¿IMËLLAPIS alläpa mana alli y llakishqa sientikurqunkiku? Tsëqa, Adriäna imanö sientikunqanta entiendinkichi. Pëqa imëpis llakishqalla y yarpachakushqallam kakoq. Tsënö kakunqanqa, juk qeshyamanna tikrashqa kanqantam doctorkuna niyarqan.

Japonpita Kaöru jutiyoq nuna pasanqanta rikärishun, pëqa edäna y qeshyapäkoq teytankunatam cuidarqan. Pëmi kënö willakun: “Tsë witsankunaqa, trabäjüchö alläpam exigiyämaq. Tsëmi pachäpis mallaqaqnatsu y punïtapis puëdirqänatsu. Alläpa mana allikunapa pasarmi, wanukïllatana munaqpis kä”.

Nigeriapita Ojebödi jutiyoq nunam kënö nin: “Llakishqallam kakoq kä, y imallapitapis rasllam waqakureq kä. Hasta kikï wanutsikuritapis pensarqämi”. Ojebödi, Kaöru y Adriänaqa, mana allikunapa pasëkarpis kawarmi sïguiyarqan. Peru cada watam, 800 milpitapis mas nunakunaqa kikinkuna wanïninkuna ashiyashqa.

Tsënö kikinkuna wanutsikureq kaqkunaqa masqa ollqukunam kayan, tsëmanqa chäyan yanapayänampaq mañakïta penqakurmi. Peru Jesusqa, qeshyëkaqkunaqa doctorta wanayanqantam nirqan (Lücas 5:31). Tsënö sientikurqa, ama penqakïtsu y yanapakïta ashi. Mëtsika nunakunatam doctorkuna yanapayashqa alli sientikuyänampaq. Ojebödita, Kaöruta y Adriänataqa doctorkunam yanapayarqan mas allina sientikuyänampaq.

Llakishqalla kakï qeshyapita alliyäyänampaqqa, jampikunata upuyanqan y doctorwan parlaq ëwayanqanmi yanapanqa. Jina pëkunaqa familiankuna y amïgunkuna entiendiyänanta y pacienciawan yanapayänantam necesitäyan. Jehovämi mas alli kaq amïguntsikqa, y pëqa Palabran Bibliawanmi yanapamantsik.

Llakishqalla kakï qeshyawan sufreqkunaqa, atska tiempuparan jampikunata upuyan y doctorman ëwayan, jina imëka cambiukunatam kawëninkunachö rurayan. Peru tsë qeshyawanqa ichik tiempullapanam sufriyanqa, porqui shamoq tiempuchöqa alli saloryoqmi kushishqa kawakuyanqa. Tsëman yarparmi, Ojebödi kënö nin: “Isaïas 33:24 textu ninqan cumplikänantaqa alläpam munëkü, tsë witsanqa manam pipis ‘qeshyämi’ ninqanatsu”. ‘Mushoq patsata’ Dios änikushqa kanqanta y “nanatsikï” ni alläpa llakikï mana kanampaq kaqta musyanqëkiqa alläpam yanapashunki (Revelacion [Apocalipsis] 21:1, 4). Llapan qeshyënikikunam chipyëpa ushakärinqa. Manam masqa llakishqalla sientikunkinatsu y manam tsë qeshyakunata ni yarpankillapisnatsu (Isaïas 65:17).