1, 2. a) Ñucanchita na saquij, perdonaj amigocunata charishpaca ¿imamandata cushijupanchi? b) ¿Ima tapuicunatata yachajupashun?

SHUJ ali amigoca ¿imashinata can? Ashley shuti paniguca ninmi: “Shuj ali amigoca nunca na ñucanchitaca saquinllu. Imagupi pandarijpipash perdonanmi” nishpa. Chashna ali amigocunata charishpaca tucuicunallatami ninanda cushijushpa, paica ñucata llaquihuashcami nishpa ali sintirinchi (Prov. 17:17).

² Jehová Diosca ñucanchita na saquij, perdonangapaj munaj Diosmi can. Paimi ñucanchipaca ashtahuan ali amigo can. Salmo libropica ninmi: “Can Jatun Diosca, aligupachami capangui, nalita rurashcatapash cungajmi capangui. Tucui canda mañajcunataca, ninandapacha llaquijmi capangui” nishpa (Sal. 86:5). Na saquijcuna, perdonajcunaca ¿imashinata can? Jehová Diosca ¿imashinata na saquishcata, perdonaj Dios cashcata ricuchin? ¿Imashinata Jehovapa ejemplota catishun? Cai tapuicunata yachajushpaca ñucanchi ali amigo Jehová Diostaca ashtahuanmi juyashun. Congregacionbi huauquipanicunahuanbash ashtahuan alimi llevarishun (1 Juan 4:​7, 8).

3. ¿Na saquijcunaca ¿imashinata can?

³ Na saquij gentecunaca ima llaquicuna ricurijpipash paicuna juyashca gentecunata o cosascunataca nimamanda na saquinllu. Tucui horasmi ayudanajunlla. Jehová Dios shinaca pipash na tianllu. Chaimandami Bibliapica nin: “Jehová Diosca napacha saquinllu” nishpa (Apo. 16:​5, NM).

4, 5. a) Jehová Diosca ¿imashinata na saquij Dios cashcata ricuchishca? b) Jehová Dios na saquij Dios cashcata yarishpaca ¿imashinata animarinchi?

⁴ Jehová Diosca ¿imashinata na saquij Dios cashcata ricuchishca?  Paita sirvijcunataca ima horapash na saquinllu. Chaimandami rey Davidca nirca: “Can Taita Diosta na saquijtaca canbash na saquinguichu” nishpa (2 Sam. 22:​26, NM). Jehová Diosca na saquij Dios caimandami, David jatun llaquicunapi cajpica Davidmanga imata ruranata yachachirca, cuidarca, salvarcapash (2 Sam. 22:1). ¿Imamandata Taita Diosca Davidta na saquirca? Davidllata Jehová Diosta na saquijpimi Jehová Diospash Davidtaca na saquirca. Shinaca yaripashunchi: Paita sirvijcuna na saquijpica Taita Diospash paicunataca na saquinllu (Prov. 2:​6-8).

⁵ Paita sirvijcunata Jehová Dios na saquijta yarishpaca ninandami animarinchi. Raúl shuti huauquiguca ninmi: “Jatun llaquicunapi Davidta Jehová Dios ayudashcata liishpaca ashtacatami cushijuni. Urcucunapi pacajushpa purijujpipash Taita Diosca siempremi Davidtaca cuidarca. Chaicunata liishpami yani, jatun llaquihuan cashpapash Jehovata na saquijpica Jehová Diospash ñucataca na saquihuangachu” nishpa. ¿Nachu tucuicunallata shina yanchi? (Rom. 8:​38, 39.)

6. a) Jehová Diosca ¿imashinata ricuchishca paipa sirvijcunata na saquishcata? b) Chaica ¿imashinata ñucanchita ayudan?

⁶ Jehová Diosca paipa mandashcacunata pactachishpami na saquij Dios cashcata ricuchishca. Taita Diosca ninmi: “Rucuyangacamambash, ñucallatami cuidashpa charini” nishpa (Is. 46:4). Imata ruragrijushpapash Jehová Diosca paipa mandashcacunata pactachinmi (Mal. 3:6). Pai rurasha nishcacunatapash pactachishpami Taita Diosca na saquij Dios cashcata ricuchin (Is. 55:11). Chaimandami paipa mandashcacunata cazungapaj esforzarijpica, ñucanchita bendicianga (Is. 48:​17, 18).

7. Jehovapa ejemplota catishpaca ¿imashinata shujcunata na saquishcata ricupachishun?

⁷ Jehovapa ejemplota catishpami llaquilla huauquicunataca ayudana canchi (Prov. 3:27). Shuj ejemplota ricupashun. Ungushca cashpa, familiacuna Jehovata ama sirvichun jarcajpi o nalita ruraimanda shuj huauqui desanimarishca cajpica ñucanchira paicunapajman quimirishpami “juyailla shimicunahuan, cushichij shimicunahuan” parlashpa ali canman (Zac. 1:13.) * Shina rurashpaca propio ‘huauquitapash yali ali’ amigocunami cashun (Prov. 18:24).

8. Cazarashcacunapash, shujcunapash ¿imashinata Jehovapa ejemplota catina canchi?

⁸ Paita sirvijcunata na saquij Diospa ejemplota catishpaca ¿imatata cusahuarmicunaca rurana capanchi? Cazarashpaca huarmihuanlla o cusahuanlla causangapami ari nircanchi (Prov. 5:​15-18). Chaimandami shuj huarmihuan o shuj jarihuan juchapi urmanataca yaitallapash na yana canchi (Mat. 5:28). Shinallata, congregacionbi huauquicunamandaca na cuentocunata churashpa parlajunachu canchi. Imaguta uyashpapash na caiman chaiman parlajunachu canchi. Ashtahuangarin cuentocunataca uyangapallapash na munanachu capanchi (Prov. 12:18).

9, 10. a) Ashtahuanbachaca ¿pitata na saquina capanchi? b) Huaquinbica ¿imamandata Jehovata cazunaca shinlli can?

⁹ Ashtahuanbachaca Jehovata cazushpami paitaca na saquina canchi. Jehovata ama saquingapaca imatami Jehová Dios juyan, chaitami ñucanchipash juyana canchi. Shinallata imatami Jehová Dios millanayachin chaitami ñucanchipash millanayachina canchi. Chaipaca ninandami esforzarina canchi (Salmo 97:​10, liingui). Jehovamanda ashtahuan yachajushpaca ashtahuan jahuallami paitaca cazushun (Sal. 119:104).

 ¹⁰ Huaquinbica Jehovata cazunaca shinllipachami can. Shuj ejemplota ricupashun. Huaquin solterocunaca cazarangapaj munashpapash Jehovata sirvij huarmita o cusataca nara tari ushashcachu (1 Cor. 7:39). Huaquin soltera panigucunataca trabajopi na Testigo de Jehová cumbacunaca siempremi caihuan cazarai, caica alimi can ninajun. Panicunaca paicunalla sintirishpapash Jehovata cazungapaj munaimandami cumbacunapa shimitaca na uyashca. Shinaca ¿nachu chai panigucunapa ali ejemplomandaca ninanda cushijupanchi? Tucui shunguhuan cazungapaj munajcunataca Jehová Diosca ninandami bendician (Heb. 11:6).

11. Perdonanata yachajcunaca ¿imashinata can?

¹¹ Juchacunata anchuchishpa perdonaj Dios cajpimi Jehovataca ninanda alicachinchi. Perdonanata yachajcunaca shujcuna tucui shunguhuan arripintirishpa perdonahuai nijpica perdonanllami. Perdonajcunaca na risintirishpalla quedanllu. Shinapash juchata o imapi pandarishcacunataca na pacanllu. Bibliapica ninmi, Jehová Diosca tucui shunguhuan arripintirijcunapa ‘nalita rurashcata cungangapa’ o perdonangapami listo can nishpa (Sal. 86:5).

12. a) Jehová Diosca ¿imashinata perdonangapaj munashcata ricuchin? b) Jehová Diosca ¿imashinata perdonan?

¹² Jehová Diosca ¿imashinata perdonangapaj munaj Dios cashcata ricuchin? Jehová Dios perdonashpaca cungaitapacha cungashpami juchacunataca anchuchitapacha anchuchin (Is. 55:7). Hechos 3:19​pica apóstol Pedroca nircami: ‘Cangunapaj juchata Dios cungachun [“borrachunga”, NM], ninanda llaquirishpami Diospajman tigrana’ canguichi nishpa (chai textota liingui). Juchayujcuna tucui shunguhuan arripintirishpaca nalita rurangapaca ña na munanllu  (2 Cor. 7:​10, 11). Ashtahuangarin nalita ruranata saquishpami Diospa ali ñanbilla puri callarin. Pedrota uyajcuna tucui shunguhuan arripintirijpica Jehová Diosca perdonasha nircami. Shinaca, Jehová Dios perdonashpaca cungaitapachami cungan (Heb. 10:22; 1 Juan 1:7).

13. ¿Imamandata Taita Diosca nirca: “Paicunapaj juchataca, napacha cutinga yarishachu” nishpa?

¹³ ¿Imashinata yachanchi Jehová Dios perdonashpaca juchacunata anchuchitapacha anchuchijta? Jehová perdonajta ali intindichunga Jehovallatami Jeremiasmanga parlarca ungidocuna imashina perdonai tucunata (Jeremías 31:​34, liingui). Jehová Diosca nircami: “Paicunapaj juchataca, napacha cutinga yarishachu” nishpa. Shinaca, perdonanimi nishpaca, ñucanchi juchacunataca Taita Diosca ña na yarijunllu, nalitami rurashcangui nishpapash na cutin cutin nali sintichijunllu (Rom. 4:​7, 8).

14. Jehová Dios perdonaj cashcata yarishpaca ¿imashinata sintirishun? Shuj ejemplota nipai.

¹⁴ Jehová Dios perdonaj Dios cashcata yarishpaca alimi sintirinchi. Elenapa ejemplota ricupashun. Caina huatacunapillami Elenaca congregacionmanda llujchi tucurca. Shinapash huaquin huatacuna jipaca cutinmi congregacionman tigramurca. Elenaca ninmi: “Ñucallata cutin cutin pensarijushpami shujcunamanbash nin carcani, Taita Diosca perdonahuashcami nishpa. Shinapash shungu ucupica Taita Dios perdonashcataca na crircanichu. Shujcunatallami Diosca juyan nishpami yan carcani”. Jehová Dios perdonajta cringapami Elenaca Bibliapi huaquin textocunata liirca. Shinami, Taita Dios paita llaquishpa juyajta intindirca. Elenaca nircapashmi: “Na pensanachu canchi, Taita Diospa ñaupajpica mapami cani, ñuca juchacunataca na cungangachu, ñuca tucui causapimi chai juchaca ñucata catiriajuhuangalla” nishpa. * Ashtahuanbash nircami: “Ñuca yuyaicunataca na ñapash cambiai ushashachu, shinapash Jehová Dios paipajman quimirichun munashcataca chairami ali intindijuni. Cunanga shuj jatun quipita ladoman shitashca cuendami fangalla sintirini” nishpa. Imashinami ricupanchi, Jehová Diosca ñucanchita llaquishpa perdonaj Diosmi can (Sal. 103:9).

15. Jehovapa ejemplota catishpa perdonangapaca ¿imatata rurana capanchi?

¹⁵ Tucui shunguhuan arripintirishpa perdonahuai nijpica Jehovapa ejemplota catishpami tucuicunahuan perdonarina capanchi (Lucas 17:​3, 4, liingui). Yaripashunchi, Jehová Dios perdonashpaca juchacunataca ña na yarinllu. Nalitami rurarcangui nishpapash na cutin cutin nali sintichijunllu. Ñucanchicunapash shujcunata perdonashpaca, paicunapa pandarishcacunataca huashaman saquishpami chai pandarishcacunataca cutinga ña na parlajuna canchi.

16. a) Perdonanami canchi nishpaca ¿shujcuna nalita rurajujta ricushpa upalla saquirinata o paicuna ñucanchimanda aprovecharichun saquinatachu nijun? b) Taita Dios perdonachunga ¿imatata rurana capanchi?

¹⁶ Perdonanami canchi nishpaca ¿shujcuna nalita rurajujta ricushpa upalla saquirinata o paicuna ñucanchimanda aprovecharichun saquinatachu nijun? Na shinachu can. Perdonanami canchi nishpaca shungupi na nanarishpa saquirinatami nijun. Ashtahuangarin Taita Dios perdonachun munashpaca, ñucanchipash shujcunata perdonanami canchi (Mat. 6:​14, 15). Jehová Diosca ñucanchita llaquishpami ñucanchicuna  ‘ñutu alpa cajta yarin’ (Sal. 103:14). Shinaca ¿nachu ñucanchicunapash shujcunata llaquishpa perdonana capanchi? (Efe. 4:32.)

17. Shuj huauqui o shuj pani nali sintichijpica ¿imatata rurana capanchi paihuan ama risintiringapaj?

¹⁷ Huaquinbica perdonanaca shinllimi can. Apóstol Pablopa tiempopi ungidocunapajpash shujcunata perdonanaca shinllimi carca (Filip. 4:2). Shuj huaqui o shuj pani ñucanchijta nali sintichijpica ¿imatata rurana canchi ama risintiringapaj? Jobpa ejemplota ricupashunchi. Jobca Elifaz, Bildad, Zofar nishcacuna yangamanda juchachijpimi shungupica ninanda nanarirca (Job 10:1; 19:2). Chaimandami Jehová Diosca Elifazta, Bildadta, Zofartaca nalicachishpa rimarca. Ashtahuangarin nircami, Jobpajman rishpa juchacunamanda perdonachun sacrificiocunata ruranguichi nishpa (Job 42:​7-9). Jehová Diosca Jobtapashmi paicunamanda mañangui nishpa mandarca. Jehovata cazushpa chai quimsacunamanda mañashpaca ashtaca bendiciongunatami Jobca chasquirca (Job 42:​10, 12, 16, 17, liingui). Shinaca, pipash ñucanchita nali sintichijpica ¿nachu paicunahuan ama risintiringapaca paicunamanda mañana capanchi?

18, 19. Jehová Diosta ashtahuan alicachingapaca ¿imatata rurana capanchi?

¹⁸ Imashinami ña yachajunajushcanchi, Jehová Diosca paipajman quimirichunmi munan, ñavita ricushpallapash na agllanllu, na mitsachu can, ñucanchi rurai ushashcatallami mañan, paita sirvijcunataca na saquinllu, perdonangapami munan. Chai tucui cosascunata Jehovamanda yachajushpapash jahua jahuallami yachajushcanchi. Shinapash, shamuj punllacunapica unai unaicamanmi Jehová Diostaca ashtahuan rijsishun (Ecl. 3:11). Apóstol Pabloshnami cashna ningapaj munanchi: ‘Taita Diosca tucuita charij, ali yuyaita charij, aligutapacha yachajmi’ can nishpa. Cai quimsa temacunapi Taita Dios imashina cashcata yachajushpa, juyaj Dios cashcata yachashpaca ninandami Taita Diostaca alicachinchi (Rom. 11:33).

¹⁹ Jehová Diosmanda ashtahuan yachajushpa, Jehová imashina cashcata pensarishpa, paipa ejemplota catishpaca ashtahuanmi Jehová Diostaca alicachishun (Efes. 5:1). Shina rurashpaca Salmo librota escribij shinami nishun: “Taita Diospajman quimirinaca aligupachami” can nishpa (Sal. 73:28).