KUDYA phwando pabodzi pa meza ya Yahova ndzidzi onsene pisakhala pyakutsandzayisa. Atumiki a Mulungu angagumanyikana pa phwando yauzimu, kutsandzaya kwawo kusathimizirika mu ndzidzi unagawana iwo cakudya na anango.

Mu nthanda ya Nyendzi ya caka 1919, anyakupfundza Bhibhlya acita nsonkhano wa gawo wa ntsiku zisere ku Cedar Point, Ohio, Estados Unidos da América. Maoteli akhafunika kukhunganya mbuto zakugona na cakudya kwa abale na alongo, mbwenye afika anthu pikwi na pikwi kupiringana ale akhadikhirwa. Thangwi ya kunjipa kwa anthu, anyakuphata basa a mu oteli asiya kuphata basa pabodzi pene. Mwakusowa cidikhiro muyang’aniri wa mbuto yakuphikira aphemba abale na alongo aciphale khala mbadakwanisa kuphedzera, natenepa azinji atawira na ntima onsene. Sadie Green akhali m’bodzi wa iwo, iye alonga: “Ukhali ulendo wanga wakutoma wakuphata basa yakupereka pyakudya, mbwenye pikhali pyakutsandzayisa kakamwe.”

Mu pyaka pidatowerera, masasanyiro akupereka pyakudya pa nsonkhano wa gawo acitisa kuti anthu akukhonda lengeseka aperekeke mwakutsandzaya toera kutumikira abale na alongo. Kuphata basa na anyakukhulupira andzathu kwaphedzambo aphale na atsikana azinji toera kukhazikisa pifuno pyauzimu. Gladys Bolton adatumikira pa mbuto yakudyera pa nsonkhano wa gawo wa caka 1937 alonga: “Ndadziwana na anthu a mbuto zinango, pontho ndabva kuti akunda tani nyatwa zawo. Kutomera penepo, ndatoma kukhala na cifuno cakutumikira ninga mpainiya.”

Beulah Covey adagumanika pa nsonkhano alonga: “Phinga ya anyakuphata basa isacitisa kuti pinthu pyonsene pifambe mwadidi.” Mbwenye, basa ikhali na mipingizo. Angelo Manera akhadasankhulwa toera kutumikira pa mbuto yakudyera, mbwenye iye adziwa pyenepi basi ene pidafika iye ku Dodger Stadium mu Los Angeles, dziko ya California, mu caka 1969. Iye alonga: “Ikhali basa yakunentsa kakamwe yakuti cipo ndaicita mu umaso wanga!” Kukhunganya nsonkhano unoyu kukhaphataniza kukumba djenje ya makilometru 4 toera kuikha tubu ya gaji mpaka ku mbuto yakuphikhira!

Ku Serra Leoa mu caka 1982, anyakuperekeka amphambvu pakutoma acenesa mbuto, buluka penepo mbamanga mbuto yakudyera mukuphatisira pyakumanga napyo pya pacisa. Ku Frankfurt, Alemanya, mu  caka 1951, abale aluso alugari ntcini wakuti ukhali na mphambvu yakuwirisa mapoto 40 akuphikira. Anyakutumikira akwanisa kugawira cakudya kwa anthu akukwana 30.000 mu ndzidzi ubodzi basi. Toera kululupisa basa ya anthu 576 a mu departamentu yakutsuka pyombo pyakudyera, abale na alongo abweresa mipeni na magarufu awo. Ku Yangon, Myanmar, cakudya cidapaswa abale adabuluka madziko anango caikhwa mphiripiri zakucepa kakamwe.

Kulimira pa dzuwa pa nzera wakulapha m’mbuto yakudyera pa nsonkhano wa gawo ku Estados Unidos mu caka 1950 pyabweresa nkhombo kuna Annie Poggensee. Iye alonga: “Ndakhuyiwa kakamwe na makani akuwangisa a alongo awiri adabuluka ku Europa na bote.” M’bodzi na m’bodzi wa iwo afokotoza kuti aphedzwa tani na Yahova toera kugumanika pa nsonkhano. Annie alonga: “Nkhabepo munthu akhali wakutsandzaya kakamwe kupiringana alongo anewa awiri.” “Kudikhira pa nzera na kupisa kwa dzuwa​—nee pikhali pyakunentsa kwa iwo.”

Pa misonkhano mizinji ya gawo yakudzala na anthu, misasa mikulu yakudyera ikhali na meza zikulu, pyenepi pikhakulumiza ale anadya toera kudya mwakucimbiza mbabuluka toera anango adyembo. Kodi anthu pikwi na pikwi mbadakwanisa tani kupaswa cakudya camasikati? Munthu unango wakuti nee akhali Mboni ya Yahova alonga: “Unoyu ndi uphemberi wacilendo. Iwo asadya mbadalimira.”

Akulu anyankhondo na a mautongi adzumatirwa na kuona kuphatana kwawo na maphatiro awo adidi a basa. Pakumala kuona maphatiro a basa pa mbuto yathu yakudyera ku Yankee Stadium mu Nzinda wa Nova York, nkulu wa Anyankhondo a Estados Unidos akulumiza Faulkner Nkadamu wa Departamentu ya Nkhondo ya ku Britanya toera kuonambo kuti basa yathu isacitwa tani. Natenepa, mu caka 1955 iye na nkazace aenda ku Twickenham, Inglatera toera kugumanika pa Nsonkhano wa Cisa wa nsolo wakuti: “Reino Triunfante.” Iye alonga kuti akwanisa kuona ufuni unoyu mbukapangizwa pa mbuto yakudyera.

Mu pyaka pizinji, anyakuperekeka na ntima onsene mwaufuni akhapereka cakudya cakupasa ungumi na cakukhonda dhula toera kuphindulisa ale akhagumanika pa nsonkhano wa gawo. Mbwenye basa ineyi ikulu kakamwe kazinji kene ikhacitisa anyakuperekeka azinji kuphata basa midzidzi mizinji mbaluza khundu ibodzi peno nsonkhano onsene. Basa yakupereka cakudya pa nsonkhano yasasanyirwa m’madziko mazinji kunkhomo kwa pyaka 1970. Natenepa, kubulukira mu caka 1995, anyakugumanika pa nsonkhano akhaphembwa kubweresa cakudya cawo. Pyenepi pyaphedza ale akhakhunganya na kupereka cakudya toera kutsandzaya na programu yauzimu na kucedza na abale awo Acikristu. a

Mwakukhonda penula, Yahova asapasa ntengo kakamwe ale adaphata basa mwakuwanga toera kutumikira anyakukhulupira andzawo! Anango panango ali na citsuwo ca ntsiku zenezi zakutsandzayisa zakuphata basa pa mbuto yakudyera. Mbwenye undimomwene ndi wakuti: Ufuni ndiwo unapitiriza kupangizwa kakamwe pa misonkhano yathu ya gawo.​—Jwau 13:34, 35.