Jesusqa fariseosta costumbresninkuman jinalla ruwasqankumanta kʼamerqa. Chantá yachachisqasninwan Capernaummanta Tironejman, Sidonnejmanwan riporqa. Chaynejqa Fenicia japʼiypi kasharqa, may karupitaj.

Jesusqa chaypi uj wasipi alojakorqa. Payqa mana munarqachu runas yachanankuta chay llajtaman chayasqanta. Runastaj chayman chayasqanta yachaspa maskʼamorqankupacha. Chay runasmanta ujnenqa, griegota parlaj warmi karqa. Chay warmeqa maytapuni Jesusmanta mañakorqa: “Khuyarikuway ari Señor, Davidpa Wawan. Warmi wawayta anchataña supay ñakʼarichishan”, nispa (Mateo 15:22; Marcos 7:26).

Jesustajrí mana kasorqachu. Chayrayku yachachisqasnenqa nerqanku: “Kay warmita kachapuy, imaraykuchus qhaparispa qhepanchejta jamushan”, nispa. Jesustajrí nerqa: “Diosqa Israel llajtallaman kachamuwan, paykunaqa chinkasqa ovejas jina kanku”, nispa. Jinapis chay warmeqa Jesusmanta mañakullarqapuni. Ñaupaqenman qonqoriykukuspataj nerqa: “¡Señor, yanapariway ari!”, nispa (Mateo 15:23-25).

Jesusqa chay warmi imayna creeyniyojchus kasqanta yachayta munarqa. Chayrayku judíos wajkunawan mana allintachu kausasqankumanta parlaspa nerqa: “Mana allinchu wawaspa tʼantankuta qhechuspa alqetusman choqayqa”, nispa (Mateo 15:26). Jesusqa ‘alqetusmanta’ parlaspa waj llajtayoj runasmantapis khuyakusqanta rikucherqa. Chaytaj sutʼichá karqa uyanpi, parlasqanpi ima.

Chay warmitajrí mana phiñakorqachu. Astawanpis nerqa: “Arí Señor. Chaywanpis alqetusqa dueñosninkoj mesanmanta tʼanta tʼunas tʼakakamusqanta mikhunku”, nispa. Jesusqa chay warmi llampʼu sonqo, creeyniyojtaj kasqanta reparaspa nerqa: “Creesqaykeqa may jatun. Munasqaykiman jina ruwakuchun”, nispa (Mateo 15:27, 28). Chay warmej wawantaj, wasillanpi kaspapis chay rato sanoyaporqa. Chay warmeqa wasinman kutipuspa “imillitanta camapi sirikushajta tariparqa, supaytaj paymanta llojsisqaña” (Marcos 7:30).

Jesuswan yachachisqasninwanqa, Feniciamanta ripuspa Jordán mayu ladoman rerqanku. Chantá Galilea qochaj norte ladontasina Jordán mayuta chimparqanku. Chaymantataj Decapolispi uj orqoman wicharerqanku. Chay lugarmanta runastajrí, chayta yachaytawan Jesusman pusarqanku cojosta, ñukʼusta, ciegosta, opitasta ima. Jesustaj chay onqosqasta sanoyacherqa. Runasqa chayta rikuspa mayta tʼukorqanku, Israelpa Diosnintataj jatuncharqanku.

Chantá Jesusqa, runas chaupipi uj lojtʼituta rikorqa. Payqa khaku khakullata parlakoj, mancharisqataj kasharqa. Chayraykuchá Jesusqa payta wajnejman pusarqa. Chaypitaj imaynatachus payta sanoyachinanta willarqa. Jesusqa chay runaj ninrisninman dedosninta satʼiykorqa. Chantá dedonman thoqaytawan chay runaj qallunta llankharerqa. Cielota qhawarispataj nerqa: “Éffatha”, nispa. Chayqa niyta munan: “Kicharikuy”. Chay ratopachataj runaj ninrisnenqa kicharikorqanku, chʼuwitataj parlarerqa. Jesusqa mana munarqachu runas chayta yachanankuta. Astawanpis payqa munarqa, tukuy runas paykuna kikinpuni paypa ruwasqasninta rikusqankurayku, yachachisqasninta uyarisqankurayku ima paypi creenankuta (Marcos 7:32-36).

 Jesús milagrosta ruwasqanqa runasta maytapuni tʼukucherqa. Chayrayku nerqanku: “Tukuy imata allinta ruwan. Lojtʼusta uyarichin, opastapis parlarichin”, nispa (Marcos 7:37).