LESON 5
Kèl projé Bondieu néna pou la tèr ?
1. Pou kosa Bondieu la kré la tèr ?
Jéova la donn la tèr bann zumin. Sé nout « kaz ». Adan é Èv la pa été kréé pou abit dann sièl. Bondieu lavé déja kré bann zanj pou viv lao (Job 38:4, 7). Li la mèt le premié om dan in joli paradi, ke té i apèl jardin Lédèn (Jenèz 2:15-17). Li la donn Adan èk son bann désandan lokazion d’viv pou toultan su la tèr (Lir Psom 37:29 ; 115:16).
Dann premié débu, lavé rienk le jardin Lédèn ke lété in paradi. Adan é Èv té i doi fé bann zanfan pou ranpli tout la tèr. Zot té i doi osi prann soin tout la tèr, pou transform a li an paradi (Jenèz 1:28). La tèr i sra jamé détrui. Li va rès pou toultan la « kaz » bann domoun (Lir Éklézias 1:4).
Regard le vidéo Poukosa Bondieu la kré la tèr ?
2. Akoz la tèr lé pa in paradi ?
Adan é Èv la dézobéi Jéova. Alor, li la poursuiv a zot an deor le jardin Lédèn. Le paradi la disparèt, é la poin pèrsonn ke la gingn arkré in not. La Bib i di : « La tèr la finn ariv ant la min bann méchan » (Job 9:24 ; lir Jenèz 3:23, 24).
Èske sa i ve dir ke Jéova la lès tonbé son projé pou bann zumin ? Non ! Li lé toupuisan é son volonté i réaliz toujour (Izai 45:18). Li va fé an sort ke tout sak li lavé prévu pou bann zumin i réaliz (Lir Psom 37:11, 34).
3. Koman la tèr va revnir in paradi ?
Pandan le règn Jézu, le Roi choizi par Bondieu, la tèr va revnir in paradi. Dan in gèr ke la Bib i apèl Armagédon, Jézu avèk bann zanj va détrui tout bann zènmi Bondieu. Aprésa, li va anfèrm Satan pandan 1 000 an. Bann sèrviteur Bondieu i sra pa détrui, parske Jézu va gid a zot é va protèj a zot. Zot i poura viv trankil pou toultan dan in paradi su la tèr (Lir Révélasion 20:1-3 ; 21:3, 4).
4. Kansa bann soufrans va disparèt ?
Kansa Bondieu va fé disparèt la méchansté ? Jézu la donn in « sign » ke va montré ke la fin i tard pa pou arivé. Ojourdui, tout sak i éspas dan le monn antié i mèt an danjé la vi bann zumin. Tousa i mont ke nou viv « la fin se monn la » (Lir Matieu 24:3, 7-14, 21, 22).
Depui dann sièl, Jézu va gouvèrn la tèr pandan 1 000 an. Kan li va dirij la tèr, li va fé disparèt tout bann soufrans (Izai 9:6, 7 ; 11:9). Li sra Roi, mé li sra osi Gran Prèt : li va éfas bann péché tout sak i ièm Bondieu. Bondieu va utiliz Jézu pou fé disparèt la maladi, la viéyès é la mor (Lir Izai 25:8 ; 33:24).
5. Kisa i sar viv dann paradi ?
Dan la Sal du Roiyom, ou va rankont domoun ki ièm Bondieu é ki ve aprann sak i fo fé pou kontant son keur.
Bann domoun ki obéi Bondieu va viv dann paradi (1 Jan 2:17). Jézu la demann son bann disip, alé rod bann domoun ki pran pa zot su la oteur, é amont a zot kosa i fo fé, pou ke Bondieu i aprouv a zot. Ojourdui, Jéova lé antrèn prépar domoun par milion, pou viv dan in paradi su la tèr (Sofoni 2:3). Dann landroi ousa bann Témoin Jéova i fé zot rénion, ke i apèl Sal du Roiyom, domoun i aprann koman èt in méyeur mari é in méyeur papa, in méyeur madam é in méyeur momon. Bann paran èk zot zanfan i ador Bondieu ansanm. Gras bann zansègnman la Bib zot i aprann kosa i fo fé pou gingn in vi méyeur (Lir Miché 4:1-4).
