Na mbeni dimanche na peko ti midi, Kenneth na Filomena, so alango na kodro ti Curaçao, ague ti sara vizite na mbeni koli na wali ti lo so ala yeke manda Bible na ala.

Kenneth atene: “Na ngoi so e si, yanga-da ni akanga nga oto ti ala ayeke dä ape. Me mbeni ye atene na mbi ti iri ndo na ndö ti téléphone ti wali ni.”

Wali ni amû téléphone ni na lo tene na ala so koli ti lo ahon na kua awe. Me tongana wali ni aga ti hinga so Kenneth na Filomena ayeke ge na yanga-da ti lo, lo ga lo zi yanga-da ni, na lo tene na ala ti lï.

Gï na bango lo ala hinga so lo londo ti toto. Na ngoi so Kenneth asambela ti komanse mandango Bible ni, wali ni akiri akomanse ti toto. Kenneth na Filomena ahunda lo yeke ti fa na ala ye so apassé.

Wali ni atene na ala so lo leke na bê ti lo fade ti fâ terê ti lo tâ na peko ti midi so, nga so iringo ndo ti Kenneth ni atï gï na ngoi so lo ngbâ ti sara mbeni mbeti ti tene lo zia na koli ti lo. Lo tene na ala so vundu ahon ndö ti lo, tongaso Kenneth na Filomena adiko na lo ambeni versê ti Bible so adë bê ti zo. Atënë ni so asö fini ti lo.

Kenneth atene: “E tene merci na Jéhovah so lo mû lege na e ti aidé wali so mawa ahon ndö ti lo so, mbilimbili so lo pusu e ti iri ndo so, peut-être lo sara ni na lege ti mbeni ange wala na lege ti yingo vulu ti lo!” *

Eskê a yeke na lege ni ti tene Kenneth na Filomena apensé so Nzapa la asara ye ni so na lege ti mbeni ange wala na lege ti yingo vulu so ayeke ngangu ti lo? Wala iringo ndo ti Kenneth ni ayeke mbeni ye so asi nga gï tongaso?

E hinga ape. Me ye so e hinga ayeke so Nzapa ayeke sara kua na a-ange ti lo ti aidé azo ti hinga ye na ndö ti lo. Na tapande, Bible atene so Nzapa atene na mbeni ange ti tene na Philippe, so ayeke mbeni Chrétien, ti gue ti aidé mbeni kota zo ti Éthiopie so angbâ ti gi lani ti hinga afango ye ti Nzapa.—Kusala 8:26-31.

Gbâ ti abungbi ti nzapa nde nde ayeke fa na azo ti mä na bê na ambeni yingo so ayeke sara aye ti kpene, nga so a fa ambeni na popo ni tongana acréature ti yingo so ayeke sara ye so bê ti Nzapa aye wala ala yeke sara kua tongana a-ange so ayeke bata zo oko oko. Gbâ ti azo amä na bê so a-ange ayeke dä, na ala pensé nga so aye so acréature ti yingo so ayeke sara abâ fini ti azo. Me gbâ ti ambeni zo apensé so a-ange ayeke ti ala dä ape.

Eskê a-ange ayeke dä biani? Tongana ala yeke dä, ala bâ gigi tongana nyen? Tâ tënë na ndö ti a-ange ayeke so wa? Aye so ala yeke sara andu mo tongana nyen? Zia e bâ tënë na ndö ni.