1. Dahme kahrehda kitail kak nda me Siohwa iei Sounkadehde en rongamwahu oh ih me keieu lapalap?

 SIOHWA KOHT iei tepin Sounkadehde en rongamwahu oh ih me keieu lapalap. Mwurinte Adam oh Ihp ara uhwongada ih, Siohwa ketin mahsanih me Sehdan me Tepil pahn kasohrala. (Sen. 3:15) Sang ahnsowo kohdo, Siohwa ketin kawehwehda ia duwen eh pahn ketin kasarawihla mwareo, ia duwen eh pahn ketin kamwahwihala kahpwal kan me Sehdan kahrehda, oh ia duwen aramas akan ar kak pwurehng ahneki koapworopwor en mour soutuk. Rongamwahu pwukat koaros mi nan Mahsen en Koht, Paipel.

2. (a) Ni ahl dah me tohnleng kan wia sounkadehde kan en rongamwahu? (b) Ia duwen Sises eh ketin wia mehn kahlemeng mwahu ong sounkadehde en rongamwahu kan?

² Tohnleng kan pil wia sounkadehde kan en rongamwahu. Irail kin kalohki rongamwahu oh kin sewese meteikan ren kalohki rongamwahu nan sampah pwon. (Luk 1:19; 2:10; Wiewia 8:26, 27, 35; Kaud. 14:6) Ia duwen Tohnleng lapalapo Maikel? E pil ketin wia sounkadehde en rongamwahu. Ni ahnsou me e mwarenki Sises oh ketiket sampah, sapwellime doadoahk me keieu kesempwal iei en kalohki rongamwahwo. Sapwellime mehn kahlemeng kasalehda me doadoahk en kalohk anahne wia doadoahk me keieu kesempwal ong kitail.​—Luk 4:16-21.

3. (a) Dahkot rongamwahwo me kitail kin kalohki? (b) Peidek dah kan me kitail anahne sapengala?

³ Sises ketin kehkehlingkihong sapwellime tohnpadahk kan ren wia sounkadehde kan en rongamwahu. (Mad. 28:19, 20; Wiewia 1:8) Wahnpoaron Pohl ndaiong Timoty: “Wia omw pwais en sounkadehde en Rongamwahu, oh pil kapwaiada omw pwukoa.” (2 Tim. 4:5) Rongamwahu dah me kitail kin kalohki? Kitail kin padahkihong aramas akan me Samatail nanleng, Siohwa, ketin poakohng kitail. (Sohn 3:16; 1 Pit. 5:7) Wehin Koht iei kadehdepen sapwellime limpoak ong tohnsampah. Eri kitail kin padahkihong  meteikan me ma re wiahla towe kan en sapwellime Wehi, peikiong ih oh wia dahme pwung, re pil kak wiahla kompoakepah kan. (Mel. 15:1, 2) Siohwa pahn ketikihsang soangen lokolok koaros oh e pahn ketikihsang nsensuwed me kohsang atail kin tamanda soahng suwed kan me wiawihong kitail mahso. Met uhdahn wia rongamwahu! (Ais. 65:17) Nin duwen sounkadehde kan en rongamwahu, kitail anahne sapengala peidek kesempwal riau pwukat: Dahme kahrehda aramas akan anahne rong rongamwahwo rahnwet? Ia duwen atail kak wia uwen atail kak nin duwen sounkadehde kan en rongamwahu?

4. Likamw dah kan me aramas kin ndahki duwen Koht?

⁴ Medewehla ma aramas men pitih iuk oh nda me omw pahpao keseiukala oh omw peneinei. Aramaso nda me omw pahpao sohte men ese iuk, e kin ekihsang uhk dahme e ese oh e lemei. Aramaso pil nda me omw pahpao mehla, eri sohte kahrepen omw song rapahki ih. Ekei kin nda soahng kan me duwehte met duwen Koht. Re nda me kitail sohte kak esehla Koht, de re nda me e ketin lemei. Ekei pelien lamalam kin padahngki me Koht pahn ketin kaloke aramas suwed kan nan kisiniei kohkohlahte. Meteikan nda me Koht ketin kahrehda melimel de kahpwal teikan duwehte met me kahrehiong aramas en lokolok. Re kin nda me Koht ketin doadoahngki kahpwal pwukat pwehn kaloke aramas akan mehnda ma mepwukat kin kemehla aramas mwahu oh suwed.

5, 6. Ia duwen padahk me aramas kohsang mahn oh padahk en pelien lamalam likamw kan ar kin kamwakid aramas?

⁵ Meteikan nda me Koht sohte ketin mie. Irail me kin kamehlele me mour pein miehla nda me sohte Sounkapikpatail oh sohte me wiahda soangen mour koaros. Ekei kamehlele me aramas kohsang mahn. Eri ong irail me kamehlele met, e sohte kapwuriamwei me aramas kin ekei pak lemei oh roporop. Re kamehlele me e koasoandier me irail me kehlail kan pahn lemei ong me luwet kan. Eri e sohte kapwuriamwei me ekei kin nda me kopwung sapahrek pahn wiawi ahnsou koaros. Kahrehda, irail me kamehlele me mour pein miehla sohte ahneki koapworopwor mehlel.

⁶ Padahk me mour pein miehla oh padahk en pelien lamalam likamw kan pil kin kahrehiong aramas akan ren lokolok ni imwin rahn akan. (Rom 1:28-31; 2 Tim. 3:1-5) Padahk pwukat kaidehn rohng mwahu kei. Ahpw, nin duwen me wahnpoaron Pohl koasoia, re kin kahrehda nan madamadau en aramas akan en “inenen rotorot. Re sohte iang ahneki mour me kin sang rehn Koht.” (Ep. 4:17-19) Pil ehu, padahk me mour pein miehla oh padahk en pelien lamalam likamw kan kin kasohwe aramas ar pahn alehda rongamwahwo sang rehn Koht.​—Wadek Episos 2:11-13.

7, 8. Ia ahl tehieu me aramas akan kak sukuhlki rongamwahwo?

⁷ Pwe aramas akan en ahneki nanpwungmwahu rehn Koht, keieu re anahne esehla dahme Paipel uhdahn padahngki. Kitail kak sewese ren diarada pasapengpen arail peidek kan duwen Koht. Kitail kak doadoahngki kisin pwuhk Rohng Mwahu Sang Rehn Koht! Karasepe, kitail kak mweidohng irail ren kilang peidek pwukat, Soangen Koapworopwor Dahieu me Mie ong me Melahr akan? oh Dahme Koht Ketin Mweidohng Suwed oh Lokolok en Mihmihkihte?

⁸ Ihte ahl me kitail kak sukuhlki rongamwahwo duwen Koht oh kupwure iei en onopki Paipel. E wia pwais kaselel ehu ong kitail en kak sewese meteikan sukuhlki rongamwahwo. Ahpw ma kitail men sewese emen en kamehlele Koht oh wiahla kompoakepah, kitail anahne wia laudsang ihte padahkihong ire mehlel kan. Kitail anahne kamehlelehiong ih, de sewese ih  en wehwehki dahme kahrehda e anahne kamehlele met. (2 Tim. 3:14) Eri, kitail en sukuhlki atail pahn sewese aramas akan ren uhdahn kamehlele, duwehte me Sises ketin wia. Dahme kahrehda e uhdahn ketin pweida ni eh ketin sewese aramas akan ren kamehlele? Ehu kahrepe iei ni eh ketin doadoahngki mwahu peidek kan. Ia duwen atail kak alasang ih?

9. Ma kitail men sewese aramas akan ren kamehlele rongamwahwo, dahme kitail anahne wia?

⁹ Dahme kahrehda kitail anahne doadoahngki peidek kan nan kalohk, duwehte me Sises ketin wia? Medewehla ma omw toahkteo ndaiong uhk me ke anahne pwal. Mwein ke kamehlele ih. Ahpw ia duwen ma e nda met ni eh sohte idek rehmw peidek kan duwen roson en paliweromw? Eri mwein ke sohte pahn kamehlele ih. Mehnda ma e wia toahkte koahiek men, e anahne idek peidek oh rong pasapeng kan mwohn eh kak sewese emen. Eri ma kitail men sewese aramas akan ren kamehlele rongamwahu en Wehio, kitail anahne sukuhlki en idek rehrail peidek mwahu kan pwe kitail en wehwehki sawas dah me re anahne.

10, 11. Dahme kitail ele kak wia ma kitail idawehn sapwellimen Sises elen kasukuhl?

¹⁰ Sises ketin mwahngih me sounpadahk men kak doadoahngki peidek kan kaidehn ihte pwehn esehla tohnsukuhlo ahpw pwehn pil sewese tohnsukuhlo en medewe oh koasoia eh madamadau. Karasepe, ni Sises eh kupwurki padahkihong sapwellime tohnpadahk ko duwen aktikitik, e ketin keinemwe mahs rehrail peidek ehu me kahrehda ren medemedewe. (Mark 9:33) Ehu pak Sises ketin keinemwe rehn Piter peidek ehu oh ketikihda pasapeng riau, oh eri mahsanihong Piter en pilada mehnia me pwung. Met sewese Piter en sukuhlki ire kesempwal ehu. (Mad. 17:24-26) Pil ehu pak, Sises kupwurki mahsanih dahme mi nan mohngiong en sapwellime tohnpadahk ko, eri e ketin keinemwe rehrail ekei peidek me sewese ren kasalehda ia uhdahn arail pepehm. (Wadek Madiu 16:13-17.) Sises sohte ketin padahkihongete aramas akan dahme ren wia. Sang ni mwomwen eh ketin doadoahngki peidek kan, e ketin kamwakid aramas ako ren pwungki rongamwahwo oh wiahda wekidekla kan nan arail mour.

¹¹ Ni atail kin idawehn mwomwen Sises eh ketin doadoahngki peidek kan, kitail diarada ahl me keieu mwahu en sewese emenemen aramas me kitail tuhwong nan kalohk. Kitail pil sukuhlki ia duwen atail en sewese aramas akan ren medewe ni arail sohte pwungki dahme kitail kin padahngki. Oh kitail padahki aramas akan pwe ren paiekihda. Met kitail pahn koasoiapene karasepe siluh duwen atail kak doadoahngki mwahu peidek kan.

12-14. Ia duwen omw kak sewese noumw serio en dehr masepwehk en kalohk? Menlau kihda ehu karasaras.

¹² Karasepe 1: Dahme ke pahn wia ma noumw pwutak de serepein pwulopwul men kin masak koasoiong ienge tohnsukuhl kan duwen dahme e kin kamehlele? Ia duwen omw kak sewese ih en dehr masak en koasoiong irail? Dehr kauwe de ihte ndahng dahme e pahn nda, ahpw ke kak idek peidek kan me pahn sewese en kasalehda eh pepehm, nin duwen me Sises ketin padahkihong kitail en wia. Ia duwen omw kak wia met?

 ¹³ Iang noumw serio wadekpene ekei ire kan sang kisin pwuhk me oaralap Rohng Mwahu Sang Rehn Koht! Mwurin amwa tehkpene peidek kan ni imwin pwuhko, idek rehn noumw serio mehnia peidek me e leme keieu mwahu. Kangoange ih en medemedewe kahrepe teikan me kahrehda peideko kesempwal ong ih oh ia duwen eh kak kawehwehiong emen.​—Rom. 12:2.

¹⁴ Mwurin mwo, padahkihong noumw serio me e kak koasoiong ienge tohnsukuhlo ni ahlohte me ke koasoiong ih. E kak idek rehn ienge tohnsukuhlo dahme e kamehlele duwen ireo. Karasepe, e kak peki rehn ienge tohnsukuhlo en wadek keriaun peidek nan iren mehn kasukuhl 6 me idek, Ia irair en me melahr akan? Noumw serio eri kak idek, “Ia duwe, Lasarus koasoiahda dahme wiawi ahnsou me e mehla mwurin Sises ketin kaiasada ih?” Ienge tohnsukuhlo kakete nda soh. Eri, noumw serio kak idek, “Pwehki met mehlel, e sou pahn konehng en kamehlele me ahnsou me kitail mehla, kitail sohte ese mehkot douluhl nin duwen me Paipel mahsanih?” Pwehn sewese noumw serio en dehr masepwehk ni eh koasoiong meteikan duwen dahme e kamehlele, ke kak iang ih kaunopada mwomwen eh pahn wia met. Ma ke kaiahnehda noumw serio en doadoahngki mwahu peidek kan, ke pahn sewese ih en wiahla sounkadehde mwahu men en rongamwahu.

15. Ia duwen atail kak doadoahngki peidek kan en sewese emen me kamehlele me Koht kin ketin mweidohng lokolok en mie pwehn ketin kaloke aramas akan?

¹⁵ Karasepe 2:  Nan atail doadoahk en kalohk, ele kitail tuhwong emen me kamehlele me Koht kin ketin mweidohng lokolok en mie pwehn ketin kaloke aramas akan. Ni kadek, kitail kak idek dahme kahrehda e kamehlele met. Mwurin atail rong dahme e nda, kitail kak nda me kitail wehwehki me e kin medemedewe kanahieng dahme e kamehlele.  Kitail eri idek reh ma e mwahuki wadek kisin pwuhk ehu me kawehwehda dahme kahrehda Koht ketin mweidohng me suwed oh lokolok en mie. Ma e mwahuki, kitail kak kihong ih kisin pwuhk me oaralap koasoia Rohng Mwahu Sang Rehn Koht! Ma kitail kin kadek ni atail idek peidek kan, ele kitail kak kahrehda rongamwahwo en sair mohngiong en emen.

16. Dahme kahrehda kitail anahne tehk mwahu me neitail tohnsukuhl en Paipel en dehr wadekasangte pasapeng kan sang nan pwuhk me kitail onopki?

¹⁶ Karasepe 3:  Ni atail onop Paipel rehn emen, dahme kakete wiawi ma kitail kin ihte mweidohng neitail tohnsukuhl kan ren wadekasangte pasapeng kan nan pwuhk me kitail onopki? E sohte pahn kekeirda nan padahk mehlel. Dahme kahrehda? Pwehki tohnsukuhl men me kin wia met oh sohte medemedewe duwen pasapeng kan kak duwehla tuhke ehu me kalohwe kan sohte leldihla wasa loal. Ni aramas akan ar kin uhwongada, e kak apwal ong ih en mihmi nan padahk mehlel. (Mad. 13:20, 21) Pwehn sewese neitail tohnsukuhlo, kitail anahne idek reh ia eh pepehm ong dahme e kin sukuhlki. Song en diarada ma e pwungki dahme e kin sukuhlki oh dahme kahrehda e ahneki soangen pepehmo. Kowe eri sewese en medemedewe iren Paipel kan pwe dahme e kamehlele pahn poahsoankihda Paipel. (Ipru 5:14) Ma kitail kin doadoahngki mwahu peidek kan, neitail tohnsukuhl kan pahn kehlail nan padahk mehlel oh kak kolokol arail lelepek ni meteikan ar kin uhwong de song en pitihiraildi. (Kol. 2:6-8) Pil dahme kitail kak wia pwehn wia sounkadehde mwahu kei en rongamwahu?

17, 18. Ni omw mi ni ihmw ehu oh iengomw sounkalohko koasokosoi, ia duwen omw kak sewese ih?

¹⁷ Sises ketin poaronepeseng sapwellime tohnpadahk kan nan kalohk wad riemen. (Mark 6:7; Luk 10:1) Mwuhr, wahnpoaron Pohl koasoia duwen ‘ienge tohndoadoahk kan’ me iang ih nan doadoahk en kalohki rongamwahwo. (Pil. 4:3) Nan pahr 1953, sapwellimen Siohwa pwihn tapiada prokram tohrohr ehu me sounkalohk kan pahn wia kaiahn ong sounkalohk teikan nan doadoahk en kalohk.

¹⁸ Ni omw iang emen sounkalohk kohla ni ehu ihmw, dahme ke kak wia pwehn sewese ih erein eh padapadahk ong tohnihmwo? (Wadek 1 Korint 3:6-9.) Pahkalahng ire kan nan noumw Paipel. Rong mwahu ni sounkalohko eh koasoakoasoi pwe e de anahne omw sawas en sewese tohnihmwo en kak medemedewe. (Ekl. 4:12) Ahpw kanahieng ken dehr sopuk ma sounkalohko wiewia padahk mwahu de ma tohnihmwo koasokosoi. Ma ke sopuk ara koasokosoi, ke kak kahrehda sounkalohko en mworusala de kapingada madamadau en tohnihmwo. E sohte sapwung en kihda ire ehu de riau, ahpw mwurin mwo ke anahne mweidohng sounkalohko en pousehlahte dahme e koasoia.

19. Dahme kitail anahne tamataman oh dahme kahrehda?

¹⁹ Ahnsou me kowe oh iengomw sounkalohko kohkohlahng ihmw teikan, ia duwen amwa kak sawaspene pwehn wia sounkadehde mwahu kei en rongamwahu? Doadoahngki ahnsowo en koasoia ia duwen amwa kak kamwahwihala amwa padahk kan. Kanahieng ken dehr koasoia soahng suwed kan duwen aramas akan nan omw wasahn kalohk. Oh dehr kaulimki riomw Kristian kan. (Lep. Pad. 18:24) Kitail anahne tamataman me sohte emen rehtail me unsek. Ni kadek, Siohwa ketikihong kitail pwais kesempwal en kalohki rongamwahwo oh ketin padahkihong kitail en kalohk. (Wadek 2 Korint 4:1, 7.) Eri, kitail koaros en kasalehda atail kalahnganki rongamwahwo sang ni atail kin wia uwen atail kak en wia sounkadehde mwahu kei en rongamwahu.