О левитија кола со на сине свештеникија сине лен разна јавера задаче. Јекх тари задача сине те служинен сар стражарија ко храми. Лен надглединела лен сине о храмско заповеднико. О еврејско писатели о Филон објаснинела кола сине о задаче акале стражаренгере: „Несаве лендар служинена сине сар стражарија англо удара, а несаве англо светилиште те шај те на кхувен мануша со нане лен право ко адава, бизи разлика дали намерно или ненамерно. Јавера пхирена сине околу о храми те шај те аракхен ле. Ола менинена пе сине ко смене хем дивескоро хем раќате“

О судско совет шај сине ко било кова време те родел помош таро акала стражарија. О стражарија сине о единствена Евреија коленге со о Римјања дозволинена сине те овел лен оружје.

Спрема о изучувачи Јоаким Јеремиас, кеда о стражарија астарѓе е Исусе, ов пучља лен соске на керѓе адава џикоте сикавела сине е манушен ко храми. О Исус на би пучела сине адава, ако адала мануша на сине стражарија ко храми (Мат. 26:55). О исто писатели мислинела кај окола да со англедер сине бичхалде те астарен е Исусе, исто аѓаар сине храмска стражарија (Јован 7:32, 45, 46). Покасно о судско совет бичхалѓа е стражарен хем ленгере заповеднико те астарен е апостолен. Веројатно о храмска стражарија сине адала со астарѓе е апостол Павле хем влечинѓе ле авријал таро храми (Дела 4:1-3; 5:17-27; 21:27-30).