Jesusqa Juan Bautistata jatunpaj qhawaj. Tiemponmanta runasrí mana. Chayrayku Jesusqa imaynachus runas kasqankuta uj kikinchaywan sutʼincharqa. Pay nerqa: “¿Piwantaj kay tiempomanta runasta kikinchasajri? Paykunaqa rijchʼakunku mercado plazaspi tiyashaj wawasman, pikunachus pujllaj wawa masisninkuta qhaparispa ninku: ‘Qenata tocaporqayku manataj tusorqankichejchu, llakiy takiyta takiporqayku nitaj llakikorqankichejchu’, nispa” (Mateo 11:16, 17).

Chay nisqanta entiendenapaj, Jesús nerqa: “Juanqa mana mikhuspa nitaj ujyaspa jamorqa, runastaj ninku: ‘Supayniyoj’, nispa. Noqaqa mikhuspa, ujyaspataj jamuni, runastaj niwanku: ‘Kay runaqa anchata mikhun, vinomanta wañusqataj, chantapis impuesterospata, juchasapaspatawan masin’, nispa” (Mateo 11:18, 19). Juanqa nazareo kasqanrayku, mana vinota ujyajchu. Chayraykutaj runasqa, “supayniyoj” nej kanku (Números 6:2, 3; Lucas 1:15). Jesustajrí tukuy runas jinallataj mikhojtaj, ujyajtaj, jinapis maychus kasqallanta. Runasrí Jesusmanta nej kanku: “Anchata mikhun, vinomanta wañusqataj”, nispa. Runasqa ni imawan kusichinapaj jinapuni karqanku.

Chayrayku Jesusqa, tiemponmanta runasta qʼellisiri wawaswan kikincharqa. Chay wawasqa pujllaj wawa masisninku qenata tocapojtinku mana tusunkuchu, llakiy takiyta takipojtinkutaj mana llakikunkuchu. Chantachá Jesús nerqa: “Uj runaj yachaynenqa cheqan kajta ruwasqanpi yachakun”, nispa (Mateo 11:16, 19). Ajinataj karqa, Jesuswan Juan Bautistawanqa “cheqan kajta” ruwasharqanku. Chayrayku tiemponkumanta runasqa, qhasillamanta paykunata juchacharqanku.

Jesusqa chay runasta juchachaytawan, Corazín, Betsaida, Capernaum llajtasta kʼamerqa. Payqa chay llajtaspi ashkha milagrosta ruwarqa. Chayrayku nerqa: “Qankunapi ruwakorqa chay milagroschus Tiro llajtapi, Sidón llajtapi ima ruwakunman karqa chayqa, unayña juchasninkumanta pesachikunkuman karqa”, nispa. Jesusqa Capernaumtapis kʼamillarqataj, maypichus uj tiempota tiyakorqa, chayta. Imajtinchus chay llajtamantapis pisi runaslla Jesusta kasukorqanku. Chayrayku Jesusqa chay llajtamanta runasman nerqa: “Qankunapaj Juicio Pʼunchayqa aswan sinchʼi kanqa, Sodoma jallpʼamanta nisqaqa”, nispa (Mateo 11:24).

Chaymantataj Jesusqa Tatanta jatuncharqa. Imajtinchus Diosqa, “yachayniyojkunamanta, yuyaysapasmantawan” yachachiyninta pakaykorqa sutʼincharqataj “wawas jina” kajkunaman, nisunman llampʼu sonqo runasman (Mateo 11:25). Jesustaj llampʼu sonqo runasman nerqa: “Noqaman jamuychej tukuy saykʼusqa kajkuna, llasa qʼepiyojkunapis, noqataj samarichisqaykichej. Yugoyman churakuychej, noqamantataj yachakuychej, noqaqa llampʼu sonqo, kʼumuykukoj sonqotaj kani, kausayniykichejpajtaj samarikuyta tarinkichej. Imaraykuchus yugoyqa llampʼulla, qʼepiypis chhallalla”, nispa (Mateo 11:28-30).

Fariseoswan leymanta yachachejkunawanqa, imaymana costumbresta rikhuricherqanku. Samarikuna Pʼunchaypajpis ashkha leyesta churarqanku. Chaykunataj llasa qʼepi jina karqa. Jesustajrí Diosmanta cheqanta yachachispa, chay llasa qʼepimanta runasta samaricherqa. Imajtinchus Diosta yupaychayqa ni ima costumbrewanpis chajrusqachu. Ñaupa tiempomanta autoridadesqa, runasta kʼumuykachachej kanku. Jesusrí paykunata sonqocharqa. Payqa sonqochallarqataj juchallisqankumanta llakisqa kajkunata. Paykunamantaj willarqa, imatachus ruwananku  kasqanta juchasninku pampachasqa kananpaj, Dioswan allinyakunankupaj ima.

Jesuspa yugonqa chhallitalla. Chayman churakojkunataj, khuyakoj Tatanchej Jehovaman kausayninkuta qospa sirviyta atinku. Chaytaj atikullan, imajtinchus ‘kamachisqasninta juntʼayqa atina jinalla’ (1 Juan 5:3).