KUYASHQA kastëki wanukïkuptinqa itsa llakishqa, japallëki y culpayoq sientikurqëki. Jina manachi imanöpis këta puëdirqëkitsu. Tsëchi kënö tapukurqëki: “¿Kawënïqa välintsuraq?”.

Kastëki wanuptin waqanqëkiqa, manam delicädu kanqëkitatsu rikätsikun. Rasumpa kaqchöqa, waqarninqa familiëkita kuyanqëkitam rikätsikunki. Tsëpa pasarninqa, ¿yamë sientikïta puëdinkimantsuraq?

Kastëki wanuptin llakikunqëkita imapis mana ushakätsinampaq kaqta creiptikipis, itsa këkuna yanapashunkiman:

WAQËQA YANAPAKUNMI

Kuyashqa kastankunata oqraqkunaqa, manam igual-llatsu llakikuyan. Wakinkunaqa pöcu tiempullachömi alli sientikuyan, peru wakinqa mas unëparan llakikuyan. Tsënö kaptimpis, waqëqa alläpam yanapakun. Qallananchö parlanqantsik Vanëssaqa kënömi nin: “Turï wanuriptinqa waqakoqllam kä, y tsëqa alli sientikunäpaqmi yanapamarqan”. Y illaqpita nananta oqraq Sofïanam kënö nin: “Pasamanqanta yarpëqa alläpam llakitsimaq. Tsëqa imëka antsashqa herïdata jampiyämunampaq kichayämunqannömi alläpa nanan. Tsë nanë mana aguantëpaqnö kaptimpis, herïda kachakänampaqqa tsënöran jampiyänan”.

 IMANÖ KËKANQANTSIKTAM WILLAKUNANTSIK

Tsë witsanchöqa manam piwampis parlëta munankitsu, peru alli sientikïta munarqa manam kikikillapitaqa puëdinkitsu. Teytanta wanïchö oqraq 17 watayoq Jared jutiyoq jövinmi, kënö willakun: “Mana käbeqtachi parlakoq kä, peru imanö këkanqäpita wakinkunawan parlanqäqa alläpam yanapamarqan”. Kë revistapa qallanan yachatsikïchö parlanqantsik, Janïceqa kënömi nin: “Wakinkunawan parlanqäqa alläpam yanapamarqan. Pëkunaqa entiendiyämaqmi y manam japallätsu sientikoq kä”.

YANAPAYÄSHUNËKITA JAQI

Juk doctöram kënö nin: “Tsëllaraq kuyashqa kastankunata oqrariyaptin amïgunkuna y familiankuna yanapayänanta jaqeqkunaqa, watakuna pasanqanmannömi mas allina sientikuyanqa”. Imanö yanapayäshunëkipaq kaqtam amïguïkikunata willarinëki. Pëkunaqa yanapayäshïnikita munayanmi, peru manam musyayantsu imanö rurayänampaq kaqta (Proverbius 17:17).

DIOSMANMI MAS WITINANTSIK

Tïnam kënö nin: “Cancer qeshyawan illaqpita qowä wanukïkuptinqa, alläpa llakishqam sientikurqä y Diostam imanö sientikunqäta willarqä. Cada qoyam Diosman mañakoq kä tsë junaq yanapamänampaq, y Diosqa imëkanöpam yanapamaq”. Mamäninta wanïchö oqraq 22 watayoq Tarsha jutiyoq shipashmi, tsë witsan pasanqankunata kënö yarpan: “Llapan junaqkuna Bibliata leyinqäqa, alli rurëkunaman pensanäpaq y alli sientikunäpaqmi yanapamarqan”.

KAWARIYÄMUNAMPAQ KAQMANMI PENSANANTSIK

Tïnam kënö nin: “Qowä wanunqan witsanllaqa, kawarimunampaq kaqman pensanqäqa manam yanapamarqantsu. Noqaqa, qowä lädüchö kanantam munarqä y wamräkunapis teytan yanapanantam alläpa nesecitäyarqan. Chusku watanam pasarishqa qowä wanunqampita, y kananqa kawarimunampaq kaqman pensanqäqa alläpam yanapaman. Yapë tinkuriyänäpaq kaqman pensanqäqa alläpam kushitsiman”.

Kawariyämunampaq kaqta musyëpis, manam tsë hörallaqa llakikïnintsikta ushakäratsinqatsu. Itsa Vanëssa kënö ninqan yanapashunki: “Imëpis llakishqalla kakunapaq kaqtam pensantsik, peru ichikllapa ichikllapam mas allina sientikuntsik”.

Kuyashqa kastëkitaqa manam imapis qonqatsishunkitsu, peru imëkatam rurëta puëdinki. Amïguïkikunawan karnin kushishqa kanëkipaq y allikunata ruranëkipaqmi Diosqa yanapashunki. Ichikllachönam Diosnintsikqa wanushqakunata kawaritsimunqa. Pëqa alläpam munëkun kuyashqa kastëkiwan yapë tinkuriyänëkita y llakikï chipyëpa ushakänantapis.