں لئے گئے فلانے حصے نُوں لین یاں نہ لین دا فیصلہ کیوں کیتا اے؟‏

 خلاصہ

یہوواہ خدا چاہندا اے کہ اَسی خون نُوں پاک سمجھئے تے ایہدا غلط استمال نہ کرئیے۔‏

دہرائی

• یہوواہ خدا خون نُوں پاک کیوں سمجھدا اے؟‏

• اَسی ایہہ کیوں کہہ سکنے آں کہ خون توں پرہیز کرن چ ایہہ وی شامل اے کہ اَسی خون نہ لوائیے؟‏

• تُسی ایہہ فیصلہ کیویں کرو گے کہ تُسی فلانا علاج کراؤ گے یاں نئیں کراؤ گے؟‏