Khalani Maso Sathani Asafuna Kukudyani!

‘Khalani maso, thangwi nyamalwa wanu, Dyabo, asandzendza-ndzendza ninga nkhalamu yakulira, mbisaka munthu toera kumudya.’​—1 PED. 5:8.

KODI SATHANI ASAPANGIZA TANI KUTI NDI . . . 

wamphambvu?

nsumankha?

nyakunyengeza?

1. Fokotozani kuti anju unango adzakhala tani Sathani.

 PAKUTOMA, iye akhali na uxamwali wakuwanga na Yahova. Mbwenye mukupita kwa ndzidzi, anju unoyu atoma kukulisa cifuno ca kulambirwa na anthu. Mbuto mwakumalisa cifuno ceneci cakuipa, iye acitawirisa kukula mpaka kucita madawo. (Tgo. 1:14, 15) Ife tisadziwa anju unoyu ninga Sathani, wakuti ‘nee apitiriza mu undimomwene.’ Iye apandukira Yahova mbadzakhala “baba wa uthambi.”​—Jwau 8:44.

2, 3. Kodi mafala akuti “Sathani,” “Dyabo,” “nyoka,” na “nyangumi” asapangizanji thangwi ya nyamalwa wankulu kakamwe wa Yahova?

² Kutomera padapanduka iye, Sathani asapangiza kukhala nyamalwa wankulu wa Yahova, pontho iye nee ndi xamwali wa anthu. Madzina adapaswa anju unoyu asapangiza kukula kwa umbirimi wace. Dzina yakuti Sathani isabveka “Mpingizi,” isapangiza kuti anju unoyu wakuipa nee asaphedzera utongi ukulu wa Yahova; mbuto mwace, iye asauida mbathimbana nawo mwaukali. Mwa pyonsene, Sathani asafuna kuona kumala kwa utongi ukulu wa Yahova.

³ Pa Apokalipse 12:9, Sathani asacemerwa Dyabo, fala ineyi isabveka “Nyakupambizira.” Pyenepi pisatikumbusa kuti Sathani  asaserusa Yahova mu kuncemera nyauthambi. Mafala akuti “nyoka yakale” asatikumbusa ntsiku yakutsukwalisa mu Edeni pidaphatisira Sathani nyoka toera kunyengeza Eva. Fala yakuti “nyangumi wankulu” isafokotoza mwadidi makhaliro a Sathani. Iye ndi wakuipa na wakusowa ntsisi. Iye asafuna kupingiza cifuniro ca Yahova toera cikhonde kukwanirisika na kufudza atumiki a Mulungu.

4. Ninji pinafuna kudzadinga ife mu nsolo uno?

⁴ Mwandimomwene, Sathani ndi nyamalwa wankulu wa umumphu wathu. Na thangwi ineyi, Bhibhlya isaticenjeza: ‘Khalani maso, thangwi nyamalwa wanu, Dyabo, asandzendza-ndzendza ninga nkhalamu yakulira, mbisaka munthu toera kumudya.’ (1 Ped. 5:8) Natenepa, nsolo uno unadzadinga makhaliro matatu a Sathani anapangiza kuti tisafunika kucita mpholemphole na nyamalwa unoyu wa Yahova na wa atumiki Ace.

SATHANI NDI WAMPHAMBVU

5, 6. (a) Perekani pitsandzo pinapangiza kuti aanju ndi ‘amphambvu kakamwe.’ (b) Ndi munjira ipi Sathani ali na mphambvu ‘yakucitisa kufa’?

⁵ Aanju ndi ‘amphambvu kakamwe.’ (Sal. 103:20) Iwo ndi audziwisi kakamwe na amphambvu kupiringana anthu. Mwandimomwene, aanju asaphatisira mphambvu zawo munjira yadidi. Mwacitsandzo, ntsiku inango, anju m’bodzi wa Yahova apha anyankhondo a Asirya akukwana 185.000. Pyenepi nee mbapidakwanisika kucitwa na munthu m’bodzi, nee nsoka onsene wa anyankhondo. (2 Am. 19:35) Pa ndzidzi unango, anju m’bodzi aphatisira mphambvu na luso yace toera kubulusa nkaidi anyakupfundza a Yezu. Ngakhale kuti anyakuonera akhali cifupi, iwo nee aona kuti anju unoyu afungula misuwo mbabulusa apostolo, buluka penepo mbafunga misuwo!​—Mach. 5:18-23.

⁶ Aanju akukhulupirika asaphatisira mphambvu zawo munjira yadidi, mbwenye Sathani asaphatisira mphambvu yace munjira yakuipa. Sathani ndi wamphambvu na wa manyengerero! Bhibhlya isalonga kuti iye ndi “nkadamu wa pantsi pano” na ‘mulungu wa pantsi pano.’ (Jwau 12:31; 2 Akor. 4:4) Sathani Dyabo ndiye ‘asacitisa kufa.’ (Aheb. 2:14) Pyenepi nee pisabveka kuti iye asapha anthu mwapakweca. Mbwenye nzimu wace wakupha wamwazika pa dziko yapantsi. Nakuti Eva akhulupira uthambi wa Sathani, Adamu mbakhonda bvera Mulungu, madawo na kufa pyamwazika kwa anthu onsene. (Arom. 5:12) Ndi munjira ineyi yakuti Sathani ali na mphambvu ‘yakucitisa kufa.’ Yezu ancemera​—‘nyakupha.’ (Jwau 8:44) Mwandimomwene Sathani ndi nyamalwa wa mphambvu kakamwe!

7. Kodi mademonyo asapangiza tani kuti iwo ndi amphambvu?

⁷ Mu ndzidzi unathimbana ife na Sathani, tikuthimbanambo na anyakuphedzera ace onsene adapandukira utongi ukulu wa Mulungu. Anyakuphedzera anewa asaphataniza nsoka ukulu wa aanju akupanduka akuti asacemerwa mademonyo. (Apok. 12:3, 4) Mwakubwereza-bwereza iwo asapangiza kuti ndi amphambvu kakamwe kupiringana anthu, mukuonesa nyatwa ikulu kakamwe anthu. (Mat. 8:28-32; Marko 5:1-5) Lekani kupwaza mphambvu ya aanju anewa akuipa peno ya “nkulu wa mademonyo.” (Mat. 9:34) Mwakusowa ciphedzo ca Yahova, ife cipo mbitidakwanisa kuwina mu nkhondo yathu yakuthimbana na Sathani.

SATHANI NDI NSUMANKHA

8. (a) Ndi cipi cifuno ca Sathani? (Onani cithundzithundzi cakutoma.) (b) M’maonero anu, kodi dziko ino isapangiza tani usumankha wa Sathani?

⁸ Mpostolo Pedhro alandanisa Sathani na “nkhalamu yakulira.” Mwakubverana na bukhu inango, fala ya Cigerego yakuthumburuzwa “kulira” isabveka “kulira kwa cinyama cakuti ciri na njala kakamwe.” Pyenepi pisafokotoza  mwadidi nkhaliro wausumankha wa Sathani! Mwandimomwene, dziko yonsene iri m’manja mwace, mbwenye pyenepi nee ndi pyakukwana kwa iye. Sathani ndi ninga nkhalamu yakuti iri na njala toera kudya azinji. (1 Jwau 5:19) Sathani asaikha manyerezero ace kwa anyakudzodzwa akusalikira, akuti asaphedzerwa na “mabira anango.” (Jwau 10:16; Apok. 12:17) Cifuno ca Sathani ndi cakudya atumiki a Yahova. Kutcingwa kwa Akristu andimomwene kutomera mu pyaka dzana yakutoma mpaka lero, kusapangiza kuti Sathani ndi nsumankha.

9, 10. (a) Kodi Sathani ayesera tani kupingiza cifuniro ca Mulungu na dzindza ya Israele? (Perekani pitsandzo.) (b) Thangwi yanji Sathani akhali na mathangwi adidi toera kutcinga dzindza ya Israele wakale? (c) Musanyerezera kuti Dyabo asapibva tani angaona m’bodzi wa atumiki a Yahova mbacita madawo makulu lero?

⁹ Mu kuyesera kupingiza cifuniro ca Mulungu, Sathani asapangiza kukhala nsumankha munjira inango. Nkhalamu yakuti iri na njala nee isabvera ntsisi cire cinaphata iyo. Mu ndzidzi wakuti idzati kupha nee isabvera ntsisi, pontho nee isantsumbikika ingamala kucita pyenepi. Munjira ibodzi ene, Sathani nee asabvera ntsisi ale anayesera iye kudya. Mwacitsandzo, nyerezerani kuti Sathani apibva tani mu ndzidzi udacita Aisraele madawo ninga ulukwali na umbirimi? Mungaleri pya nyatwa idaona Zimri thangwi ya ulukwali, na ya Giezi thangwi ya umbirimi, musakwanisa ‘kuona’ kuwina kwa nkhalamu yakulira?​—Num. 25:6-8, 14, 15; 2 Am. 5:20-27.

¹⁰ Sathani akhali na mathangwi toera kutcinga dzindza ya Israele wakale. Mwandimomwene, dzindza ineyi ndiyo ikhafuna kudzabala Mesiya​—ule wakuti mbadadzafudza Sathani na kukuza utongi ukulu wa Yahova. (Gen. 3:15) Sathani nee akhafuna kuti Aisraele akhale akutawirika pamaso pa Mulungu, na thangwi ineyi iye acita pyonsene toera aagwise m’madawo. Lekani kunyerezera kuti Sathani atsukwala pidacita Dhavidhi upombo peno kuti abvesera ntsisi Mose pidaluza iye mwai wakupita mu Dziko Yakupikirwa. Mwakukhonda penula, lero Sathani asakomerwa angaona m’bodzi mwa atumiki a Mulungu akucita madawo makulu. Mwandimomwene, Dyabo asaphatisira kuwina kweneku toera kuxola Yahova.​—Mis. 27:11.

11. Thangwi yanji Sathani akhatcinga Sara?

 ¹¹ Sathani aida kakamwe dzindza ikhafuna kudzabala Mesiya. Mwacitsandzo, onani pidacitika mu ndzidzi wakuti Abrahamu akhadamala kwene kupangwa kuti mbadadzakhala “mbumba ikulu.” (Gen. 12:1-3) Mu ndzidzi wakuti Abrahamu na Sara akhali mu Ejito, Farao acemeresa Sara kunyumba kwace​—mwakukhonda penula akhafuna kuti akhale nkazace. Mbwenye Yahova apingiza pyenepi, mbapulumusa Sara m’makhaliro anewa akunentsa. (Lerini Genesi 12:14-20.) Ndzidzi pang’ono mbadzati kubala Izaki, nyatwa ninga ineyi yaoneka pontho ku Gerare. (Gen. 20:1-7) Kodi Sathani ndiye akhatsogolera pyenepi? Kodi iye akhadikhira kuti Sara, wakuti asiya umaso wadidi ku Uri toera kukhala m’misasa, mbadatunduka na nyumba zakubalika za Farao na Abimeleke? Kodi Sathani akhanyerezera kuti Sara mbadasiya kukhala wakukhulupirika kuna mamunace na kuna Yahova​—mbamanga banja munjira ya upombo? Bhibhlya nee isalonga pyenepi, mbwenye tiri na mathangwi adidi toera kutawira kuti Dyabo mbadakomerwa kakamwe kuona Sara mbakaluza mwai wakucita khundu ya dzindza ikhafuna kudzabala Mesiya. Sathani nee mbadatsukwala kuona kufudzika kwa makhaliro a banja ya nkazi unoyu wadidi na uxamwali wace na Yahova. Mwandimomwene, Sathani ndi nsumankha kakamwe!

12, 13. (a) Kodi Sathani apangiza tani usumankha wace pidamala kubalwa Yezu? (b) Musanyerezera kuti Sathani asaona tani ana akuti asafuna Yahova mbawangisira toera kuntumikira lero?

¹² Yezu abalwa mudapita pyaka pizinji pidamala kufa Abrahamu. Lekani nyerezera kuti Sathani akhaona mwana unoyu ninga wakubalika peno wakufunika kakamwe. Sathani akhadziwa kuti mwana unoyu mbadakula mbakhala Mesiya wakupikirwa. Inde, Yezu akhali khundu yakufunika kakamwe ya mbeu ya Abrahamu, wakuti mukupita kwa ndzidzi ‘mbadafudza mabasa a Dyabo.’ (1 Jwau 3:8) Kodi Sathani mbadanyerezera kuti kupha mwana unoyu pikhali pyakuipa kakamwe? Nkhabe. Sathani nkhabe kutsalakana pinacita iye khala mphyadidi peno pyakuipa. Thangwi ya Yezu, Sathani acita pinthu mwakucimbiza toera kumupha. Munjira yanji?

¹³ Mambo Herode aipirwa kakamwe pidabvundziswa iye na anyakupfundza pya nyenyezi thangwi ya ‘mambo wa Ayuda adabalwa,’ natenepa iye akhadatonga kumupha. (Mat. 2:1-3, 13) Toera kucita pyenepi, iye atonga kupha ana acimuna onsene a pyaka piwiri kuenda pantsi akhakhala ku Betlehemu na maluwani ace. (Lerini Mateo 2:13-18.) Yezu apulumuka pa ngozwi ineyi munjira yakudzumisa. Mphapo pyenepi pisatipfundzisanji thangwi ya nyamalwa wathu, Sathani? Pisaoneka pakweca kuti Dyabo nkhabe kupasa ntengo umaso wa anthu. Mwandimomwene, iye nkhabe ntsisi na anang’ono. Inde, Sathani ndi ‘nkhalamu yakuti ikulira.’ Cipo, lekani kupwaza makhaliro ace ausumankha!

SATHANI NDI NYAKUNYENGEZA

14, 15. Kodi Sathani ‘asaphopha tani manyerezero a anyakukhonda khulupira’?

¹⁴ Njira ibodzi yakuti Sathani asaiphatisira toera anthu asiye kutumikira Mulungu wathu waufuni, Yahova, ndi kuanyengeza. (1 Jwau 4:8) Kubulukira ku manyengerero anewa, Sathani asacitisa anthu kukhonda kudzindikira kuti asafunika kukwanirisa ‘pifuno pyawo pyauzimu.’ (Mat. 5:3) Sathani ‘asaphopha manyerezero a anyakukhonda kukhulupira, toera ceza ca mphangwa zadidi cinaonesa mbiri ya Kristu, ule wakuti ndi cithundzithundzi ca Mulungu cikhonde kuoneka kwa iwo.’​—2 Akor. 4:4.

¹⁵ Njira ikulu kakamwe inaphatisira Sathani toera kunyengeza anthu ndi uphemberi waunthawatawa. Iye asakomerwa kakamwe kuona anthu mbakalambira makolo awo, pinthu pyacibaliro,  peno pinyama​—na pyonsene kusiyapo Yahova, ule wakuti ‘asaphemba ulambiri wakukhonda gawika’! (Eks. 20:5) Mwakutsukwalisa, azinji ananyerezera kuti akulambira Mulungu mwakutawirika, mbwenye asaphatisira pikhulupiro pyauthambi na maserimonya akukhonda tawirika. Iwo ali m’makhaliro akutsukwalisa, akuti alandana kakamwe na a ale adalonga Yahova: ‘Thangwi yanji imwe musapitiriza kulipa pinthu pyakuti nee si cakudya? Thangwi yanji musabvunga kobiri toera kugula pinthu pyakuti nkhabe kukhutisa? Ndibvereni! Mungacita pinakupangani ine, munakhala na pyakudya pyonsene pyadidi kakamwe.’​—Iza. 55:2.

16, 17. (a) Thangwi yanji Yezu apanga Pedhro: ‘Buluka patsogolo panga, Sathani’? (b) Kodi Sathani anakwanisa tani kutinyengeza toera tisiye kukhala maso?

¹⁶ Sathani anakwanisambo kunyengerera atumiki aphinga a Yahova. Mwacitsandzo, onani pidacitika mu ndzidzi udalonga Yezu kwa anyakupfundzace kuti mwakukhonda dembuka mbadaphiwa. Nakuti mpostolo Pedhro akhafuna Yezu, ampanga: ‘Khalani na ntsisi na imwe ene, Mbuya; pyenepi pileke kukucitikirani.’ Yezu atawira Pedhro na cinyindiro: ‘Buluka patsogolo panga, Sathani!’ (Mat. 16:22, 23) Thangwi yanji Yezu acemera Pedhro, ‘Sathani’? Thangwi Yezu akhadziwa pikhafuna kucitika. Mwakukhonda dembuka, Yezu mbadaphiwa ninga ntsembe yaciomboli, na kupangiza kuti Dyabo ndi wauthambi. Ndzidzi unoyu ukhali wakufunika kakamwe mu mbiri ya anthu, nee ukhali ndzidzi toera Yezu ‘abvereke’ ntsisi ekhene. Sathani mbadakomerwa khala Yezu asiya kupitiriza kukhala maso.

¹⁷ Nakuti tiri cifupi na kumala kwa makhaliro ano a pinthu, ifembo tisakhala m’midzidzi yakunentsa. Sathani asafuna kuti tisiye kukhala maso, toera tikhale na ‘ntsisi’ na ife ene kubulukira mu kukhala na mbiri mu dziko ino, mbatiluza phinga yathu yakukhala maso. Lekani kusiya kuti pyenepi picitike kwa imwe! Mbuto mwace, ‘pitirizani kukhala maso.’ (Mat. 24:42) Cipo lekani kukhulupira uthambi wa Sathani wakuti kumala kwa makhaliro ano a pinthu kuli kutali kakamwe peno kuti nee kunadzaoneka.

18, 19. (a) Sathani anayesera tani kutinyengeza mu kuphatisira maonero athu? (b) Kodi Yahova asatiphedza tani toera kupitiriza kukhala maso?

¹⁸ Sathani asayesera kutinyengeza munjira inango. Iye asafuna kuticitisa kunyerezera kuti nee tathema kufuniwa na Yahova, pontho kuti Mulungu cipo anadzalekerera madawo athu. Mbwenye anewa ndi manyengerero akubulukira kuna Sathani. Mwandimomwene, mbani wakuti nee athema ufuni wa Yahova? Ndi Sathani. Mwandimomwene, Mbani wakuti nee athema kulekererwa? Ndi Sathani. Mbwenye Bhibhlya isatipasa cinyindiro: ‘Thangwi Mulungu si wakukhonda kulungama tayu, iye nee anadzaduwala pinthu pyadidi pidacita imwe na ufuni udapangiza imwe ku dzina yace.’ (Aheb. 6:10) Yahova asapasa ntengo kuwangisira kwathu toera kunkomeresa, pontho basa yathu si yapezi tayu. (Lerini 1 Akorinto 15:58.) Natenepa, nee tisafunika kunyengezwa na manyengerero a Sathani.

¹⁹ Ninga pidaona ife, Sathani ndi wamphambvu, nsumankha na wakunyengeza. Tinakwanisa tani kuwina mu nkhondo yathu yakuthimbana na nyamalwa unoyu wakugopswa? Yahova nee asatisiya mwakusowa citsidzikizo. Mafala Ace asatipfundzisa pya njira za Sathani, pontho ‘manyengerero ace tisaadziwa kale.’ (2 Akor. 2:11) Tingadziwa mwadidi njira zakusiyana-siyana za Sathani, tinakhala dzololo toera kupitiriza kukhala maso. Mbwenye kudziwa manyengerero a Sathani nee pyakwana. Bhibhlya isalonga: ‘Khondani Dyabo, penepo iye anadzathauka kwa imwe.’ (Tgo. 4:7) Nsolo unatowerera unadzadinga makhundu matatu akuti tinakwanisa kuthimbana na Sathani mbatiwina.

[Mibvundzo Ya Pfundziro]