En, asioni ange ayeke dä. Ka ala londo na ndo wa? Girisa ape so Nzapa acréé a-ange na lo mû na ala liberté ti sara ye so ala ye. Kete na peko ti so Nzapa asara Adam na Ève, mbeni créature ti yingo asara ye nzoni ape na liberté ti lo ni na lo handa azo na sese ge ti ke yanga. Lo handa Adam na Ève ti ke yanga ti Nzapa (Genèse 3:1-7; Apocalypse 12:9). Bible afa pëpe vrai iri ti créature ti yingo so, wala lo yeke na popo ti a-ange wa na yayu kozoni si lo ke yanga ti Nzapa. Me na peko ti so lo ke yanga ti Nzapa, Bible amû na lo iri ti Satan, so ndani aye ti tene “Zo ti lutingo na”, nga Zabolo, so ndani aye ti tene “Zo ti pango zo.”​—Matthieu 4:8-11.

Mawa ni ayeke so kengo yanga ti Nzapa so ahunzi lani gï ge ape. Na ngoi ti Noé, ambeni ange so a fa wungo ti ala ape “adö tâ ndo ti duti ti ala” na terê ti Nzapa na yayu azia. Ala ga na sese, ala mû terê ti zo na ala mû mbeni sioni lege, mbeni lege so ayeke nde na ti so Nzapa aleke ala ndali ni.​—Jude 6; Genèse 6:1-4; 1 Pierre 3:19, 20.

A-ange ni ayeke na ndo wa fadeso? Na ngoi so Jéhovah asara si kota ngu apika amû ndö ti sese kue, ala kiri ala mû terê ti a-ange ala kiri na ndo so azo ti yingo ayeke dä. Me Nzapa azia lege pëpe na a-ange so asara ye ti kamene so ti kiri na “kozo ndo ti ala.” Lo zia ala na mbeni ndo so ayeke na gbe ni mingi na yâ ti “bingo so avuko pitipiti [na lege ti yingo]” so a iri ni Tartare (Jude 6; 2 Pierre 2:4). Asioni yingo so aga na gbe ti Satan Zabolo so ayeke “mokonzi ti asioni yingo” so “ayeke sara terê ti lo lakue tongana mbeni ange ti lumière.”​—Matthieu 12:24; 2 aCorinthien 11:14.

Bible afa so a zia gere ti Royaume ti Nzapa so ayeke mbeni gouvernement so ayeke na yayu, so Messie ayeke na ndö ni na ngu 1914. * Na peko ti kota ye so asi so, a tomba Satan na asioni yingo ti lo na yayu na a bi ala na sese. Ala kiri na ngonzo ni na ndö ti azo na sese ge, a sara si laso, azo aga sioni mingi na sioni sarango ye amû ndo.​—Apocalypse 12:9-12.

Me asioni sarango ye nga na sarango ngangu so ayeke gue na li ni mingi so, a fa so sioni komandema ti ala so aga nduru ti hunzi awe. Na yâ ti kete ngoi, asioni yingo, so ayeke sara ye ti ngangu na azo so, ayeke wara ngangu ti sara mbeni ye ape. Na peko ti so Royaume ti Nzapa ayeke komande na ndö ti sese so aga paradis teti ngu 1 000, asioni yingo so ayeke wara ande mbeni kete ngoi ti tara azo ti sese. Na pekoni a yeke futi ala biani biani.​—Matthieu 25:41; Apocalypse 20:1-3, 7-10.