Bibliapita tapukïkuna
¿Imapaqtaq kawantsik?
¿Pukllanallapaq, casakunallapaq, wamrayoq kanallapaq y awkinyänallapaqtsuraq kawantsik? ¿Imëllapis kënö tapukurqunkiku? (Job 14:1, 2.) Bibliam nimantsik hasta mas yachaq nunakunapis tsënö tapukuyanqanta. (Leyi Eclesiastes 2:11.)
Imapaq kawanqantsikta musyanapaqqa, kawë imanö qallanqanta musyanantsikmi precisan. Nunapa peqan y llapan cuerpun imanö rurashqa kanqanta estudiarmi, mëtsikaq nunakuna cuentata qokuyashqa juk Yachaq kamamanqantsikta. (Leyi Salmu 139:14.) Tsëqa, ¿imapaqtaq kamamarquntsik? Imapaq kamashqa kanqantsikta yachakunqantsikqa kawënintsiktam kushitsinqa.
¿Imapaqtaq Dios kamamarquntsik?
Punta teytantsikkunata Dios kamarninqa, juk shumaq cargutam qorqan. Diospa munëninqa karqan nunakuna imëyaqpis kawakuyänan, wamrankuna yurir Patsaman juntayänan y juk shumaq huertaman Patsata tikratsiyänanmi. (Leyi Genesis 1:28, 31.)
Adanwan Ëva Diospa contran churakäriyaptimpis, nunakunapaq alli kaqta munanqanqa manam ushakarqantsu. Sirweqninkunata salvanampaq y Patsachö munanqan rurakänampaq Dios imëpis trabajëkanqantam Bibliaqa willakun. Jina Diosqa imëpis munashqa kawënikichö qampis kushikunëkitam. (Leyi Salmu 37:29.) Diosqa kushikunatam munan, y tsënö kushishqa kawakunapaq imata ruranapaq kaqtam Bibliaqa willamantsik.