Cai dibujopica shuj nali runahuanmi Jesusca parlajun. Cai runaca nalicunata shinaimandami ninanda llaquirishpa nirca: “Can mandashpaca, ñucata yarihuangui” nishpa. Shina nijpica ¿imatashi Jesusca nirca? *... Jesusca nircami, na llullashpami candaca nini: Paraíso juyailla alpagupica ñucahuanmi cangui nishpa.

Chai paraisoca ¿maipishi canga?... Ricungui, Adanta Evata Taita Dios rurashpaca shuj juyailla paraisogupimi churarca. Chai paraisoca ¿maipita carca, jahua cielopi o cai Alpapichu carca?...

Paraisoca cai Alpapimi carca. Ñucanchi causajuj cai Alpa, shuj paraíso Alpagu tucujpica chai nali runapashmi chaipi canga. Paraíso Alpaguca ¿imashinashi canga?... Ricupashun.

Adán y Eva causashca paraíso Alpagutami Bibliapica “Edén shuti huerta” o “jardín de Edén” nin. Chaipimi Adanda, Evataca churarca. Chai jardinguca ¿imashinashi carca?... Chai jardinguca juyaillagupachami cashcanga.

Jesuspa ladopi runaca paipa juchacunamanda arripintirircami. Shinaca ¿chai runagu cai Alpapi cajpica Jesuspashchu cai Alpapi canga?... Na caipichu canga. Chai punllacunapica Jesusca jahua cielomandami cai Alpata mandajunga. Paraíso Alpagupi causachishpa, ricuriajushami nishpami Jesusca chai nali runataca ñucahuanmi Paraisopi cangui nirca. Shinapash ¿imamandashi Jesusca chai runataca paraíso Alpapi causachun saquinga?...

 Chai runaca Taita Diosta na rijsimandami nalicunata rurarca. Ashtaca gentecunapash Taita Diosmanda pipash na yachachijpi, Taita Diospa mandashcacunata na rijsishpami nalicunata rurashca.

Shinaca, chai gentecunapash Jesushuan parlashca nali runapashmi paraíso Alpagupi causaringa. Chaipimi Jehová Diosmanda yachajushpa paita juyashcata o na juyashcata ricuchinga.

¿Imata rurashpashi Jehová Diosta juyashcataca ricuchinga?... Tucuipi cazushpa. Jehová Diostapash gentecunatapash juyajcunahuan paraíso Alpagupi causashpaca ¡ninandami cushijushun!