LESON 11
Koman bann vérité biblik i pe èd a nou ?
1. Pou kosa bann domoun la bezoin èt gidé ?
Bann vérité biblik i pous a nou pou prann désèrtin prékosion dan nout vi. Kosa i lé ? (PSOM 36:9).
Nout Kréateur néna plus la sajès ke nou. Li lé nout Papa : li ièm a nou é li fé in kont èk nou. An plus ke sa, li la pa prévu ke nou dirij a nou par nou mèm (Jérémi 10:23). Donk, nout tout, la bezoin èt gidé par Bondieu, kom in zanfan la bezoin ke son bann paran i gid a li (Izai 48:17, 18). Sé pousa ke Bondieu la fé a nou in kado : li la donn a nou bann zansègnman Biblik pou gid a nou (Lir 2 Timoté 3:16).
Bann loi é bann vérité biblik ke Jéova i donn, i amont a nou koman avoir in vi méyeur depui koméla mèm. Tousa i amont a nou osi koman gingn bann bénédiksion pou toultan dan lavnir. Kom Bondieu la kré a nou, lé normal ke nou suiv la diréksion ke li donn a nou avèk gran keur (Lir Psom 19:7, 11 ; Révélasion 4:11).
2. Kosa i lé in prinsip ?
Bann prinsip lé bann vérité biblik ke nou gingn apliké dann diféran situasion. Parkont, i aplik bann loi rienk dan bann ka bien prési (Detéronom 22:8). Pou konèt koman mèt an pratik in vérité biblik dan in situasion, i fo bien réfléchi (Provèrb 2:10-12). Par égzanp, la Bib i ansègn ke la vi lé in kado Bondieu. Sa, lé in lansègnman inportan ki pe gid a nou, kan nou lé dan nout travay, kan nou lé nout kaz é partou ousa nou sa va. Sa i pous a nou pou prann prékosion pou protèj a nou é lé zot (Lir Akt 17:28).
3. Néna 2 vérité biblik vréman inportan : Kosa i lé ?
Jézu la parl su 2 vérité biblik vréman inportan. Le premié vérité i amont a nou pou kèl rézon nou viv : konèt Bondieu, èm a li é sèrv a li avèk fidélité. Dan tout nout bann désizion, nou devré prann an kont se vérité biblik la (Provèrb 3:6). Sak i ésèy vréman mèt an pratik se vérité biblik dan zot vi, i devien bann kamarad Bondieu. Alor, zot lé vréman ereu, é zot nora la vi pou toultan (Lir Matieu 22:36-38).
Le deuzièm vérité biblik i pèrmèt a nou viv an pé avèk lé zot (1 Korintien 13:4-7). Nou mèt an pratik se lansègnman biblik, kan nou trèt lé zot kom Bondieu li mèm i trèt a zot (Lir Matieu 7:12 ; 22:39, 40).
4. Koman bann vérité biblik i pe èd a nou ?
Dan la Bib néna bann zansègnman ki aprann bann fami, kosa zot i doi fé pou viv uni ansanm dan lamour (Kolosien 3:12-14). La Bib i protèj osi bann fami, parske li ansègn a zot se vérité biblik : le maryaj i doi dur pou tout la vi (Lir Jenèz 2:24).
Kan nou mèt an pratik bann zansègnman biblik, sa i protèj a nou par rapor tout sak i touch bann zafèr matèryèl é par rapor nout bann santiman. Souvandéfoi, bann patron i préfèr bann zouvriyé ki réspèkt bann zansègnman biblik, parske banna lé onèt é travayeur (Provèrb 10:4, 26 ; Ébreu 13:18). La Bib i aprann a nou osi kontant a nou sak i fo pou viv é mèt nout lamitié avèk Bondieu an premié avan bann zafèr matèryèl (Lir Matieu 6:24, 25, 33 ; 1 Timoté 6:8-10).
Bann vérité biblik i protèj nout santé (Provèrb 14:30 ; 22:24, 25). Par égzanp, la loi Bondieu i di ki fo pa boir pou èt sou. Kan nou réspèkt sa, nou lé protéjé kont bann maladi mortèl é bann laksidan (Provèrb 23:20). Jéova i anpèch pa nou boir lalkol, mé i fo pa nou abuz (Psom 104:15 ; 1 Korintien 6:10). Bann zansègnman Bondieu i fé a nou bokou d’bien : tousa i aprann a nou fé atansion sak nou fé, mé osi sak nou pans (Psom 119:97-100). Si bann vré krétien i réspèkt bann zansègnman é bann loi Bondieu, sé pa rienk pou gingn bann bienfé. Sé pou donn loneur Jéova (Lir Matieu 5:14-16).
