YAYA MAMACUNA
7: Alli causanata huahuacunaman yachachichij
¿IMA SHINATAJ CAITA RURAI TUCUNGUICHIJ?
Yaya mamacunaca huahuacuna alli causachunmi yachachina can. Cancuna honrados cajpica huahuacunapish honradosmi cangacuna.
Cancuna uchillamanta huahuacunata honrados cachun, respetota charichun yachachijpica paicuna jatunyashpaca alli gentecunami tucungacuna.
BIBLIAPICA: “Cambaj huahuataca uchilla cajpiraj, alli yachachingui. Chashna yachachijpica, yuyajyashpapish manataj cungaringachu” ninmi (Proverbios 22:6).
¿IMAMANTATAJ HUAHUACUNA ALLI CAUSACHUN YACHACHINA CANCHIJ?
Shuj huarmica: “Tecnología mirarishcamantami huahuacunaman allita yachachinaca importante can. Huaquinpica huahuacunaca ñucanchijhuan cashpapish mana alli cosascunatami ricui tucuncuna” ninmi.
BIBLIAPICA: “Sinchi micuica sinchiyashcacunapajllami. Shinallataj ima alli cashcata, ima mana alli cashcatapish agllana yuyaita charijcunapajllami” ninmi (Hebreos 5:14).
Respetota charinami tucuimanta yalli alli can. Por ejemplo, shungumanta pagui nina, quishpichihuai nina, shujtajcunamanta preocuparinami importante can. Pero cunan punllacunapi gentecunaca tecnología mirarishcamantami shujtajcunapi yuyanapaj randica celularllapi, computadorallapi ocuparincuna.
BIBLIAPICA: “Ima shinami shujtajcunataca cancunapaj allita rurachun munanguichij, chashnallataj cancunapish shujtajcunapaj allita ruraichij” ninmi (Lucas 6:31).
¿IMATATAJ RURANA CANGUI?
Alli causanamanta yachachi. Huahuacunataca uchillamantami huainayana mana alli cashcata yachachina canchij. Chashna yachachijpimi paicunaca ña jatunyashpaca chai juchapi mana urmangacuna.
CAITA RURAI: Televisionpi huañuchishcata ricushpaca, ‘¿imamantashi gentecunaca chashna ruran?’ nishpa huahuacunata tapui. Chashnami ima alli cashcata ima mana alli cashcata yachachingui.
Brandon runaca: “Huahuacuna alli decisionta agllachunca paicunallatajmi ima alli cashcata o ima mana alli cashcata yachana can” ninmi.
Allita ruranata yachachi. Shuj libropica: “Huahuacunataca uchilla cajpirajmi shungumanta pagui ninata, quishpichihuai ninata, shujtajcunamanta preocuparinata yachachina canchij. Chashna rurajpimi paicunaca escuelapipish, comunidadpipish shujtajcunata ayudangapaj esforzaringacuna” ninmi (Parenting Without Borders).
CAITA RURAI: Huahuacunamanca ima tareata rurachun mandai. Chashnami paicunaca shujtajcunata ayudana cashcata yachangacuna.
Shuj huarmica: “Huahuacunata huasipi ayudachun yachachijpica jovenyashpa paicunalla causashpaca tucuitami alli rurangacuna” ninmi.
